《再見了，還會再見嗎？》: 第30章 – 醒覺

跟住落嚟嘅半個月，我一直都好努力留喺嗰間房温習，尤其係數學。

當然啦，小雲每日都喺我旁邊陪住我。

「車仔，呢條點計㗎，嗰個咩二次方又要點搞？」

「你呢，呢到用嗰個公式，之後再……」
…
…
「哦，我明喇！！」





「呼，温到有啲攰，我出去小食部買啲嘢食先〜」

「我又去！！」

通常我哋每日就係咁樣留低温書，佢教下我，我又教下佢。

温到攰攰地就出去小食部放個Break。

我：「德叔，照舊要一份西多，一盒大維他奶」





徳叔：「冇問題，你哋坐低先啦，我一陣攞俾你哋」

我：「唔該徳叔〜」

「我照舊嗌咗嗰啲咋，應該夠食啦」我行到返去同小雲講。

「夠啦，食太多肥咗冇人要我咪死」小雲扁一扁嘴。

「唓，大把人追你啦，怕咩冇人要」





「我又唔係鍾意佢哋，冇用㗎喎〜〜〜」

「嘢食到喇〜 你哋成日都兩個人食一份，真係好鬼sweet」徳叔對我哋講。

「驚今晚食唔落飯嘛，所以咪一人食少少過下口癮囉」我回應。

「我返去做嘢唔阻你哋喇〜」

「ByeBye〜」我同小雲一齊講。

每次同小雲嚟食Tea都好開心，因為我又可以做一個等食嘢嘅廢人。

次次小雲都會切好埋份西多，我要做嘅嘢就係自己用隻叉拮嚟食。





仲有盒維他奶，佢身為女仔竟然唔介意飲我口水尾，每次都會同我講

「你飲夠先再俾我啦，我飲唔飲都冇所謂」

雖然佢好似講到冇咩所謂，但我都覺得飲晒好似唔係幾好。

不過！！

通常我都係會唔小心飲晒……

我知你哋好想鬧我，叫我留返啲俾人哋女仔嘛。

咁我口渴控制唔到嘛，我都唔想㗎。

考試嗰排，我同小雲都係一考完當日嘅科就會一齊去食飯，食完飯返去就一齊入間細房閉關温習。





唔經唔覺就考完晒咁多科，可以出嘅力都出盡晒。

淨返落嚟就只有聽天由命，等家長日派彩喇。

〜家長日〜

「車仔，陳sir係邊班班主任嚟㗎？我哋去咗多謝佢先啦」媽媽問我。

根據我嘅記憶，陳sir好似冇做班主任？

「佢係訓導主任嚟㗎，我都唔知佢喺邊層啊」

「搞錯呀，讀咗兩年都唔知人哋喺邊嘅」





唔講仲以為我同陳sir識心靈感應。

「唔該，我想問教數學嗰個陳sir會喺邊層㗎」媽媽問啲企喺接待處嘅領袖生。

「我諗陳sir應該喺一樓或者二樓，因為佢係負責初中嘅訓導」

「唔該」

「行喇車仔，我哋上二樓先啦」

上到二樓，原來陳sir就喺我班房門口。

「媽媽，嗰個就係陳sir喇」我向走廊嗰邊指住。

「咁後生嘅，似30出頭咋喎，我仲以為係啲禿頭阿伯嚟」





「唔好亂講嘢啦媽媽」

我跟住媽媽向陳sir個方向行。

原來小雲早過我返咗，仲坐咗喺課室外面等入去。

佢旁邊坐咗個二十幾歲嘅女仔，我諗應該係佢家姐啦。

我行過嘅時候只係同小雲揮咗個手，因為媽媽喺隔離就費事行過去傾計。

媽媽：「陳sir你好，我係張轟浩媽媽」

陳sir：「張太你好啊〜 張轟浩今次考試好叻仔呀，媽媽唔使太擔心」

一嚟就講成績，睇嚟陳sir都知我媽媽care啲乜，可惜今次估錯咗。

媽媽：「今次嚟係想多謝你肯俾次機會我個仔改過，佢以後會生性讀書㗎喇，呢到小小心意」

媽媽喺袋拎咗盒朱古力俾陳sir。

陳sir：「呢件好小事啫，我收你哋禮物反而有啲唔好意思呀。媽媽留返盒朱古力俾張轟浩喺屋企食啦，佢今次喺我嗰科考到全級第五我已經好開心㗎喇。」

陳sir將盒朱古力推返俾媽媽。

數學全級第五，努力果然冇白費。

唔知小雲考成點呢？

媽媽：「都係陳sir你教得好啫，今次真係麻煩晒你」

陳sir：「唔使客氣，張轟浩佢叻仔考得好啫。」

「車仔，到你可以入去喇〜」小雲喺旁邊提一提我就走咗。

「媽媽，可以入去喇〜」

如果緊張程度係十分做滿分嘅話，咁我呢一刻冇九分都八分。

因為呢一份成績係會影響住我嚟緊幾年嘅路點行。

路雖然唔係得一條，但行另一條路嘅話只會需要花更多嘅時間同努力落去。

Miss Chu：「媽媽你好，我哋又見面喇」

媽媽：「Miss你好，想問下我個仔今年考成點，下年入唔入到精英班呀？」

Miss Chu：「媽媽唔使太緊張，成績方面絕對唔使擔心。我講一講張成績表先啦，咁張轟浩佢就全班第一啦，全級嘅名次就啱啱好入到頭四十。中文就進步咗少少但依然唔合格」

偷睇下Miss Chu張紙先…

小雲班第二，Choco班第三。

嗯，呢個結果唔意外。

Miss Chu：「咁數學就全級第五嘅，趁呢到人少少我唔怕講，聽講頭二十名入面除咗張轟浩同佢個好朋友黃思雲之外，就全部都係嚟自E班嘅同學仔，所以佢兩個真係好犀利㗎喇。其他科呢……」

咪住，E班啲人係咪傻咗？？？ 

遲啲真係要揾阿天同雯雯問下點解可以咁勁。

Miss Chu：「不過成績以外嘅嘢反而係比較令人擔心嘅地方，喺呢一年我哋都見到張轟浩成日群埋班操行較差嘅學生到。首先，上學期已經有一單打鬥事件，咁嗰次就因為張轟浩係受害者，而且傷勢相對較嚴重，所以校方冇對佢作出任何懲罰」

點解作為老師可以將事實扭曲晒嚟講？？

一個真正嘅老師係咁做㗎咩？？

Miss Chu：「不過下學期呢單，張轟浩就唔好彩地令到一位同學受傷，因此校方只好俾一個缺點佢，希望佢會記住呢件事好好改過」

開始分唔到Miss Chu係真傻定假傻……

媽媽：「明白，如果冇其他問題我哋係咪可以走㗎喇？」

Miss Chu：「當然啦」

媽媽連ByeBye都冇同Miss Chu講，就頭也不回咁帶埋我離開咗班房。

出到學校媽媽突然好似失咗控咁，不停鬧Miss Chu，

「你個Miss都唔知係咪老師嚟，仲話班主任喎，都唔知佢做過啲乜。同學相處有問題又唔知，開口埋口就喺到校方校方。問佢嘢又淨係識好似機械人咁講廢話，嗰啲咩成績表我自己都識睇啦，使乜佢讀一次俾我聽」

「我都分唔到到底陳sir係你班主任，定抑或嗰個Miss Chu先係喇」

其實Miss Chu不嬲都係咁差，係你而家先睇得出咋嘛。

講開又講，我個媽媽都唔知係咪媽媽嚟。

上年佢話我有社交障礙嗰陣啊，你咪又係信到十足。

算啦唉，起碼媽媽終於醒覺。