《再見了，還會再見嗎？》: 第29章 – 缺點

〜當日晚上〜

我自返到屋企就一直匿喺間房，希望可以逃過一劫。

但世事又點會如想像中美好，要嚟嘅始終都會嚟。

食飯嘅時候我哋三個都冇出聲講嘢，直到…

「我食飽返入房喇」





「張轟浩，你係咪有啲嘢要同我哋交代下呢？」媽媽喺呢個時候出聲。

叫得我全名，睇嚟都唔係可以隨便濛混過關。

「Errr…我知今次係我做得唔啱整親人，不過係佢哋搞我朋友先㗎！」

「你行過嚟，除咗副眼鏡先」媽媽叫我。

又會無啦啦要除眼鏡咁古怪嘅。





「我費事打爛你副眼鏡要買過副」

啪！

啪！

媽媽打咗我兩巴掌。

我努力堅持忍住唔好喊。





因為每次媽媽只要一聽到啲喊聲，就只會鬧得再勁啲。

「你今日當自己係正義嘅化身，要喺陽光底下懲罰人哋呀？係咪睇太多卡通片睇上腦啊你？」

我都冇咁諗過……

「就算你係有道理嗰邊，都唔應該郁手推人落地，總之咁樣整傷人就係唔啱，仲有你扔……」

推人落地？

明明我都冇行埋過佢到。

我都分唔到係爸爸講大話定係陳sir講大話喇。

媽媽一直講一直講，而我就只係耷低頭避免同媽媽再有任何交流。





我估應該係過咗10至15分鐘左右，媽媽終於停咗冇再鬧。

我諗應該係鬧到冇嘢可以再鬧先啱。

「終於今次唔出聲駁我，知衰喇咩？」

其實都冇咩好駁，只係希望可以快啲鬧完俾我自己一個人靜下。

「好彩你爸爸求咗好耐先令陳sir俾次機會你咋，而家你只要嚟緊個學期都冇再搞事就可以整走個缺點喇，返到去一定要好好多謝陳sir呀你」

你哋乜都唔知又喺到亂咁吹，總之我到時去齊咁多次個咩鬼“改進計劃”就得啦。

「唔係喇，我都係遲啲家長日親身去多謝返佢」





呢個時候我忍唔住開聲講句，

「唔使咁大陣仗啦，我去多謝佢咪得囉」

「你細路仔唔識嘢就唔好出聲，入返房温你嘅書」

嗯，正合我意。

睇嚟以一個正常嘅學生嚟講，要報答老師嘅最好方法應該就係喺佢嗰科拎返個好成績啦。

「揾下先，我本數學書呢……」

Um…睇嚟放咗喺學校Locker…

都係聽日先開始努力啦咁！！