《再見了，還會再見嗎？》: 第31章 – 充實的暑假 (上)

「車仔，前排咪同你講過話想俾你學下游水嘅，爸爸都話幾好喎」媽媽對我講。
 
「咁你報好就話俾我知幾時去啦」

等我講返少少背景先，升中三嗰陣嘅我呢，應該一俾人扔落海就浸死㗎喇，浮又唔識，游就更加唔識。

嗰陣嘅我游唔到係因為我怕水，又驚個鼻入水，又驚耳仔入水，都唔知可以顧得邊樣。

如果我冇記錯嘅話，好細個嗰陣老竇好似教過我游水，但我每次一落水就抱住我老竇死都唔肯放手，所以之後佢都放棄咗教我。





過咗幾日，媽媽再嚟同我講有關學游水嘅事。

「咁我就幫你book好喇，你到時暑假每朝10點去九龍公園游泳池揾個叫Jack Sir嘅人啦」

可能有人會記得，乜我唔係住大西北㗎咩，點解會特登出咁遠學啊？

事關我暑假要去嫲嫲屋企㗎嘛，咁嗰到近嫲嫲屋企，所以咪揀喺嗰到學囉。

「哦，好啊」





〜暑假第一日〜

「車仔起身喇，你媽媽話你成個暑假都要去學游水㗎」嫲嫲叫我。

「我唔想去啊。我都唔識點游，又怕水，點會學得識啫」

「雖然嫲嫲我都唔識游，但我覺得車仔你一定會學得識㗎。你諗下喎，鋼琴你識彈啦，武術又識耍啦，圍棋又識捉啦，真係動又得靜又得，咁區區游水又點會難到你呢」

「可能呢樣就係其中一樣我玩唔到嘅嘢呢……」





「俾啲信心自己啦，起身刷牙洗臉食早餐喇」嫲嫲一邊講一邊拉起我。

食完早餐我就拎埋啲嘢出咗門口。

都未行到個泳池，聞到陣泳池水味即刻有種想嘔嘅感覺。

行前多少少就望到個露天泳池，估唔到咁早就已經有咁多人嚟玩水同學游水。

入到更衣室，周圍都係赤裸裸Fing下Fing下周圍行嘅男人。

雖然佢哋有嘅身體部位我都有，但唔知點解硬係望完人哋塊臉就會望埋人哋下面。

如果佢哋再同我對望返，咁就真係十級尷尬。

重申返呀，我絕對非gay，淨係鍾意女仔㗎咋。





聽媽媽講話Jack Sir係會戴住黃色泳帽，等我睇下先……

呢類鮮豔嘅顏色果然係離遠就望到，真係好易認。

不過嗰個人好似有啲老？

睇落似係啲40幾50歲嘅中年大叔。

「想問下係咪Jack Sir啊？我係張轟浩啊」我對住嗰個黃色泳帽嘅大叔講。

「我冇掛住張證你都知我係阿sir嚟嘅？」

Jack Sir又會咁風趣嘅，游水就緊係唔會掛住張證啦。





「咁你戴咗黃色泳帽嘛，我咪知你係Jack Sir囉」

突然後面有個人拍我膊頭。

「你係咪車仔啊，過嚟一齊做熱身啦」

拍我膊頭嘅呢個人咁啱又係戴住黃色泳帽。

死喇，我啱啱係咪認錯人？？？

「係係係！！而家過嚟」

我一路做熱身一路諗啱啱個問題，到底嗰個黃色泳帽係咩人嚟㗎。

又話自己阿sir，又話自己冇證，夏天真係特別多痴線佬。





「做完熱身，一齊出外面橋底嗰到落水先。以後我哋上堂就會喺呢個位等，早到嘅自己做住熱身等，10點就準時落水」

好凍。

「記住記住，唔好貪快心急衝落水，一定要做齊1 set熱身先好落去」Jack Sir再次提醒我哋。

「咁今日我會教咗啲基本嘢先。你哋而家吸一大啖氣，然後試下耷低頭臉向水呼返啲氣出嚟」

「呀！！！」我大叫。

我一耷低頭就即刻彈返起身，好辛苦呀！！！

「各位同學仔下次記得一落水就要戴泳鏡喇」Jack sir對全班講。





其實我諗佢只係同我一個人講緊…...

「嗯，大家都做得幾好。今次試下成個頭耷埋落去，耳仔都要浸埋落水嘅，做三十次」

我望一望身邊啲同學，個個都不停咁做緊。

我都要努力啲先得！！

不過……

我一耷低頭望住啲水，就唔敢將成個頭浸晒落去。

真係好怕耳仔會入水。

最後我決定做返啱啱咁，淨係浸塊臉落去。

做咗兩三次都幾順利，睇嚟Jack Sir冇發現。

點知做到第四次，我個頭突然俾人大大力咁㩒落水幾秒，之後抽咗上嚟幾秒又再㩒返落去，唔知仲以為俾人用水刑嚴刑逼供緊。

「車仔，乖乖地唔准再偷懶啊」

原來……我隻耳仔係真係唔會入水。

跟住做嘅嘢都係揸住塊浮板踢下水就落堂，費事悶死你哋啦，所以我都係唔多講喇。

上完呢個幾鐘堂，我覺得自己好似俾人打完一身咁，條腰同對腳都痛到傻咗。

雙腳就介乎喺正常同就快抽筋之間嘅狀態，有種唔識形容但就係好辛苦嘅感覺。

「返嚟喇，我就快煮好晏晝喇，你去沖個涼先啦」嫲嫲對我講。

一邊沖涼我一邊諗，

「連第一日都咁辛苦，咁我之後點捱落去呀……」