《再見了，還會再見嗎？》: 第16章 – 失去妳

「嫲嫲，我呢個禮拜同小雲鬧咗交啊」

「車仔，發生咗咩事呀」嫲嫲擔心地問。

「我諗係我講錯嘢激嬲咗小雲」

「你呢排係咪同個咩兒熟咗好多呢，之前聽你話你哋調完位就一齊坐」

「你點會知嘅嫲嫲？我而家每日喺學校都係同Zoe一齊」我驚訝地說。





「哈哈，嫲嫲都有做過細路女嘅時候，點會唔明你哋諗咩」

「小雲應該都係太關心你先會發脾氣啫。如果佢唔緊張你，又使乜為咗你而唔開心」

嫲嫲呢句又好似幾合理。

「你記住聽日返去就要氹返人啊」嫲嫲一邊講一邊meet我塊臉。

雖然我坐低同嫲嫲傾咗個幾鐘，但係我都冇講到喺學校俾人蝦嘅事，費事要嫲嫲擔心啦。





其實近排見小雲同Choco佢哋食晏嘅時候都有講有笑，我諗佢應該都冇唔開心掛。

今日我決定鼓起勇氣去揾小雲道歉做返朋友，點知……

「小雲，…」我一邊叫佢一邊行過去。

佢一聽到我叫佢就行開咗……

啱啱應該只係巧合啫，一陣食完飯再去揾多佢一次先。





點知情況依然一樣，睇嚟小雲係有心避開我。

今次我決定改一改策略，一落堂就行過去揾佢。

「車仔，你可唔可以教一教我呢條點做」Zoe一落堂就問我。

「我好快咁講一次俾你聽，之後你自己計埋落去啦」我心急地說。
…
…
「跟住咁就得㗎喇」

望一望個鐘，已經4點 05分。

再望下小雲個位，已經唔見咗人。





我決定行去坐喺小雲個位等佢返嚟。

Choco：「你坐喺到做咩，小雲都已經特登避咗你幾次。走啦你，唔好再煩佢」

我：「哦…」

我死死地氣行返自己個位。

「做咩突然咁唔開心啊？」Zoe問我。

「我同小雲鬧咗交，而家佢係咁避開我」

「又係你教我嘅，冇咗朋友咪由得佢，再揾過個新囉」Zoe嘗試氹我。

聽到呢句，我個心好似俾人大力敲咗一下咁。





變咗自己做當事人，先知呢句說話係幾咁冇用，朋友根本就唔係一樣可以咁輕易就放棄嘅嘢。

不過人總係犯賤，永遠唔到失去嗰一刻，你唔會明白嗰個人/嗰樣嘢對自己嚟講究竟有幾重要。

「笑下啦，成日都愁眉苦臉」Zoe對我講。

「我會㗎喇」

剩返落嚟嘅半個月我都冇再揾過小雲，一嚟唔想阻住佢準備考試，二嚟嗰日俾Choco話一話，我都冇乜膽再行過去。

即使呢排我冇再揾小雲，課室呢排都仲不斷有閒言閒語。

「為咗成績好啲而放棄自己女朋友，咁嘅人都有嘅」





「你睇下佢一腳踏兩船，而家溝到Zoe就完全同小雲絕交」

「都唔知小雲有冇蝕底俾個咁嘅人，如果有就慘喇」

難聽嘅說話一日多過一日，甚至傳到連班主任Miss Chu都知。

今日Miss Chu喺班主任課終於忍唔住出聲。

「相信同學仔最近都有聽過啲傳聞，係有關我哋班同學之間嘅關係。」

「我對呢件事唔係好理解，真定假亦唔會去求證。不過希望同學仔之間要互相尊重包容，大家相親相愛幫助對方……」

都估到又係呢種大愛言論，講完同冇講都係冇分別，但最令人嬲嘅係嗰班人嘅回應。

佢哋不斷你一句我一句咁回應Miss Chu講嘅嘢。





「我哋不嬲都咁關心張同學㗎喎」

「Miss Chu 講得啱，我哋一定會互助互愛」 

「聽到你哋咁講就放心晒喇〜」Miss Chu回應大家。

轉眼間就考完試，今日係派發成績表嘅家長日。

睇住我嗰班啲人平時喺學校就天不怕地不怕咁款，一到咗家長日有屋企人喺隔離就一反常態扮晒死狗，呢個場面真係好好笑。

好緊張，到底我今次會考成點呢。

自問都已經盡晒力去温，加上今個學期又有Zoe教我，應該成績點都會進步嘅。

「下一位同學可以同家長一齊入嚟喇」負責我嗰班嘅Prefect叫我。

Miss Chu：「媽媽你好，我係張轟浩嘅班主任Miss Chu」

媽媽：「Miss你好，想問下我個仔呢個學期嘅成績點？」

Miss Chu：「佢考得好好啊，今次都係全班第二，全級嘅名次就啱啱好入到頭二十。同上學期相比中文就退步咗，不過其他成績都有進步所以就名次都升咗」

聽到Miss Chu咁講我都安心啲，起碼大部分嘅科都係有進步。

媽媽：「Miss，我想問下我個仔同第一名嗰個差距幾多？」

Miss Chu：「媽媽唔使太緊張，班第一名嗰位女同學完全係超晒班。除咗數學係全級第二之外，其餘每科都係全級第一，所以唔使特別同嗰位女同學比較。」

Zoe又會高分到咁嘅……係咪偷睇過啲試卷㗎……

Miss Chu：「不過，我有啲成績以外嘅嘢我想同媽媽你單獨傾下，要麻煩張轟浩出一出外面先」

出到外面，我又開始驚。

唔通Miss Chu信咗嗰班人嘅傳聞，同我媽媽講話我有女朋友？？？

咁我返到去一定實死無生㗎喎，點算啊。

正當我喺到苦惱嘅時候，小雲同佢媽媽行緊過嚟，成個場面即刻好尷尬。

到咗今日，我依然唔敢同小雲講嘢。

可能你哋會話我好細膽，開個口講句對唔住有幾難啫。

我可以答你哋，真係好難。

正正因為唔知道對方點諗，所以好怕會再好似上次咁講錯嘢令到佢更加嬲。

過咗冇耐媽媽就出返嚟，我亦可以離開呢個令人尷尬嘅地方。

出到學校門口，媽媽問咗我個問題。

「乜你喺學校同人相處唔到咩？」

竟然係問呢樣嘢，咁我都安心啲。

「係啊，同自己班啲同學唔係幾啱傾，不過都有一兩個朋友嘅」我回應。

「你有冇呃我㗎？？你班主任同我講話你應該有社交障礙，叫我帶你去睇醫生喎」媽媽半信半疑地說。

吓，咩鬼社交障礙，我覺得Miss Chu先係要睇醫生嗰個喎。

「佢話你淨係同隔離位讀書嗰個有一兩句傾下，仲話其他人一同你講嘢你就鬧返佢哋喎」媽媽再質疑我。

「Miss Chu亂咁講，明明係佢哋話我同搞我先囉！！」我激動地說。

「你睇下你，講兩句就發脾氣。你叫我唔信你班主任都唔得啦，淨係識讀書，其他人講你一兩句你就鬧人」

都唔知係邊個令我淨係識讀書，仲好意思話我。

我之後都冇再應佢，因為我媽媽係啲唔服輸嘅人，所以我同佢鬧交係永遠都唔會鬧得贏。 

話咁快又到暑假，真係每年都好期待！！

因為又可以好似聖誕假咁去嫲嫲屋企到住，最重要係暑假唔使温書呀！！！

每年淨係得呢一個幾月係可以完完全全唔使温書㗎咋！！！

今個暑假同以前唔同嘅地方，係我完完全全做咗個廢青。

你哋睇咗我咁耐都知啦，我根本都唔做運動嘅，跑多兩步都會喘氣。

所以咩籃球啊，足球啊，真係全部唔使預我。

以前都話有學琴呢個藉口出下街，而家？

連琴都冇得去學，所以就真係做到一連七日唔出街。

既然暑假冇嘢講，我哋下篇都係嗱嗱聲開學啦！