《再見了，還會再見嗎？》: 第17章 - 再見了

隔咗一個幾月再次返入嚟學校，好似變得有少少陌生。

我哋唔再係學校入面最後生嘅一群，班房亦由一樓升咗上二樓。

冇變嘅係學校嘅人同環境。

「德叔，一盒維他奶唔該」

「今日得你一個嘅？」德叔問我。





呢句說話令我醒起返我同小雲嘅關係。

「又唔係小息食晏，一個人都冇所謂啦」我回應。

「我上課室先喇，一陣小息同Zoe再落嚟探你啦」

雖然知道自己已經升咗做二年級，但係經過一樓嘅時候都總係會窒一窒。

望一望門口個2B牌，嗯，係呢到喇。





一打開門，係一個個熟悉嘅臉孔，佢哋都坐返兩個月前嘅位置，我都唔例外。

坐咗一陣，入嚟嘅係Choco同小雲。

相比兩個月前，睇得出佢地而家已經熟咗好多。

如果我冇同小雲鬧交，我會唔會都同佢咁熟呢？

再過一陣，Miss Chu入咗嚟，但我旁邊都係冇人。





「好耐冇見喇大家，呢個暑假過得好唔好呢〜」

冇人應佢。

「唉，冇人理我唔緊要。我有一個好消息同一個壞消息要講俾大家聽，你地想聽邊個先？」

「好嘅先啦」Choco回應。

「好消息係，我繼續係你哋嘅班主任，啫係代表你哋會有美好嘅一年」

由呢個班主任唔肯幫我嗰刻起，佢已經好乞我憎，所以呢個唔係好消息。

「壞消失係，Zoe已經離開咗我哋」

吓，唔會係死咗掛……





「我嘅意思係因為佢成績太好，所以俾學校破例調入E班嘅精英班」Miss Chu補充。

大家聽完之後都冇咩反應，除咗我。

Zoe走咗，啫係代表我喺呢班已經冇晒朋友。

「今年我決定俾你哋自己揀鍾意嘅位置坐。除非你哋俾其他老師投訴，否則我都唔會幫你哋再調位」

「大家而家可以起身揀位喇〜」

我行咗去一個靠近窗口嘅單人位坐低咗，睇嚟呢到先最適合我。

「估唔到你會坐我附近喎，張轟浩」





係Zoe個老朋友。

「哦，Hello〜」

我真係唔知點回應佢，因為佢俾我嘅印象就係不斷嘅騷擾。

唔知係咪我有幻覺，成日都覺得小雲好似望住我咁。

轉眼就到咗小息，我留咗喺課室冇落到小食部。

唔知點解冇咗Zoe一齊就冇咗落小食部嘅動力。

當我以為Zoe唔喺到嘅時候佢哋就唔會搞我，我錯喇。

「冇咗Zoe就匿喺角落頭做毒男？真係抵人哋飛咗你」嗰個女嘅過嚟串我。





「Zoe唔喺到就好喇，今年等我哋好好照〜顧〜你啦」一個佢嘅朋友搭嘴。

喺跟住落嚟嘅三日，依然咩事都冇發生。

我諗佢哋都係吹下水啫，應該冇嘢可以做嘅。

至少直到今日嘅Lunch Time前，我都係咁諗。

食完飯返到課室，我喺門口就已經見到我個筆袋，都心知不妙。

望入班房，我書包嘅嘢俾人倒到一地都係。

其他同學為咗唔好得罪佢哋，都選擇當睇唔到件事。





但係竟然有兩個人喺到幫我執緊地下嘅嘢。

我諗佢哋應該冇發現我靜靜地行緊去佢哋後面。

Choco：「日日咁執法我哋執得幾多次，佢一陣自己返嚟搞咪得囉」

小雲：「咁我哋食完嘢返嚟又冇嘢做，你咪當幫下我囉」

Choco：「唉，佢點對你啊，你仲對佢咁好」

呢個時候我決定出聲。

我：「Errr……唔該晒你哋啊」

小雲一見到我就拖埋Choco走咗。

諗極都唔明，點解小雲又要係咁避我，但係又幫我執嘢呢？

可能小雲真係太得閒啦，應該係。

執齊晒啲嘢我就坐返去自己個位，但係櫈都未坐暖就有個肥仔過嚟。

「呢幾次只係對你小懲大戒，下次我哋就唔會再留手」個肥仔一邊講一邊篤我額頭。

其實我完全唔知點解佢哋班人會係咁針對我。

我有得罪佢哋咩？

事後我有嘗試揾Miss Chu同媽媽講發生過嘅事。

但係佢哋嘅回應令到我對佢哋都好失望。

Miss Chu：「同學之間難免會有唔鍾意對方㗎啦，佢哋都係同你開下玩笑啫，唔好介意啦」

可能喺Miss Chu眼中，我只係一個成日都揾佢投訴嘅麻煩學生。

媽媽：「將來你出到社會都係咁上下㗎咋，總會有人係針對你，早啲習慣下都未嘗唔係一件好事」

而家嘅我睇返，只係見到一個想避免麻煩嘅老師同一個不顧子女嘅家長。

佢哋班人對我嘅騷擾一日比一日嚴重。

心情好嘅日子就喺我個位倒下水，心情唔好嘅日子就幫我沖下涼。

雖然係好煩好討厭，但我都漸漸習慣呢啲日子。

直到呢一日，事情終於起咗變化。

唔係一件，係兩件事。