《再見了，還會再見嗎？》: 第14章 – 招惹的禍

同Zoe坐雖然有好多好處，但亦令我惹到啲不必要嘅麻煩。

今日，佢哋又趁Zoe唔喺到嚟揾我。

男：「點呀，溝到我哋Zoe姐未？」

女：「算把啦，佢副咁嘅死樣，咪又係一條書蟲」 

男：「人哋每日都特登留低喺到陪Zoe留到6點，你話佢對Zoe冇嘢我都唔信啦」





雖然話我同Zoe係一齊留低温書，但其實我哋都係各有各戴住耳機做嘢，有唔識先再問下對方。

呃……應該話係我問佢先啱……

小雲喺呢個時候行咗過嚟。

小雲：「收聲啦你兩個，人哋同邊個一齊又關你兩件肥嘢咩事」

女：「咁又關你咩事呀八婆，一睇就知人哋個心喺邊個到啦，你只係一個乜都輸俾Zoe嘅垃圾咋」





男：「咪係囉垃圾，你二奶嚟咋」

小雲聽完佢哋講嘢開始眼濕濕，粒聲唔出就跑咗出班房。

女：「話兩句就走，果然係垃圾」

我亦都跟住追咗出去。

當我追到出去樓梯，我已經見唔到小雲嘅身影。





我憑直覺揀咗向下行，一直落到底，去到學校嘅危險品收藏庫。

呢到雖然叫做危險品收藏庫，但呢個收藏庫已經荒廢咗好多年，變咗一個擺枱枱櫈櫈嘅地方。

入面雖然唔係好大，但勝在有枱有櫈，最重要係仲有冷氣，所以我同小雲平時就係喺呢個屬於我哋嘅小天地食晏。

一打開門就見到伏喺枱面喊嘅小雲。

同當時喺實驗室一樣，我坐咗喺旁邊一直聽住同睇住小雲抽泣，但唔知可以做啲乜，淨係覺得無力感好重。

我覺得今次我點都要做啲嘢，畢竟係因我而起。

突然我有股唔知邊到嚟嘅勇氣，就咁雙手攬住咗伏喺枱喊嘅小雲。

好彩小雲冇縮開，如果唔係我都唔知以後點面對佢。





攬住咗10秒左右，小雲終於開聲講嘢。

「到底我有咩比唔上Zoe……你答我……」

一時之間問我，我都唔知要點回應。

唯有是但講啲嘢啦。

「Errr……冇啊，係運動差少少同讀書差少少啫」

我攪盡腦汁先答到佢問我嘅呢條問題。

小雲聽完我句嘢後喊得愈嚟愈犀利，





「連你都覺得我比唔上佢……」

死，我係咪講錯嘢……

「我唔係咁嘅意思呀……你除咗嗰啲嘢之外樣樣都好過佢㗎」

我一邊講一邊好似摸小動物咁掃佢個頭，希望佢心情可以平伏啲。

喺呢個細小空間內嘅時間就好似靜止咗一樣，完全唔知外面發生嘅任何事，唯一嘅聲音亦只有小雲嘅哭泣聲。

過咗唔知幾耐，小雲終於冇再喊。

「我冇嘢㗎喇，快啲返上去攞嘢走啦」

小雲企起身就捉住我隻手行出去。





「原來已經天黑」我望住個天自言自語。

「仲發夢，再唔行就俾校工鎖個書包喺課室㗎喇，快啲啦！！」小雲叫我。

上到課室，見到Zoe仍然喺自己個位温緊書。

「車仔？我仲以為你唔會返嚟添，頭先唔見咗咁耐去咗邊到啊？」Zoe問我。

「聽日先同你解釋啦，我同小雲走先喇」我回應。

「好啦 ByeBye〜」

臨走前望一望課室個鐘，原來已經6:30，媽媽7:30就返，睇嚟要快啲返去。





「我行嗰邊走喇，聽日見啦」我對小雲講。

「車仔，你可唔可以陪我行去小巴站？」小雲突然叫停我。

「行15分鐘都得嘅」我回應

同小雲一齊行嗰段路，成個氣氛好奇怪，我哋大家一句嘢都冇傾過。

「我到喇，聽日見啦」

「ByeBye〜」

睇住佢行咗上一架前往錦田嘅小巴後，我就急急腳行返去西鐵站返屋企。

第二日返到學校，我嘗試同Zoe解釋尋日發生嘅事。

我當然冇講我衝落去揾小雲之後發生嘅事，只係輕輕幾句帶過就算。

「佢哋竟然咁衰，我一陣幫你話下佢哋」Zoe有少少嬲。

「唔使啦，都過咗去」我回應。

最令我估唔到嘅，係Zoe竟然走去話佢嗰兩個朋友。

點解我會知？

因為佢哋放咗學又嚟咗揾我喇。

女：「花心仔，你竟然走去同Zoe報串，喺到離間我哋同佢嘅關係。只要一日有我哋喺到，你都唔使諗住溝Zoe」

男：「我同你講，我哋要喺呢個班房識人多過你，要你喺呢到冇晒朋友真係好易，你準備攬住你個小雲過呢年幾啦」

其實我都唔知佢哋喺到講緊乜，我咁樣算唔算係俾人恐嚇㗎？？？

原本以為佢哋只係嚟吹下水，所以我都冇為意。

點知過咗一個星期左右，發現好多同學都開始唔理我。

班上嘅同學好似分咗派別咁，十個人係佢哋嗰邊，而淨低嘅都係中立嘅人。

中立嘅人好多都係啲睇唔過眼佢哋嘅行為，但又怕同佢哋正面衝突嘅人。

聽講嗰班人熟嘅原因，係因為每晚都一齊玩嗰隻叫英雄大戰嘅電腦遊戲。

我就緊係冇玩過啦，媽媽又點會俾我喺屋企部電腦裝啲咁嘅嘢呢。

結果喺嗰日之後，佢哋就成日有意無意過嚟俾說話我聽同串下我。

內容都不外乎係叫我唔好溝Zoe啦，一係就人身攻擊下我啦，再唔係就人身攻擊下小雲。

我有試過向Miss Chu投訴㗎，但係佢竟然同我講同學仔之間要和平相處，叫我好好包容佢哋。

我聽完嘅感覺就係想即刻鬧返佢轉頭，但係一諗到我啲英文科平時分，都係算啦唉。