《再見了，還會再見嗎？》: 第13章 – 新的位置

「見你哋坐咗而家呢個位咁耐，我睇到都有啲悶喇。一陣我落去整份新嘅座位表俾你哋，放學嘅時候我上嚟幫你哋調位啦」Miss Chu對我們說。

而家嘅我其實唔係好想調位，發現朋友真係唔使多，有一兩個熟嘅就夠。

好怕調完位又要重新識人，又怕同隔離位會唔夾同冇偈傾。

「點解呢幾個月會過得咁快，唔想咁快調位啊~」小雲帶點失望地說。

「我都咁話，咁難得識到個好飯腳」我回應。





「乜我對你嚟溝淨係係個飯腳咋咩？」小雲裝作生氣。

「係…至奇啦，點睇都係好朋友多過係飯腳」

「哼，算你啦」

放學嘅鐘聲響起，Miss Chu呢個時候亦已經到咗門口。

「同學快啲執好嘢，我哋調埋個位就放學喇。」





「今次呢，我係用你哋嘅成績嚟分座位。班第一會同班第二坐，班第三會同班第四坐，如此類推。座位表我已經投影咗喺黑板，大家揾返自己個位坐低先。」

望住張座位表我呆咗，竟然係同Zoe坐。 

「估唔到又有機會同你坐喇，好開心啊」Zoe對我講。

「我都係啊，嚟緊幾個月有咩唔識都問你㗎喇，班！第！一！」

「咪玩啦，個名好難聽啊」Zoe眉頭一皺。





同Zoe坐嘅好處就係一有唔識就隨時可以問，仲要係有問必答，而且係一定會解到你明嗰種。

「Zoe，今日陳sir教呢到我唔係好聽得明啊，咩向上向下……」我一臉迷茫地問。

「哦，好易啫。你喺呢到畫個十字……」Zoe細心地解答。

唔係講笑，佢真係好鬼勁，我未試過問到一條佢唔識答嘅問題。

跟住落嚟嘅日子，我每日都係小息食嘢就揾Zoe，食晏就揾小雲，基本上都同以前差唔多。

唯一嘅唔同，就係我冇乜再同小雲一齊放學，反而會留低喺學校同Zoe温書。

每日食晏嘅時候，小雲都會問我同一條問題。

「今日你同唔同我一齊放學呀？」





而我通常嘅答案都係

「唔喇，我想留低喺學校温下書」

我留喺學校温書嘅原因好簡單，就係因為屋企已經冇咗令我想趕住返去嘅理由。

以前我返到屋企都叫做有部琴，趁屋企人未返到就可以彈下想彈嘅歌，但係而家返到去就只係一個人對住四幅牆。

所以與其一個人喺屋企温，倒不如留喺學校多個朋友俾我問下書啦。

可能心水清嘅你哋會記得，乜小雲唔係一出學校門口就同車仔唔同路咩？

原本係㗎，不過自從考試開始，唔知做乜小雲都會一齊陪我行去西鐵站搭車，但係我哋係坐相反方向。





有日食飯我終於忍唔住問。

「你前排係咪搬咗屋啊？？點解你之前放學係搭小巴，但係而家又去搭西鐵嘅。」我問小雲。

「哦……我呢排冇咩錢所以咪揀個要耐啲時間，但平啲返到屋企嘅方法囉，都係差20分鐘啫」小雲一邊講一邊口窒窒。 

點解以前嘅我會咁天真覺得佢真係為咗慳嗰一兩蚊而陪我行10分鐘去西鐵站，之後再轉小巴返屋企，唔通真係年少無知？

而家同小雲一齊放學嘅日子就只剰星期五。

因為合唱團每逢星期五放學後會有練習，小雲每次都等埋我先一齊走。

「行得未呀，阿天」我問。

「你等我抹埋部琴先啦，一陣個麻煩友又捉我去照肺㗎喇，都唔知點對多佢兩年。」





阿天講緊嘅麻煩友係負責合唱團嗰個老師。

話說第一次練習完咗，阿天就咁用塊布遮返住部琴就走。點知俾個負責老師見到，仲鬧咗佢一餐。

我哋學校嘅合唱團一玩就要玩三年，聽講係為咗保持住有一定嘅人數。傳聞係話就算家長寫信都唔俾quit，實際係點我就唔知喇，但係我暫時喺到都覺得幾開心，未諗過要quit。

「其實都唔知你等埋我做乜，一落到操場你個女朋友就已經喺到。仲要三個人一齊行去西鐵站，搞到我成個電燈膽咁，尷尬到不得了」阿天一臉不願意地說。

「都話唔係女朋友，講極你都唔明。大家順路咪一齊行囉，多啲人行開心啲嘛。更何況我行嘅時候明明同你兩個都有傾偈，又唔係冇理你。」

「條女擺到明淨係想同你放學啦……我地個合唱團個練習時間又唔定嘅，一時1個鐘，一時又2個鐘。條女咁都肯等你，一係就傻，一係就對你有嘢。」

「咁我估佢應該係傻」我回應。





當我哋仲喺樓梯，就已經望到喺小食部啲枱温書嘅小雲。

「你睇下，都話佢又喺到㗎啦」阿天搖頭嘆氣。

「咁人哋真係諗住等埋我哋一齊放學嘛」

「小雲，行得喇〜」

唔知係咪我錯覺，身邊好似愈來愈多人覺得小雲係我女朋友，但其實我對佢真係冇感覺，只係好好嘅朋友。

況且喺呢個年紀就拍拖真係太細個喇，都係等我上到大學再算啦。