《再見了，還會再見嗎？》: 第3章 – 不平凡的開始
~九月二日~
終於到咗第一個上課日。
「Good Morning，冇返嘅同學仔舉個手嚟睇下先」
「Miss Chu，小雲冇返啊」我舉手說。
「Oh，佢屋企有啲事，第一節小息後就會返㗎啦」Miss Chu回應我。
處理完班務，Miss Chu 同我哋傾咗一陣計，又講咗啲老師嘅八卦嘢。
「其實呢個Miss都唔係咁衰啫，只係一個老嘅八婆」我心想。
「上到嚟一時間啲嘢變晒英文，有冇覺得唔慣啊？有咩適應唔到記得話我知喇同學仔」Miss Chu 對我們說。
鈴~ 鈴鈴~
「哎唷，咁快就打鐘嘅，仲諗住講多兩句添，你哋嘅第一堂應該係… Errr…等我睇下先」
「數學啊 Miss Chu」後排一個肥仔大叫。
「咁我走先喇，陳sir到咗外面，我哋一陣英文堂再見啦」
Miss Chu 一走，
外面個黑口黑面阿sir就行咗入嚟。
「我介紹自己先。我係Mr Chan，喺嚟緊呢兩年都會教你哋數學。可能有啲同學都已經知喇，我係負責你哋級嘅訓導主任。只要大家乖乖地，保證大家會有最開心嘅兩年數學堂。」
望住佢副咁嘅嘴臉嚟上堂，邊有人會開心啊... ...
唉，喺而家嘅我又點會諗到，呢個數學老師將會改變我嘅人生 。
可以話係拯救咗我，又或者可以話係令我揾到人生嘅道路 。
多謝你，陳sir 。
完咗數學堂就到小息，梗係即刻衝落去小食部買盒維他奶啦。
話說小弟真係好鍾意飲維他奶，飲少一日都好似身痕咁。
「唔該，想要盒維他奶」
「德叔，唔該要份炒米粉啊」
把聲咁熟嘅？
「同學仔等一陣啊，我入去攞俾你哋」
「你又會咁快落咗嚟嘅？」我問Zoe。
「我今朝趕住出門口冇食到早餐啊，所以咪急急腳落嚟買嘢食囉。死伙，冇帶錢落嚟添…」
「同學仔，拎嘢喇」
「唔緊要啦，我幫你俾住先，你上去先還返俾我啦」我對Zoe講。
「唔該晒你啊 車仔」
Zoe雙手合十咁講，搞到我有啲唔好意思。
「咁快就飲晒盒維他奶嘅你，啱啱先俾完錢咋喎」
「好口渴啊我頭先。仲唔食個米粉，係咪想我幫你食埋呢」
「我想坐低先食嘛，你可唔可以等我食埋個米粉先上去啊，我唔想自己一個坐喺到」
「見係你我先坐多陣咋」我不情願地說。
我哋喺有蓋操場傾咗陣偈，坐到打鐘就一齊行返課室。
一行到課室門口就撞到Zoe嗰兩個朋友。
「開學第一日就想溝我哋Zoe喇，咁快手啊」
個男仔出晒奶力咁嗌俾全班聽，驚死冇人知咁。
「wow~~ 」班上突然有一陣歡呼聲。
「你地呢到咩事，點解啱啱咁嘈，同埋個個都企晒起身㗎？」又有個唔識嘅阿sir企咗喺門口。
全班靜晒，真係連一粒聲都冇。
「我哋而家排隊上實驗室，上到去唔該跟返你哋喺課室嘅位坐，同埋唔好亂咁搞周圍嘅嘢」
問心講，實驗室真係冇咩特別，除咗附近多幾個洗手盆同幾個連住張枱嘅火機之外，同課室根本就一鬼樣。
上上下堂嘅時候，小雲突然好奇怪…
「車仔，你試過最唔開心嘅事係咩啊」小雲聲音帶點奇怪咁問我。
「等我諗下先… 應該係媽媽因為成績唔好而鬧我」
講完之後我望一望佢。
「你做咩畫花本書呀！！」我大叫。
「我覺得好唔開心，但係冇嘢可以做到」小雲愈哭愈大聲。
望住小雲嘅眼淚一滴一滴咁流落嚟，但係我就咩都幫唔到手。
「不如你話俾我知咩事，睇下我幫唔幫到你啦」我不知所措地說。
講完，我拎咗張紙巾遞俾小雲。
「我爸爸…尋晚…死咗」小雲斷斷續續地說。
呢個答案完全喺我預料之外... 都係上埋呢堂先再傾好啲。
「Um... ... 不如你伏低休息下先，仲有15分鐘落堂，一陣Lunch Time一齊食啦」
「嗯」
落堂後，我哋好快就落咗操場霸位食晏。
「你想食咩啊，我幫你買埋啦」我問。
「同你一樣就得」
過咗5分鐘，我捧住兩個餐行返過去。
「有冇好啲啊？」坐低之後我問佢。
「嗯，好過頭先。但係都仲係好辛苦，個心好似嗱住嗱住咁」小雲雙眼依然帶有一點淚光。
「其實我已經好耐冇見過爸爸，佢平時係喺大陸返工，得大時大節先會返嚟屋企探下我哋，喺屋企住幾日㗎咋......」
小雲眼濕濕咁將尋晚發生嘅事逐一話我知。
「......今朝我一起身又再喊過。其實我真係冇心情返學，但係家姐話佢請唔到假陪我，於是我就逼住要返嚟......」
「你之後唔好再喊喇，有咩都可以揾我傾㗎」我安慰她說。
「多謝你啊，不過我自己都控制唔到自己喊，真係從未試過咁唔開心，個心好痛但係又冇嘢可以做到」 小雲雙眼仍然紅腫。
「唔好諗啦，我其實每日都好唔開心，但係……」我回應。
傾多半個鐘之後，我哋就返咗課室上埋最後兩堂。
坐車返屋企期間，一直諗住今日發生過嘅事。
「點解第一日返學就咁多災多難㗎。唉，都係快啲返去做埋啲功課，費事又俾媽媽鬧」
食完晚飯我又走返入房。
「做好功課未啊，搞掂就快啲預習聽日啲書喇」媽媽問我。
「俾我休息多一陣先得唔得啊？」我回應。
我問完之後，媽媽就開咗我房門。
「第一日返學就想偷懶？今晚瞓覺咪有得俾你休息，快啲熄電視做嘢」