《再見了，還會再見嗎？》: 第2章 – 結緣

仲記得我第一日正式著住校服踏入中學嗰日，

唔係九月一號，而係八月二十八號。

因為中一嘅新生全部都要參加一連兩日嘅迎新活動。

「希望一陣可以識到新朋友啦。」我心想。

其實原本我可以直升上去小學嘅一間直屬中學，不過前兩個月有一日我偷聽到媽媽同爸爸喺房鬧交…





媽：「入咩直屬中學啫，間嘢得Band 2咋。以你個仔咁聰明，一定可以去敲門入到好啲嗰間囉」

爸：「雖然兩間學校係同區啫，但係你有冇諗過佢每日要早多45分鐘起身返學係幾咁辛苦，仲要冇晒班原本識嘅朋友。。。」

呢個咁嘅情況喺我屋企持續咗3日，真係嘈到我每晚想安心瞓都唔得

講真，其實我唔係好介意去邊間學校讀，

不過為咗令屋企有一日安寧





我：「媽媽，其實我想試下去嗰間學校敲門，你話好唔好？」

媽：「緊係好啦車仔，行啦，我哋而家即刻去報名敲門」

點知又真係咁好彩，60個揀5個都揀得中我，所以就入咗而家呢間學校喇。

一行入學校，好多哥哥姐姐出嚟歡迎我，又派file俾我。

跟住佢地行咗一陣就到咗我嘅班房 – 1B班。





因為唔知坐邊到，所以就揀咗第一排最近門口嘅位，快快手手就坐低咗。

望住班入面嘅人，全部都好陌生，

但係佢地全部都有講有笑，好似原本就已經識對方咁，搞到我都唔敢過去。

過咗15分鐘左右，我附近依然冇人，

但係全個班房就只有我附近嘅位係冇人，

唔通我成個中一都要咁樣過？？？

喺我因為覺得唔開心而伏低咗嘅時候，我隱弱聽到好似有人問我嘢。

「Hello ~ 我叫盧素兒啊，想問下你附近嗰幾個位有冇人坐㗎？」





「冇啊，你哋坐啦」

然後兩女一男就坐咗喺我附近。

眼前嘅呢個女仔一睇就知係做開運動，一身健康嘅古銅色皮膚。

除此之外，啱啱嗰下有陽光照一照，睇到佢嘅頭髮顏色好特別，係介乎黑同深啡之間。

相反，佢嗰兩個朋友都係「重量級」人馬，一睇就知係十年都唔郁一下嗰啲款。

「你叫咩名啊？」盧素兒突然問我。 

係我識朋友嘅機會喇，一定要積極啲先得！！





「我叫張轟浩啊，通常啲朋友都叫我做車仔」

「咁我以後叫你做車仔啦，你都可以叫我做Zoe㗎。唔知點解，我覺得我哋一定會做到好好嘅朋友。 喂喂，你哋兩個都介紹下自己」

「唔使啦，我識你哋兩個咪夠囉」女的說。

「咪係囉，使乜搞咁多嘢」男的回應。

聽到佢哋咁講，我嘅熱情之火好似即刻俾人淋熄咗大半。

呢個時候有個老師入咗嚟，睇佢個樣就已經知係啲40歲都未結婚嘅惡毒巫婆。

「同學仔，專心返嚟呢到先。我係你哋嘅班主任Miss Chu，大家可以喺3樓嘅A教員室揾到我，咁我嘅簿櫃就喺……」

一大段又長又悶嘅介紹搞到我都瞓咗一陣，都唔知遲啲上佢堂點捱，一聽到佢把聲就好眼瞓喇。





「相信大家都知道點解你地會被入呢班啦，希望你哋可以學好啲中文，然後喺中三轉去一個好班讀書啦」

話說我哋喺上個月中要返嚟考個分班試。

最高分嗰60個就隨機分入兩班精英班。

如果中文/英文係唔合格嘅話，就分別一定要入B班同C班。

而淨返嘅人就全部都係D班。

「同學仔快啲過嚟喇，我哋搞掂咗排隊個位先」

過咗5分鐘左右，





「好喇，大家記住而家前前後後嘅入，以後就咁樣排隊㗎啦。而家順住，一男一女咁一對入班房，然後由最前排左至右開始兩個兩個坐」

「希望可以同Zoe一齊坐啦」我心想

當然啦，世事邊有咁理想，

坐喺我隔離嘅係一個有條小馬尾嘅女仔，

樣就一般般，白白淨淨咁啦。

望到佢副阿婆style嘅眼鏡…

我都幾肯定佢係讀書型…

今次我決定要主動啲識朋友

「Hi ~ 我係車仔啊，你叫咩名啊？」

「我叫小雲啊，嚟緊三個月坐隔離多多關照啦」

「客咩氣，你關照下我就真啦」

呢兩日迎新日都咪話唔悶，除咗處理班務，就係玩埋啲識唔到朋友嘅破冰遊戲。

搞咗兩日都淨係識到Zoe同小雲，開始想放棄識人喇。

相反望下Zoe，已經成個親善大使咁，行到去邊都有人傾到計，真係好令人羨慕。

我都想好似佢咁啊！！！

如果以前小學嘅朋友都喺到就好喇。