《再見了，還會再見嗎？》: 第4章 – 報名
無驚無險又到Happy Friday~
「呢條數我唔識計啊，你可唔可以教下我」旁邊嘅小雲問我。
「我借我嗰本俾你睇啦，你做完之後順便幫我交埋」
我將功課簿遞俾小雲。
「點解你用紅色同紫色嘅原子筆做嘅？」小雲驚訝地說。
「你唔覺咁樣清晰啲咩？題號用紫色，然後題目用紅色嚟做」我自豪地說。
「得唔得㗎你咁樣，因住俾陳sir留你堂啊」小雲擔心地說。
「怕咩啫，我條條都做齊，做完就幫我拎去交啦」
「好啦，你話點就點」
小雲交完功課就行返嚟。
「係呢，你有冇諗住玩課外活動？我想揾啲嘢玩，但諗唔到join咩好」
「我應該會玩Choir啊，啫係合唱團，因為小學嗰陣已經有玩開」我回應。
「咁犀利，但係好似要篩選過先入得㗎喎」
「我諗我應該ok嘅」
其實我喺小學已經唱咗6年，又點會唔ok喎。
「我唱歌麻麻咋，都係唔跟你喇，哈哈」
「等我再諗下玩咩好先…」小雲揸住張紙自言自語。
「小雲，我想休息一陣，如果一陣Miss Chu嚟到就叫醒我啦」
過咗一陣
「起身喇車仔」小雲拍一拍我。
「…就入到㗎啦。係啵，今個月尾就係Sports Day喇，大家有冇咩想玩嘅嘢呢？」Miss Chu對我們說。
「緊係跳遠啦，落場跳30秒然後等俾人DQ就搞掂」
「咁冇大志㗎，俾我就一定跑3000米，試下都好嘛」
附近嘅同學都好熱烈咁回應Miss Chu。
「靜少少先大家，聽我講啲嘢。由今年開始，每個同學喺陸運會都要“一人一職”，啫係點都要起碼做運動員或者服務生。記得喺下星期三之前入返內聯網報名啊」
「死啦，我運動白痴嚟，一齊上網報名做服務生啦」我搖著小雲的手說。
「唔好搖我啦，最多我報少一項比賽，然後陪你做helper」小雲一手fing開我。
「Yeah 有你陪我，咁到時有人一齊傾下偈都冇咁悶啊」
「咁放學之後一齊去電腦室報啦」
鈴~ 鈴鈴~
「行啦車仔，落電腦室報名喇」小雲同我講。
「好好好，等我抄埋今日要做嘅功課落手冊先」
過咗一陣
「搞掂，行得」
入到電腦室，我哋坐咗喺後排嘅角落頭。
「哎呀，內聯網個密碼係咩啊？我一次都未入過」我問小雲。
「你今朝有冇聽Miss Chu講㗎，上面係你個學生編號，然後下面係你身分證頭6個數字嘛，傻仔」
「咩喎，明明今朝係你太遲叫醒我先搞到我聽唔到」我裝作生氣。
「咁我唔記得你瞓緊嘛……係呢，你想揀邊個位置做helper啊」小雲無奈地說。
「有冇啲位係唔使曬太陽，又冇咩做㗎」我問小雲。
「邊有咁好嘅位㗎，有都俾人揀晒啦。唉，我報咗跳遠先，你慢慢諗」
啲職位名真係花多眼亂，仲要個個都古古怪怪，咩“壘球收集員”，咪啫係執波仔，都唔知做乜要搞到個名咁長。
「小雲，我揀好啦，決定去做“釘分板專員”」
「仲以為你會揀有冷氣嘅司令台嚟做添」
「呢啲嘢咪搞我，講到口水都乾都未放得學啦，何況我講嘢又一舊舊」
「你都叫講嘢一舊舊？？？咁我應該係啞人啦！！」
「係啵，你使唔使順便報埋合唱團啊？反正都開咗電腦」
「唔使上網報㗎，今日見到poster話下下星期去音樂室試音就ok」
「哦，咁一齊走啦我哋」
正當我哋行到門口，Zoe都嚟咗電腦室。
我：「Zoe ~~ 點解你又會落嚟嘅」
Zoe：「我落嚟報陸運會啊，你哋又喺到嘅？」
我：「我哋都係報Sports Day啊，啱啱先搞掂。你諗住做邊個位嘅helper啊？」
Zoe：「唔係啊，我諗住報100米，壘球同跳遠」
我：「報咁多嘅，攰死你呀」
小雲：「不如走啦，我想快啲返屋企陪下媽媽」
我：「好啦，咁我同小雲走先喇，ByeBye~」
Zoe：「ByeBye~~」
我同小雲一出學校門口就分開咗行，因為我係去西鐵站，但佢好似係去坐小巴返屋企。
我一返到屋企就好似平時咁盡快做完啲功課，然後就開始温習。
大約7點幾爸爸就同媽媽拎住外賣返嚟。
媽：「做晒功課未，有冇話測驗幾時呀？」
我：「做完啦，下下個星期五有數學第一課測驗，我温緊書㗎啦」
媽：「記住一定要考好啲呀，過咗嚟食飯先，食完先再温」
喺食飯途中我一粒聲都冇出，因為其實我唔係好鍾意我屋企。
爸：「你唔好俾咁大壓力個仔啦，佢讀書都好辛苦㗎」
媽：「我哋當年仲辛苦啦，佢而家呢啲算得係咩。更何況間學校係佢自己揀，冇人逼佢㗎，啫係證明佢自己都想成績好啲，想入到大學啊」
爸：「喺個仔面前唔想同你拗」
媽：「唔好話我話你，你根本就係駁唔到」
跟住爸爸成餐飯都冇出過聲，一食完就坐咗喺沙發睇電視。
我食完飯做乜？
緊係返入房温書啦
10點鐘左右，爸爸入咗嚟我間房
爸：「啱啱食飯有冇嚇親你啊」
我：「冇，平時都係咁上下啫」
爸：「你要明白媽媽都係為你好先咁惡。今晚早啲抖啦，聽日星期六你仲要去學琴」
我：「我會㗎啦」
呼，終於到星期六可以休息下喇。