《伙記唔該落單》: 第八章「莫名其妙」

自從嗰日見返銘仔，總係覺得有啲唔對路。

可能真係驚佢再搵人劈我，但係過咁咗多年，佢唔會仲記喺心入面掛。

「嫻姐，雄哥。」

又係星期三，所以我十二點半準時返到鋪頭。

「喂杰少。」





「子彈呢？」

「喺出面食緊煙。」

午市都走出去煙，真係夠薑，雖然我都會。

於是我換咗件衫，趁未係好多客嘅時候，就出去搵子彈食煙。

「喂。」





「喂。」

子彈吸咗口煙，就同我講。

「早兩日你冇返嗰陣，嗰三條𡃁妹又嚟咗。」

「係？咁好彩我冇返。」我點起煙講。

諗返起嗰日嗰個沛霖，真係串過馬撚。





「不過呢，嗰日同你嘈嗰條女，好似...」

「好似？」我望一望子彈。

「好似有啲唔同咗。」子彈呼住煙咁講。

「你唔係想講，佢變返冇咁串掛。」

子彈嚇咗嚇，就搭住我問。

「你點知架？」

「屌啦，我鳩嗡咋，原來係真架？」

「係呀好奇怪，完全變咗第二個人。」





我聳一聳肩。

「咁可能我唔喺度啫。」我笑住咁講。

「入去喇，有客。」子彈拍一拍我。

我整熄咗個煙頭就入返去。

大約二十分鐘之後，開始多客。

當我背住門口執緊枱嘅時候，門外傳嚟一把聲。

「唔該....有冇三位呀？」





「有...等等。」

咦，咪住，把聲咁熟嘅喂。

我一擰轉身，就見到沛霖佢哋三個。

本來我想叫子彈帶佢哋入嚟坐，但我最近門口，又冇理由特登咁樣叫佢，俾嫻姐見到嘅話好似唔係咁好。

於是，我唯有自己嚟啦。

「三位...呢度坐。」

呢個時候我個樣絕對就唔係西嘅，但係十足十一副「乜又係你呀陳生？」咁嘅樣囉。

總之就係好無奈咁嘅樣。





佢哋坐低咗之後，好快就叫我寫嘢。

「杰少！我哋想食嘢！」好似叫敏怡。

「係...食啲咩...」我耷低頭，等佢哋落單。

「做咩...今日唔望住我嘅！」沛霖？

我抬高頭，發現沛霖今日個氣場完全唔同曬。

佢微笑住咁望實我，佢仲有啲面紅。

發生咗咩事。





會唔會又係諗住串鳩我，所以先扮曬正常。

「你哋..究竟食咩啫...」

「係咪食咩都得先！」敏怡拍一拍我大脾話。

屌，嚇到我打咗個冷震。

「餐牌有咩咪可以食咩囉...」

「哎呀我好肚餓呀..嗌得嘢食未呀..」佢好似叫嘉瑩。

「哈哈，我哋都係叫嘢食先。」敏怡話。

「我同嘉瑩要C餐！兩杯熱檸水！」

我寫完佢兩個個餐之後再抬高頭，發現呢個時候沛霖竟然雙手托住下巴眼甘甘咁望住我。

放心，我唔係嗰啲俾女仔望住就會面紅嘅人嚟，最多就係唔望佢。

「喂，點呀...你究竟食咩呀姐姐。」我unun腳，望住牆上面個鐘問。

「D.......餐～飲凍檸水～」嘩把死人聲仲突然咁鬼嗲，係咪想嚇死阿叔。

我寫完就拿拿聲走人俾張單雄哥，呢個時候子彈就過嚟同我講。

「係咪呀，都話佢唔同咗架啦。」

我再望一望沛霖。

喂，做乜仲係眼甘甘咁望住我啫。

係咪我塊面有啲咩核突嘢。