《伙記唔該落單》: 第七章「身世」

琴日同今日我都要返工，而且全日都好忙，你知啦星期六日啲打工仔放假，瞓醒先會落街食嘢，基本上每個鐘都有一批新客入嚟。

「四位，好呀呢邊呀。」

「三位..三位要等等喎。」

「杰少！牛腩飯走汁呀。」

「嚟嚟嚟。」





「伙記我個雲吞麵呢？」

「即到即到！」

你睇下，真係做到踢曬腳。

終於做到晏就五點幾，啲客開始走得七七八八，我先得閒出去食枝煙。

「呼，好撚攰。」





「喂杰少，點呀。」子彈都出咗嚟。

我瞄一瞄入面，見到得返兩三個客。

「做到手都跛。」

我fing一fing隻手，又吸咗啖煙。

突然，我見到左手邊有三個著住黑色衫嘅人行緊過嚟，而且佢哋好熟口面。





佢哋一路行過，一路望住我。

「咦....喂，嗰個係咪杰少嚟。」
「睇真啲...嘩真係佢嚟喎。」
「做侍應咁折墮呀。」

我冇理到佢哋，繼續食煙。

但坦白講，我有啲驚。

等佢哋三個走咗之後，子彈就問我。

「頭先中間嗰...好似..叫銘仔？」

我呆咗呆，搞到唔小心跌咗枝煙，就再拎多枝出嚟。





「係呀，隔離嗰兩個係佢頭馬，左邊金毛嗰個叫傻豹，四二六嚟。」

「右邊個肥仔叫膠水，佢老豆係柳記嚟，黑白通吃，所以基本上呢三條友橫行成個新界東。」

子彈知我以前行古惑，所以我唔介意同佢講，況且聽講子彈舊時都做過古惑仔。

「呼，但係你又會識佢？」我問。

子彈望咗一望附近，確定安全之後就同我講。

「以前我同銘仔都係同一個字頭。」

奇怪，但係我以前冇見過子彈喎。





「嘶.....呼......即係..你以前...」

「嗯。」子彈點點頭，就踩熄咗枝煙。

「但佢唔認得你嘅？」我問。

「冇啦，我以前係四九仔嚟咋，冇咩地位，好少跟大隊做嘢，多數做天文台。」

哦，原來負責睇水，怪唔之得未見過子彈啦，於是我點點頭，之後就講。

「都係，銘仔上位上得咁快，咪又係靠賣假藥起家，加上早幾年街上面啲黑腳邊有而加咁多，做嘢梗係易啲。」

我都食完煙，就掉落地下踩熄佢。

「咁海底仲有冇你名？」我問子彈。





「應該冇掛，我撈返正行好耐，哈哈。」

我點點頭。

「喂，但你知得咁清楚嘅？」子彈問我。

我笑咗笑，估唔到居然有一日要講返出嚟。

「以前我同銘仔係同一個社團，但係我哋唔同字頭，有次我哋兩個字頭一齊做嘢，嗰陣就見到銘仔。」

「做嘢嘅次數多咗，自然有返幾句，後來又識埋傻豹同膠水，咪知道佢哋啲嘢。」

「點解佢頭先見到你好似好憎你咁樣？」





「因為有一次，銘仔條女都喺度。」

「哦，跟住你就勾二嫂。」

「屌梗係唔係，銘仔條女嗒我糖呀嘛，就主動搭住咗我，之後咪俾銘仔見到。」

「後來銘仔仲諗住買起我一隻手，好彩我之後就入咗男童院，先避咗。」

「估唔到入男童院都可以係一件好事，哈哈。」子彈拍一拍我。

「入去啦，有客。」