《伙記唔該落單》: 第四章「口角」

又到咗忙碌嘅午市，不過暫時唔算太多人，突然我見門口企住幾個著校服嘅女仔，我就行咗過去。

「幾位呀，入嚟坐啦。」

「三位。」其中一個女仔講。

佢哋入咗嚟之後，就坐咗喺張圓枱開始睇menu，我就繼續做嘢。

突然，子彈行咗埋嚟，就話。





「杰少，點睇呀。」

「咩點睇。」

完全唔知佢嗡乜鳩。

「啲學生妹呀，覺得邊個最正。」

我望一望佢地，啲樣都算唔錯，但係冇邊個話特別吸引囉。





「唔該！寫嘢！」其中一個女仔望住我揮手，於是我就行埋去。

「點呀食啲咩。」

「A餐，熱檸水。」
「兩個A餐！我飲熱檸茶。」

天口咁興仲飲熱嘢，真係佩服佢哋，不過女仔係鍾意飲熱嘢，飲得多凍嘢會好易肥。

「我要B餐，飲.........」





「伙記！寫嘢！」呢個時候一個中年呀叔舉手叫人寫嘢，但子彈同嫻姐都落緊單，暫時唔得閒住。

「杰少！幫手去寫嘢！」雄哥喺廚房嗌出嚟。

我望一望眼前呢個仲喺度諗緊飲咩嘅女學生。

「點呀飲咩呀姐姐仔。」我有啲唔耐煩。

呢個學生妹本來睇緊menu，突然抬起頭用不屑嘅眼神望住我。

「喂，而加係咪諗下都唔俾呀？」

呢個女仔眼大大，皮膚又幾白滑，頭髮長度啱啱好過膊頭，身材仲幾好添。





但係估唔到佢咁鬼串嘴。

「妹妹，你係咪諗定先落單會好啲呢？」我垂低寫緊單嘅手，有啲無奈咁望住佢。

「咁我突然又想飲其他呀嘛。」佢皺起眉頭。

呢個時候我感覺到成間鋪啲人都望曬過嚟，就連嫻姐同子彈都係。

「咁你諗好飲咩未呢？」我叉住腰話。

「凍檸水呀，唔！該！」佢仲要睥一睥我，我真係頂佢個肺。

於是我反咗下白眼就行開咗。

喺我俾張單雄哥嘅同時，見到嗰三個學生妹喺度陰陰嘴笑，唔知笑乜春。





「點呀杰少，起痰呀？」

「收嗲啦你，條女咁臭串。」

「講串邊個夠你嚟。」子彈笑笑口話。

我睥一睥子彈，佢就走開咗。

「兩個A餐。」

「唔該靚仔。」另外嗰兩個妹妹笑住咁同我講，係得啱啱串串貢嗰條女冇理我。

「B餐。」





「唔該你喎，呀靚仔哥哥。」

呀屌你係唔係咁串嘴。

「望咩呀望，未見過靚女呀？」

「洗唔洗行近少少望呀？」

我激到差啲爆血管，如果唔係今日心情好，已經成碗湯淋咗落條女度。

「喂呀沛霖...唔好玩人啦...」

「見佢幾靚仔，就放過佢啦！」

拿，呢啲就係人話喇。





「你睇下你兩個靚女friend，幾識貨。」我望住呢個好似係叫沛霖嘅女仔講。

「你......！.....哼！」佢面都紅曬，就擰轉頭唔理我。

我就笑笑口咁行開咗。

「喂杰少...仲話..」

「得喇收皮，我知你想講咩。」

子彈見我咁講，聳一聳膊頭就行開。

過咗陣我就去咗收銀，咁啱嗰幾個學生妹又食完嘢，行咗過嚟埋單。

「一百四十七。」我望一望張單。

我諗住佢地俾完錢就會走，點知佢哋無啦啦同我講嘢。

「靚仔，你叫咩名呀？我叫敏怡！佢叫嘉瑩！」呢個女仔個樣幾成熟，有啲大家姐feel。

我望一望嫻姐，佢竟然喺度偷笑。

「關你咩事。」我耷低頭講。

「車，以為自己係邊個。」呢個時候沛霖好唔gur咁講，之後就拉走咗佢兩個女仔friend。

「佢叫杰少呀！！」子彈大叫。

「喔？杰少呀？咁mk嘅哈哈。」沛霖仲特登喺門口望一望我。

子彈你個仆街。