《伙記唔該落單》: 第五章「溫暖」

收工之後我就去買餸返去煮飯，買完餸返到屋企，見到婆婆坐喺梳化睇緊電視，我又開心返少少，今日差啲俾嗰個學生妹激死。

「婆婆，我返嚟喇。」

「乖孫...攰唔攰呀..」

「唔攰呀，肚唔肚餓？我煮嘢你食。」

「好呀...」





半個鐘多啲，我就煮咗煲粥，淥咗啲菜同蒸咗條魚，簡簡單單。

我夾咗舊冇骨嘅魚肉俾婆婆，費事佢哽親，老人家俾魚骨哽到會好大鑊。

「真係乖....」婆婆笑住咁話。

「快啲食啦！唔係就凍曬。」

食食下，婆婆問起我返工啲嘢。





「乖孫，今日辛唔辛苦呀...」

「唔辛苦呀！」我掃一掃婆婆嘅背脊。

「哦..咁就好...」

婆婆真係好錫我。

「不過今日嚟咗個好衰嘅妹妹。」





「係呀..有冇激親你呀..」

「少少啦哈哈！但冇事嘅！」

「嗯...」

望住婆婆慢慢食粥個樣，有啲感觸。

食完嘢，婆婆沖咗個涼，睇咗陣電視劇就瞓咗教，我喺個大木櫃下面拎咗本相簿出嚟。

入面有一張我同婆婆一齊影嘅相。

張相係細個婆婆喺大陸湊我嗰陣，喺祖屋影嘅相，我到而加都keep住。

以前我好百厭，成日扭計，但係婆婆都冇嫌棄過我，仲對我好好，周圍帶我去玩。





嗰陣我同婆婆兩個人住喺祖屋，因為呀爸呀媽要落香港搵食，就擺低咗我喺大陸。

試過有一晚我瞓唔著，扭計要去表哥屋企玩。

嗰陣已經夜晚十一點幾。

「杰仔，而加好夜架喇。」

「瞓教先好唔好？」

「聽日再帶你去玩。」

婆婆慈祥咁望住我講。





而我嗰陣好調皮。

「唔要呀！我要去表哥到！」

婆婆見我咁樣，就出咗廳。

過咗陣，婆婆拎咗本畫簿同幾枝顏色筆入房，仲喺雪櫃拎咗罐汽水俾我飲。

「你畫下公仔先，攰就去瞓啦。」

見冇得去表哥度，我就開始畫畫，我以為婆婆會一個人去瞓教先，點知冇。

婆婆坐喺床邊，望住我畫畫。

佢一路望住我。





當我飲曬罐汽水，婆婆又會出去拎一罐入嚟。

直到朝早六點，我都冇瞓過教。

婆婆都係。

「六點喇！係咪可以去表哥度！」

細路哥只要有得玩，就會好精神。

婆婆咩都冇講，就帶咗我出去搭車去表哥度。

我望住瞓緊教嘅婆婆。





諗返起嗰陣原來佢係咁錫我。

所以我而加真係好錫好錫佢。

可以嘅話我寧願將所有時間拎嚟陪婆婆。

「又喊，我真係廢。」

每次諗返起同婆婆嘅經歷都忍唔住流馬尿。