《伙記唔該落單》: 第三章「家人」

啱啱開門，就見到婆婆坐喺梳化睇電視，仲睇到笑騎騎。

婆婆唔算高，瘦瘦地，又有啲駝背，好彩嘅係佢身體冇咩大問題，只係記性有時唔太好，不過都七十幾歲，算係咁架喇。

「婆婆，睇緊咩呀。」

「乖孫..返黎拿..」

「係呀，肚唔肚餓呀，食嘢先啦。」





通常我收八點嘅話就會喺鋪頭拎少少餸飯返嚟同婆婆一齊食，如果收六點我就會去街市買餸煮飯，始終自己煮嘅點都好食啲。

「哦..今日有咩食呀..」

我擺低袋就去扶起婆婆去飯枱坐，婆婆唔係行唔到，只係我想扶住佢，每次捉住婆婆隻手，我都覺得好溫馨。

「蝦肉雲吞同豆腐，仲有白菜。」

「喔..真係乖...」





我同婆婆住公屋，二百幾呎，唔係大但勝在夠溫暖，同埋夠住就得啦，兩個人洗咩住大屋。

「慢慢食呀。」我掃一掃婆婆背脊，等佢舒服啲。

食完飯，我攤喺梳化睇電視，婆婆就去咗沖涼，之後同我睇咗陣電視就上床瞓教，老人家十點幾瞓，差唔多架喇。

婆婆瞓碌架床，我就瞓梳化，早兩個月我買咗新枕頭同床褥比佢，好瞓啲嘛。

「唉，又要做assignment。」





真係變態，開咗sem先半個月。

我喺書包拎部舊到仆街嘅三星notebook出嚟，坐喺梳化開始做嘢。

做到一半煙癮起，就出咗後樓梯食煙，食完入屋睇一睇婆婆，見到佢瞓得好舒服，我就繼續埋頭苦幹。

做下做下，一個唔覺意就瞓著咗。

第二朝醒返嗰陣，睇一睇碌架床，發現婆婆已經起咗身，我身上仲多咗張被。

我見佢枝拐杖同對涼鞋唔喺度，就知婆婆去咗晨運，雖然婆婆行得有啲慢，但佢都堅持每朝落街散下步，都好嘅，做下運動個人都健康啲，邊似得我咁懶。

我梳洗下之後就換衫，因為今日唔洗上堂，所以我就返工，喺屋企行去鋪頭大約五分鐘，其實行路仲快過搭的士。

臨出門前我放低咗二百蚊比婆婆，等佢買下嘢食，我唔喺度而得返佢一個人喺屋企嘅時候，婆婆會去樓下間粥鋪買粥食。





行返鋪頭嘅途中，只係見到一堆西裝友同阿嬸，冇曬著校服嘅朋友，因為都成九點半，如果呢個時候仲見到佢地，即係班學生哥已經遲大到。

「喂子彈。」

「杰少早晨。」唔知點解子彈次次都早過我返到，明明我已經好早出門。

「嫻姐，雄哥。」

「早晨呀杰少。」

「食咗早餐未呀，未嘅話叫雄哥煮碗麵你食啦。」

「唔洗啦嫻姐..我都唔肚餓。」





嫻姐笑咗笑，就繼續做嘢。

做完早餐就到午市，又要忙到甩轆。