《伙記唔該落單》: 第二章「食客」

「雲吞麵。」

「唔該。」

雖則話我係古惑仔，咁但係聽到啲客會講聲唔該其實都幾開心。

「寫嘢。」

「食咩呀哥仔。」





可能係我嘅語氣唔太討佢喜歡，呢位肥仔哥哥開始西西地面。

「要個豬頸肉菜飯，飲凍檸茶多甜。」

三秒之後我就寫好張單，準備拎比雄哥，點鬼知佢又突然叫停咗我。

「喂都係唔好，飲凍奶茶多奶少冰。」

「少啲冰呀。」





麻鳩煩，比幾十蚊當自己係皇帝咩。

「唔該雄哥。」我遞咗張單比雄哥，係架我對住鋪頭啲人係有禮貌啲，話曬都識咗咁耐，佢地又好人，咪好聲好氣囉。

但你叫我對住啲西客講禮貌，就真係未必得，話曬我由細到大都群住班黑社會，係粗聲粗氣架喇，唔通我同個客講。

「你好呀先生，今日想食啲咩咁呢。」

基本上冇可能。





可能嫻姐見我躁躁地，就望一望我，示意我唔好嬲，我都係咁易點個頭就算。

「哥哥，凍奶茶多奶少冰。」嫻姐好快就沖好杯凍奶茶比個客。

「杰少，豬頸肉菜飯。」十分鐘就搞掂，雄哥真係快手。

「豬頸肉菜飯。」我擺低碟飯就諗住去收銀挨下，點知佢又叫停我。

「冇汁嘅喂？咩飯嚟架？」

「豬頸肉菜飯不嬲冇汁。」

「我理得你，總之我要汁。」

我小你老味，豬頸肉菜飯點會有汁。





正當我忍唔住，想開佢波嘅時候，嫻姐行咗埋嚟同個食客say sorry，喺廚房拎咗碟腩汁比佢，個西客先肯收聲。

「你老味。」我行咗去收銀，同隔離嘅子彈傾偈。

「係咁架啦，做得飲食總有呢啲客。」

「比著阿叔三年前唔好老脾，郁鳩咗佢啦。」

子彈笑一笑，就冇理到我。

過咗陣，有幾個著校服嘅男仔企咗喺門口，睇樣似係中五中六咁上下，見佢地幾個好似驚驚地咁，我就主動叫佢地入嚟。

「入嚟坐啦，幾位呀。」





「三..三位。」口窒窒又頭耷耷咁款，似乎係內儉嘅同學。

我指咗張枱比佢地坐，佢地坐低之後就開始傾偈，我見冇咩客，就喺隔離聽下佢地嗡乜。

「見..見唔見隔離班個插班生？」
「好正...」
「我都覺....」

原來講緊女，怪唔之得咁嘅樣啦。

做飲食就係咁，成日聽住啲客傾偈，有時佢地講啲嘢都幾好笑，可以話係沉悶之中嘅一點樂趣。

「唔該...我想落單...」班學生又幾有禮貌。

「食咩呀。」但我嘅語氣都係咁。





「青..青..青豆雲吞麵...」
「魚蛋雞..雞翼麵...」

「你呢。」有一個男仔好似仲諗緊食咩。

「我食..雞扒煎蛋飯..」

幫班學生落完單之後，我就出咗去食煙。

「呼...」

去到呢個時候你可能會問，有冇靚女黎食？

可以答你，有呀，但係唔多囉。





同埋，靚女都唔關我事，我唔鍾意溝女。

由中午做到八點，終於收工，係時候返屋企。

「雄哥嫻姐我走喇，byebye。」

「拜拜！」雄哥同嫻姐嘅笑容真係好慈祥。

「你個仆街，唔同我講byebye。」

「唉含撚啦你。」