《伙記唔該落單》: 第一章「隆發雲吞麵」

因為老豆冇寄過錢返嚟，所以除咗婆婆每個月啲生果金同老本之外，屋企真係冇咩錢多，只係僅僅夠開飯，至於學費就政府搞掂，著嘅話都係著返以前啲mk到爆炸嘅衫褲。

為咗幫補下支出，半年前我就去咗粉嶺花都一間叫隆發嘅雲吞麵檔打份兼職，貪佢間鋪唔算太大，以為做野唔會咁忙，點知我估撚錯曬。

你知啦後生仔，邊個唔想食好住好，只係可能我由細到大都慣咗餓住咁過日子，而加有得返工儲下錢已經好好，喂大佬一個月多五六千蚊洗已經偷笑啦，起碼唔洗口渴嗰陣買枝汽水都要左諗右諗。

「杰少，好準時喎。」

嫻姐係呢度嘅老闆娘，初初靠佢湊住我，由乜都唔識到而加做慣做熟，睇住我由初哥變做老手。





「早左放學嘛。」

我呢個一頭啡毛嘅死飛仔點解會讀大學？除咗比啲男童院姑娘強逼之外，最大原因係唔想婆婆擔心我，佢知道個孫讀到大學嘅話感覺都會安心啲嘅。

早排sem break日日都可以返工，一個月賺埋賺埋都有八九千蚊，而加開咗sem就冇咁多時間返，星期一二三都要返學，但星期三淨係返八半，十一點半就放學，所以趕得切中午返去開工。

至於四五六日梗係全部返曬啦，不過我會是但揀一日放假留喺屋企陪婆婆，同嫻姐講聲就得，好撚free的。

通常我一出糧就會儲起佢，另外用舊錢買啲好嘢俾婆婆食，有時會自己煮下飯，喺屋企撐下枱腳。





好搞笑架，婆婆有時會唔認得我，不過佢七十幾歲喇，唔知仲可以見佢幾耐，所以見得一日得一日啦，都唔可以淨係掛住搵錢。

「食枝煙先再開工啦杰少。」

摟我食煙嘅呢個仆街仔叫子彈，都係麵檔嘅人，都係mk仔一個，不過佢係全職黎，睇佢個樣大我兩三年左右。

其實識咗半年我都唔知佢真名係乜，由啱啱喺度做嘅時候鋪頭啲人就叫咁叫佢，所以我都係咁叫佢，試過有次我問佢叫咩名。

「真名？我叫甄子丹。」





屌，你信唔信呀仆街？

至於幾時開始食煙，十五歲群咗班黑社會嗰陣開始食，食咗足足有六年，我諗我三十歲就有肺癌。

呼，好撚爽。

「喂杰少，入去喇。」

十二點半夠鐘開工。

我有個習慣係攝枝煙落耳仔後面，出去食煙唔洗又摷褲袋又拎煙出黎咁撚柒麻煩呀嘛，鋪頭啲人都見慣不怪，唔會屌我。

「黎喇喂，雲吞麵，唔該杰少。」

呢個光頭佬叫雄哥，係鋪頭嘅師傅，佢煮麵真係有返咁上下，試過有啲上網寫食評嘅人專登黎食嘢，就係為咗試下雄哥嘅手勢。





「唔該雄哥。」

又開始漫長嘅一日。