為左追到女神我要成為全級第一！: 第四十五章：

唔經唔覺我地終於去到浪茄灣露地入口，入到去我周圍咁望一望眼見都只係得三至四個帳篷，黎露營既人都唔算太多，萬幸！畢竟其實我都幾中意清靜既環境，由其是係呢種遠離市區既地方，我地大家都特別想係呢兩日好好休息下，話晒大家都係岩岩先結束呢一年既學期，考試個陣所產生既壓力終於都有地方爆發啦。

我同啊傑周圍行下，終於簡左一個地方幾適合紮營，我就係個背包入面拎個帳篷出黎準備開始紮營，由於大家都係第一次去露營，所以對於紮營一無所知。諗返起翔哥send左條片係教點樣可以紮起個營，於是我同啊傑就邊睇住條片邊係到起營，過左唔知幾耐我地終於起好晒啲營啦。

我同啊傑訓左面個營而小欣佢兩個就訓右面個營，放低啲野之後，小欣就拉住我話想周圍行下喎。話說今日小欣身穿白色連身裙，好有夏天既味道！平時小欣佢都係紮起頭髮，佢今日竟然無紮到，佢啲頭髮隨著海風漂動，我企係到望住佢就有種仙女下凡既感覺。

佢回頭望住我問我做咩唔行既？我話我睇緊靚女，點知佢一野拍落我頭到，仲扮惡咁問我咩睇咩靚女啊！我笑笑口咁話你咪個個靚女囉，佢聽完就話你幾時變得咁口甜舌滑架。我調皮咁講左一句如果我唔咁講一陣又會比人拍頭架啦！之後我就即刻跑走左，小欣就係原地大嗌左一句真係好衰啊你！

我玩完佢之後，就跑返去拖實佢繼續周圍行。行行下見到有個景幾靚於是我拎部手機出黎影相，仲要小欣做我既專屬模特。幫小欣影完之後小欣就搶左我部手機話要一齊自拍張喎...可惜係郊區數據收得唔好，如果唔係我一定即刻放上IG到曬命。





我地沿路折返返去搵佢地，返到去就見到啊儀好嘆咁係張吊床上面享受陽光，而啊傑就去左海邊到行下。時間都唔早啦，我地準備煮我地今晚既晚飯啦，由於只係兩日一夜，所以都唔係買左太多食材，都係公仔麵個啲，但係郊區都可以食到野就已經好幸福架啦。我地男仔負責起爐，女仔負責煮野食，完美配合。

一邊等睇日落一邊等有野野，我個一刻既心情：真幸福！話咁快就有野食啦，我地坐係帳篷隔離一路食野一路睇日落。轉眼間天已黑，我同啊傑就係附近整左營火出黎，除左方便睇野之外我仲覺得營火係露營既靈魂！

之前睇網上啲留言講話浪茄灣好適合觀星，於是我抬一睇：嘩係滿天繁星啊！我拿拿臨叫埋佢地三個一齊睇，小欣佢地都比天上既繁星震撼到，臉上露出幸福滿足既表情。而小欣佢並唔知我已經偷偷地咁影低左佢既幸福表情...睇完滿天繁星既我地就圍爐一齊傾下計同玩下啲遊戲。











抱歉要大家久等，近日都無咩心情作故
真係唔好意思...