為左追到女神我要成為全級第一！: 第三十七章：

時間過得真係快，又黎到一年一度既家長日啦，亦都係派發成績表既一日。成績唔好既同學都稱佢為受難日，睇怕一星期都唔會見到佢地啦！好在我今時唔同往日，平時一到家長日我都會詐病唔想面對現實，雖然我父母唔係咩怪獸家長，但咁低分既成績，都冇人會中意啦！

經過呢幾個月既努力同埋小欣鼓勵之下，我今次終於唔洗再詐病啦，可以光明正大咁行入課室拎我份成績表。由於我學號同小欣只係相差三個，所以理論上會見到小欣佢。同父母係樓下茶餐廳食個早餐之後就正式出發去學校接受今次嘅審判！

到左學校之後，就準備搭升降機去到我課室嘅所屬樓層，突然聽到一聲：「唔該等埋啊！」我就即刻按返開門個個制。點知一開門就見到一個姨姨同埋佢身後嘅小欣！估唔到我同小欣會係到撞到，雖然我屋企人知我有中意嘅人，但佢地唔知眼前嘅小欣正正係我中意嘅人。

我同小欣互相向對方微笑，之後就默默咁等升降機開門，去到課室門口隔離坐低左，然後我啊媽見到頭先對母女係我同班同學之後，我啊媽竟然主動同小欣媽媽講野，而小欣媽媽又好樂意同我媽媽講野。明明都係第一次見面，點解好似一見如故咁嘅...

過左一陣張老師出左黎叫我同我屋企人可以入黎攞成績表。入到去之後張老師攞左兩份文件出嚟，一份係成績表，而另外一份我從未見過。我地無論咩科目都係以一百分做滿分，張老師打開我份成績表，然後望住我屋企人講左句：日俊同學今次係全班第一，另外亦都全級嘅第二名，日俊同學今年真係落足好努力同功夫去考今次嘅大考！





我屋企人聽到之後就開心到笑牙唔見眼，係咁講今次真係可以光宗耀祖啦！我望一望份成績表上面啲分數，中文：95/100分，英文：90/100分，數學：97/100分、通識：93/100分，仲有地理同商業會計科分別得分係89同95分。

雖然我都估到會係呢啲分數，但係我身上出現，我突然覺得好唔真實...之後張老師就打開埋另一份文件，一打開係領取獎學金通知書。換言之我今次結業典禮要上台接受頒奬啦！張老師同我講今次我拎到三個獎，第一個係全級第二奬，第二個係全班第一奬，最後一個係最佳進步獎。

我媽媽同張老師講左聲多謝晒之後，我地就離開左課室準備到下個，出到去我望住小欣之後深清咁一笑再指一指我部手機，佢咁醒目應該知我想點。我同屋企人講左句我有啲事想留係學校一陣，同佢地講聲再見，我去左小食部到坐低左。

我拎部手機出黎打開wts再wts小欣佢，同佢講我而加係小食部等緊佢。係小食部買左包蘋果綠茶飲，然後一邊挽手機一邊等待小欣黎搵我，希望佢成績都同我一樣咁好啦！










大家記得要注意衛生，要勸洗手同出街要戴口罩啊！
祝大家都身體健康！