為左追到女神我要成為全級第一！: 第三十一章：

白駒過隙已經到第二日考試，今日係考數學科，經過琴晚我同數學題一番搏鬥之後，相信今日份數學卷一定游刃有餘。

同小欣食個早餐之後就準時返去準備開考，話就話游刃有餘姐，但份數學卷係用英文黎考，對於我黎講前部份唔洗睇咁多英文比較輕鬆，但去到後部份要用睇好多英文黎解題個下先慘...

我操卷個時，因為睇唔啲數學英文用詞，而比啊明係咁笑我，不過啊明笑完我之後都好用心咁教我點樣做。老師轉眼間就黎左課室準備派卷開考，我默默咁望向小欣，見到小欣好似有啲小緊張，因為小欣雖然科科都勁，但係數學係佢弱項，所以佢難免都會有啲緊張。

小欣好似感覺到我望住，之後佢都望向我，我地互相微笑，互派定心丸。考試開始，我一手打開份卷一手拎起支筆，手起筆落！好快我就做晒前部份，去到後面因為係長題目，所以我用左好多時間去解題，去到最後個題我仲淨返10分鐘時間去做，今舖真係同時間競賽。

我用3分鐘去睇題目，再用5分鐘去做，我用僅有既2分鐘去檢查多次份卷，檢查完冇問題之後，老師都宣布考試結束各位同學停筆！收完份卷之後我就即刻去搵小欣佢，見到小欣笑笑口咁睇黎佢今次都冇咩問題。





下午個科係考我既選修科地理，由於我同小欣既選修科唔同，小欣佢係選修生物，所以我同小欣食完午餐之後就要分開一陣，不過係臨分開之前，小欣比左張保佑符我，佢話佢之前同屋企人拜神個時幫我求籤返黎，我個張係上籤黎，就咁睇個字面意思黎睇，好似話做咩都會成功。

雖然我個人唔算好迷信，但有左小欣呢張保佑符，我信心都大增左。兩個鐘頭之後我都輕鬆打敗左地理卷，我約左小欣放學係小食部等，我執完野就立刻跑落去搵佢，一落到去就見到小欣同緊現時全級第一啊飛傾緊計...小欣見到我出現都大聲叫我過黎，啊飛同我講話佢知我想做全級第一，但係都要過到佢個關先可以...

講一講啊飛既背景，我極度懷疑佢成屋人都係開外掛，啊飛有兩個姐姐，佢兩個姐姐之前都係讀呢間中學，佢兩個姐姐都做過全級第一，聽番啲師兄講話一個去左美國讀書一個去左英國讀書，而啊飛媽媽就係學校家教會主席，而佢爸爸好似係某大型公司既總經理，聽到我都有啲妒忌。

可能係背景關係，我覺得啊飛總係有種狗眼看人低既感覺，為左唔比其他人睇死，我要更加努力，仲有四日考試週就結束，而聽日就係考大魔王英文科，我既天敵！究竟我聽日可唔可以成功打敗到英文科呢個大魔王呢？