為左追到女神我要成為全級第一！: 第三十章：

我有五個月時間去努力，我係呢五個月入面我簡直變左第二個人由一個唔願聽書唔願溫習既人轉變為一個冇論係食飯係小息係放假時間都會拎住本係咁睇，可能我留左一年啦，總係覺得啲野好似好簡單咁，但我都唔敢鬆懈，因為要拎到全級第一，對於我黎講係一件好L難既事。

不過係五個月入面，小欣同啊明，仲有啊傑同啊儀都一直係我身邊陪我度過每一個艱難時刻，呢一段時間我同小欣日日放學都留係課室到溫習，每一日都留到學校要關門先肯走，同小欣食完晚飯之後就會送佢返屋企，然後我就返屋企繼續溫習。

我同小欣雖然未算係真正嘅情侶，但我地啲行為同普通情侶冇咩分別，雖然我地冇互相接吻，但都有互相牽手。我溫習溫到壓力大既時候，小欣都會陪我去行下海濱長廊，同我一齊散散心，互相開解下大家啲壓力。

好快五個月就過去了，唔知係咪因為我變得勤力左，我覺得班上啲人因為我都開始變得勤力左，有唔識既問題都會立刻問老師，上堂都少左啲嘈音。今日就係第一科考試：中文。我中文科成績科一直都係合格，因為中文大多數都係背下野就可以，所以我冇咩太擔心，我跟住啊明既攻略應該唔會有咩大問題。

因為我一早已經將啲範文背到滾瓜爛熟，所以課內問題可以好快就做得晒，之後就到課外問題，一見到篇文章就笑左出黎，因為呢一篇文章我之前有睇過，所以我大致上都理解篇文講咩，今次真係好好運。做完之後就到我經常失分位既文言文題目...我記得我有一年因為睇唔明佢講乜，所以咩都冇寫就交左卷。





但係今次唔可以咁樣做，要成為全級第一，就要一定拎高分返黎，我好好運，今次文言文唔算太難，大部分問題我都答到，只有少部分真係唔識答...希望唔會扣太多分啦。

考試結束之前我仲有10分鐘去檢查份卷，檢查完冇問題之後，我就趴係枱上訓係到，直到老師宣布考試結束要收卷既時候，收完卷之後，小欣就走過黎問我考成點，我就好輕佻咁同小欣講你男朋友咁勁點會唔掂呢！小欣就笑住同我講幾時話做你女朋友喎！

考完試就好肚餓，我同小欣去小賣部食啲野之後就繼續應付一陣啲考試，一陣係作文同埋綜合能力，唔知係咪呢幾個月睇書睇多左，所以係作文題目到好快搵到靈感去寫，而且我仲模仿左一啲作家既寫法，希望可以加到分啦。寫完之後我仲有5分鐘剩，我就用個5分鐘慢慢欣賞我份佳作。

綜合能力呢份卷只要你係一個正常人，聽覺正常，手速夠晒快，呢分卷真心好難會炒，只係睇高唔高分姐。話說我因為想我更加有動力去考，我同班啲讀勁書既人鬥高分，輸左要請食飯，所以我考每一份卷都落足百二分心機去做！

轉眼間我就征服左中文所有卷，說話卷係星期六先考。放學之後我就返左屋企繼續溫習，一打開門就聞到好香既味道，原來媽媽今日煲左我最中意飲既湯，佢話見我呢排咁辛苦要補一補下身體，飲完碗湯之後我就一邊溫習一邊等開飯，聽日考數學，我只要操好晒啊明比我啲卷就一定冇死，我有唔識既問題都會打比啊明問下點做，務求做到熟曬為止。





食完飯再同小欣傾左一陣wts之後，我就去左沖過涼再溫多一陣就上床訓左，係呢五個月入面，我既作息時間都改變左，變得好早訓左，平時都係兩三點先去訓，而加十一點幾就會訓。

為左小欣佢，我要努力向上。





















抱歉由於小弟需要返工返學仲要去發夢，所以出文時間比較長左，要大家等候多時真的十分抱歉，大家放心我一定會完成呢一個故，感謝大家的支持！

香港人加油！