為左追到女神我要成為全級第一！: 第十九章：

個一日係星期六黎，我約左小欣一齊食完早餐去先集合，我地都係去學校係附近餐廳到食早餐，食完早餐之後我地就去學校門口集合。

由於今日唔係返學日，所以老師允許我地可以著便服去，我今日就著左白色短袖衫同黑色運動長褲，著得幾普通下。而小欣今日佢著左同我一樣既白色短袖衫同埋藍色牛仔褲，係我眼中明明只係好普通既配搭，但小欣著係身到就有唔同感覺，好靚！

我地今日係同另一班一齊，所以有20個人一齊去做動物義工，上到車之後小欣坐係我隔離，我地係車上有講有笑，由於車程要成一個鐘咁耐，所以我就想聽歌訓一陣。小欣冇啦啦拍我同我講話佢都想聽歌但唔記得拎耳機出黎，問我可唔可以借一邊黎聽下，我笑住咁答佢好啊，就除低左另一邊比佢。

唔知係埋小欣日日放學都要返工好攰，搞到佢仲快過我訓著。我默默咁望住佢，腦海中全部都係如果小欣係我女朋友會點既景象，突然間我感覺到我膊頭有啲野壓住左，我回過神來一望原來係小欣訓得太冧，成個頭訓左落我膊頭到。

唔怕老實講其實我好享受呢個過程，所以我並冇叫醒到佢，由佢繼續訓。過多一陣我都忍唔住訓埋，一個鐘之後負責老師就係車上大嗌就到啦麻煩大家準備好要落車，我同小欣都比把聲整醒左，一開眼我就感覺到我個頭訓左落小欣個頭上面，個情況就好似一對情侶互相依靠住大家訓一樣。



小欣知道佢全程都訓係我膊頭就瞬間面都紅晒，而我都啲不知所措。我見過氣氛有啲尷尬於是就問佢。
我：我膊頭係咪好好訓呢，見你訓得咁冧！
小欣：咩喎，咁人地唔小心訓到姐，同埋啊你膊頭咁硬邊到好訓喎！
我：下次唔好再唔小心啦！
小欣：而加有個靚女訓係你膊頭到，你執到啦！
我：嘩如果你咁講，咁我咪好有著數囉！
小欣：係啊知道味！
我：好啦好啦，要落車啦！

落到車之後，由於今次地方靠近郊區，所以空氣特別清新。明明我地距離目的地仲要行多三分鐘，但係我地已經隱約聽到狗狗既叫聲。小欣佢勁興奮，想快啲去見到啲狗狗。