為左追到女神我要成為全級第一！: 第八章：

話咁快又上完兩堂啦，又係時候放小息啦！一打鐘個下，我個視線已經自動望向小欣到，小欣都留意到我望住佢，於是佢拉一拉我件衫，準備落去小賣部，佢叫我坐係平時低年班食飯個啲椅個到等佢。

等左一陣之後，小欣左手拎住兩包陽光檸檬茶，右手拎住一盒燒賣。佢坐係我對面然後遞包檸檬茶比我，而佢自己就一邊飲檸檬茶一邊係到食燒賣，佢個樣好似好滿足咁，搞到我有少少心動。

突然間小欣佢有野問我！
小欣：喂你今晚得唔得閒啊？
我：得閒既，做咩先？
小欣：今晚我屋企人去左飲宴，得返我自己一個食晚餐，咁我又唔想自己一個食咁孤單，所以咪想搵你陪我食囉。
我：但你今日都令到我好孤單喎！
小欣：乜你咁小氣架，我都同你道左歉啦！


我：講下笑姐，咁你想幾點食啊？
小欣：算你啦，就今晚7點食啦！
我：好啦！

小息完結鈴聲響起了，我同小欣有講有笑咁返班房上埋最後個兩堂。最後兩堂係英文堂，係小欣既幫助下總算捱過呢兩堂，我有時候都會質疑自己英文程度會唔會仲衰過啲低年級...

啊明因為中六要補課，所以今日得我自己一個返屋企，係學校門口同小欣講聲今晚見就分開返屋企。

一個人個時我通常都中意戴住耳機聽歌，所以係回家路上都唔意外咁戴住耳機聽歌，轉眼之間我已經返到屋企門口，一打開門都係咁安靜，睇黎爸爸媽媽又去左深圳公幹，係飯廳枱面上有張紙條，內容係：啊仔，爸爸媽媽要去深圳公幹五日四夜，枱面上有一千蚊，你自己照顧好自己啦，愛你！



呢個場景我一早已經習慣左，平時如果遇到呢啲情況我一係就落街買外賣食又或者搵啊明食飯，但好彩今日小欣搵我陪佢食飯，如果唔係又會自己一個孤孤獨獨咁食飯。

望一望牆上個掛鐘，而加先5點幾，姐係我仲有時間去準備一下，於是我立刻係衣櫃到睇下有咩衫褲岩睇，好快就簡左一件白色恤衫同一條黑色長褲。簡完之後我就順便沖一沖個涼，沖完涼之後成個人都舒服晒，著好衫褲同執下個頭之後，就已經差唔多7點。