為左追到女神我要成為全級第一！: 第七章：

話咁快就上晒上午所有堂啦，又係時候放飯啦！一如既往啊明已經一早企左門口到等我，我望一望小欣佢，見佢仲係到收拾緊啱啱上堂用過既書本同文具，於是我就輕輕力咁拍一拍佢，佢望住我問我做咩事。

我：喂放飯啦喎！仲係到執野？
小欣：執完野咪出去食飯囉，我唔係好中意個位咁亂，所以先會咁樣做！
我：哦！咁一唔一齊去食飯，如果你食既話，我就同啊明係到等埋你啦！
小欣：好啊，等多我幾分鐘就可以啦！
我：咁我同啊明係門口吹下水先啦。
小欣：嗯！

兩分鐘之後小欣就係門口出左黎，並向我地示意可以起行去食飯，係去餐廳既過程中，因為小欣同啊明都知道大家都有睇果本《和你相戀做過的五件事》，所以小欣同啊明全程都係到冇視我，佢兩個互相係到討論咁本書既內容，由於我一頁都味睇過，所以一句都答唔到嘴。





我唯有默默咁用部手機上下社交媒體，好快我地就到左餐廳食飯，原本我諗住去到餐廳食飯佢兩個就會理下我，點知佢地都仲係有講有笑。

之後我就自己一個默默咁食飯，我個時個心情好唔開心，但我又做唔到啲咩，唉！望住佢兩個好似情侶咁樣，搞到我有啲心酸。返到學校之後，我同小欣就返自己個班到，而啊明都返左自己個班到。

唔知係咪個個女仔都好細心咁，小欣好似察覺到我心不在焉咁，於是佢問我。
小欣：做咩啊？
我：冇野啊，我係到諗緊野姐...
小欣：係咩！但我女人直覺話比我知你好似唔係因為呢個原因咁喎！
我：冇啊冇啊！（我心諗係咪女人都識得讀心架）




小欣：你肯定有野暪住我啦，你再唔講比我知，我唔會理你架！
我：...好啦好啦，我講啦！
小欣：咁你快啲講啦！
我：頭先食飯你同啊明一路都傾緊本書啲內容，但我因爲冇睇過，所以又入唔到你地既話題，搞到我要做自閉咁款...
小欣：下！我仲以為有咩大事添！對唔住囉，頭先同啊明係傾得忘形左啲，放心啦唔會有下次！
我：好啦！
小欣：最多一陣小息請你飲野啦，當賠禮囉！
我：你話架！
小欣：係啦係啦，上堂啦快啲聽書啦！