[校園][純愛]《幸運星下的預言》: 第一百三十三章

出到嚟社會

難免會過住機械人咁嘅生活

每日都係做相類似嘅事

放假就喺屋企休息

個別嘅節日可能會唔同啲



有啲特別野玩下

一年咪得一兩個

我又唔會用行屍走肉去形容，

因為我對於呢種生活其實冇乜反感

人大咗可能覺得冇驚喜係一件好事



冇錯，

每日做重複嘅野或者真係好乏味

幾點起身，搭邊班車。

跟住放lunch然之後返嚟繼續做

六點零收工跟住就返屋企食飯



食完飯沖完涼打下機咁就一日

或者依家真係越嚟越細膽

寧願過住一啲冇驚喜嘅生活

都唔敢離開呢個comfort zone

勝在穩健，安全

咁多驚喜表面上梗係會諗多姿多彩，

但如果驚多過喜呢，

係咪承受得到先



依家雖然悶不過起碼知道發生緊咩事

每日都係咁架喇

唔會點樣變，

溝女

唔啦

講得好聽啲就係費事再害人

同埋越嚟越執著私人時間



返到去七八點又要打機又要上網呢樣嗰樣，

第二朝早起身又唔可以好夜先瞓喎

邊似以前讀書咁樣時間咁鬆動

講得難聽啲，

就係毒撚冇女仔鍾意

老喇好少再執著兒女私情嘅事，

你就當我喺度死撐

單身都冇咩唔好啫。




眨下眼，

終於都過咗好多年

時間線正式去返今年

費事成日講歷史大家覺得悶啦

講嚟講去都係以前嗰啲野

都唔貼地嘅

我重記得，



今年除夕慶祝新一年到來嗰陣

當聽到身邊好多人講2019新年快樂

可能我個腦真係好得閒，

無啦啦諗起一個所謂嘅約定

係喎，

原來差唔多夠時間喇喎

只係淨返八十三日

自從收到嗰樽幸運星，

就一直都存在喺我個腦海入面

一年兩年三年如此類推落去

今年終於去到第九年，

之前我都講過啦

有一陣子我係唔敢望住呢個樽

但其實一路都記得嗰個好無謂好無聊嘅約定，

直至今日3月25號

正正式式過咗3287日

呢個樽就係證據，

佢話俾我知全部野都唔係發夢

成日都話唔記得

又話唔想記得，

根本就呃人

如果我真係想同佢斷絕所有聯絡，

我個instagram搜尋欄第一位就唔會係佢啦

以前拍拖嗰陣，

當我知道陣間要見女朋友

我一定係成個app delete咗佢

夜晚搭車返屋企先靜靜雞裝返，

當然啦後來先知原來可以delete紀錄

柒事唔好提喇

好好彩佢係public

雖然冇自拍，

亦都冇任何人嘅合照

淨係影住風景呀書呀咁樣

不過起碼令我意識到，

依家佢重喺香港

咁就已經夠啦

由一開始我見到佢係public已經賺咗

點可以強求呢，

唔好講咁多廢話，

依家唔係回憶嘅時候

我終於行埋去床頭，

拎嗰個裝住3287粒幸運星嘅玻璃樽

小心翼翼扭開個樽蓋，

唔係講笑真係好多粒星

一路都冇為意，

將啲幸運星倒出嚟嗰陣，

無啦啦跌咗封信

我記得佢同我講過，

今日扭開嗰陣，

佢叫我一定要打俾佢

但係依家跌咗一封信出嚟，

我究竟係睇咗先

定係打俾佢呢

斷估唔會咁無聊得個信封

唔等都等咗九年，

冇理由急於一時

睇埋佢寫乜都未遲啦。