[校園][純愛]《幸運星下的預言》: 第一百三十二章
可能你地覺得佢好橫蠻無理
不過嗰陣嘅我選擇一言不發
呀唔係，
唔應該用選擇去形容
而係我根本冇第二個做法
根本就乜都講唔到
我好想發爛渣鬧佢
話佢諗多咗唔好幻想咁多
不過我開唔到口
佢的而且確講中咗
而且重描述得好啱
鍾意一個人嗰陣，
真係唔會係咁樣
點解我咁肯定，
因為我以前試過
樣樣野都好緊張
不停反思自己有冇問題
有試過就有比較，
佢唔講出嚟，
我可以一直呃自己
依家唔得呀
一字一句擲地有聲直入心坎
冇得再呃自己，
其實我知自己做緊乜
就係因為明知故犯，
我先更加無地自容
跟住嗰晚我就搵咗呀澤出嚟傾計
唔可以話訴苦嘅，
純粹有個人陪我傾下計咁樣
我一打去就話:「我同Sylvia散咗
」跟住佢即刻出嚟
兩條友好似以前咁
買幾罐啤酒去球場坐
跟住我就講返頭先Sylvia同我講嗰啲野啦。
呀澤:「其實你應該知啦
最近呢三段感情你係想點我諗你唔會冇答案，
你係唔好意思講啫
」我:「我點會唔知
亦正如你所講，
點好意思講出口
就係怕好似今日咁樣
俾人一語道破嗰個衝擊
」呀澤:「一路唔講出口，
自己就聽唔到
但係依家人地講埋出嚟，
你想講冇得再呃自己丫嘛
係咪
」我冇講野
淨係點頭，
呀澤:「記唔記得我以前講過
屌好似就係喺呢個球場
又係飲住嘉士伯
」我:「唔係藍妹咩
」呀澤:「我唔飲藍妹架喎
」我:「係咩
唔緊要啦唔係重點
繼續
」呀澤:「屌俾你打斷左唔撚記得添
」我:「你話你以前喺度講過呢
」呀澤:「屌我記得喇
有一日我地咪飲到醉醉地
神智清醒嘅
不過講一啲平時我地唔會講嘅話題
」我:「有啲印象喎
我應該知你講乜
不過你繼續啦
」呀澤:「我咪講過男人自自然然就會變一個仆街
唔需要點樣學習，
總之會逼你學識點樣做
你依家好成功丫
」我冷笑咗一下
我:「原本唔覺架，
係頭先Sylvia講咗句
『定係因為一開始你就當我係水泡，
所以你先講唔好意思。』
佢簡直係中正紅心
」呀澤:「大佬我識咗你幾多年呀
如果我咁都睇唔出我諗你都唔信啦
我就係知你條契弟係嗰種沉溺自己世界嘅人
所以一直都唔同你講
」我:「你知啦細個嗰陣無聊
有時會喺度諗將來個伴侶會點樣，
嗰陣個先決條件梗係要自己好鍾意啦
大個咗原來唔係咁諗
」呀澤:「即係點
」我:「你問我會揀個唔鍾意嘅
講明先唔係憎呀，
take care到我咁就最好
同鍾意嘅女仔一齊
可能係一件好辛苦嘅事。」
呀澤:「即係話你最近三段感情都係呢個標準
」我:「係呀，
衰啲講你揀個唔鍾意嘅
就算他日俾人帽
你所受嘅傷害點都唔會比你揀個鍾意嘅大
」呀澤:「你覺得你呃到
」我:「原本我覺得冇問題
亦都係因為我覺得冇問題，
所以先同佢地發展
我以為自己做得好好
原來唔係喎
」呀澤:「我都明嘅
一個人喺情路上面受過挫折，
真係會影響價值觀
何況你重係喺初戀嗰次搞到咁大鑊
」我:「嗰次教訓好大，
我之後所做嘅野全部都係建基於初戀嘅經驗
其實我知咁樣係唔啱
玩弄感情，
只不過一路都呃緊自己
以為好硬淨啦，
點知今日Sylvia同我講嗰啲野
我先知一直都高估自己
」呀澤:「咁依家諗住點
」我:「唔知呀
單身住先啦，
或者俾時間沉澱下都好嘅
費事一直鑽牛角尖。」
同Sylvia散咗之後
我就冇再拍拖，
或者我唔想再傷害多一個人
原來自己演技太差
呃唔到人咁就費事啦
我問過自己，
點解要咁執著初戀
甚至我所做嘅野
根本同當年一模一樣
只不過主客互換，
以前我被佢當成水泡
依家我當人係水泡
有咩分別呢
學余春嬌話齋，
咁多年嚟我都想擺脫嗰個人
去到最後我發覺自己都變成嗰個人
佢有咩咁好影響我咁多
我唔係呃你我真係唔知，
每次上高登，
係呀係高登你冇睇錯
因為嗰陣重未有連登
一睇到啲關於初戀嘅post
我就不期然諗返以前啲野
個post叫我留低想同佢講嘅野，
我諗咗好耐，
淨係諗到無限句多謝
令我有咗咁多永世難忘嘅體驗
我淨係唔鍾意佢一樣野，
就係佢實在太好，
好到我唔可以用佢嚟做標準
因為一比較就會見到高低
搞到分手之後擺脫唔到佢陰影
咁多年以嚟都係，
以前我會呃自己一早擺脫
依家人大咗敢去正視
我先知根本就冇一刻擺脫過
佢送俾我嗰個幸運星玻璃樽，
我每朝起身都提住自己唔好望
不過從來都唔會扔咗佢
以前傾計嗰啲record同埋合照都係，
分手之後我冇再拎過出嚟睇
但係亦都永遠唔會撳delete
真係放低會咁嘅咩，
我就係唔敢去望
我怕一望佢忍唔住
其實我好想喺個post講嗰啲好難聽嘅說話，
佢送頂帽我戴，
理論上應該好嬲係咪先
但係我發覺自己真係好懦弱
我連鬧佢嘅說話都講唔出口
歷來冇試過有一刻係咁憎自己
人地送一樣男人最憎嘅禮物，
做啲咁嘅野，
你竟然淨係記住佢有幾好
一句都鬧唔出口
你話幾羞恥，
所以點解從來唔會同人講初戀係邊個就係咁解
冷靜完我喺度諗，
我唔講佢點諗我
或者佢已經唔記得我係邊個
所以你諗人地真係冇用，
唔到自己唔自私啲
如果當日我冇入學生會，
依家個結果會點呢
雖然我口講多謝咋，
但係我都明白，
有啲人真係寧願從來冇認識過
諗諗下我又唔忍心捨棄呢段回憶
所以真係好矛盾，
連我都唔知自己想點
或者就係有遺憾先會成長
好唔好我真係唔識去講，
最大嘅遺憾，
可能就係當日我知得太多。