[校園][純愛]《幸運星下的預言》: 第一百三十四章
「你好呀，
九年之後嘅傑仔，
如果你有遵守承諾，
咁聽話真係冇即時拆開嗰個玻璃樽的話，
放心，
我上網已經查咗用咩筆用咩紙去寫，
先可以將字跡保留咁耐，
為咗一樣咁無聊嘅事做咗好多功課呀，
哈哈，
其實真係好無聊，
呢啲野對你嚟講可能已經唔記得喇，
全部都至少九年前，
其實我諗過你會唔會唔記得，
不如唔好交代算啦，
反正你好大機會會好嬲，
好憎我，
跟住將關於我嘅回憶全部剷除晒，
又或者係我諗多咗，
其實你唔係好鍾意我，
分手之後好快搵過第二個，
重邊有時間心機去記住呢啲咁無謂嘅諾言，
諗咗好耐，
我預自己會諗多咗，
九年之後，
亦即係依家嘅你已經唔記得當年我地講嘅內容，
不過你當我真係好多時間啦，
每日溫完A-Level冇乜野做，
就當我去賭一次，
卒之都寫咗呢啲廢話出嚟，
係呀，
其實寫嗰陣真係好搞笑架，
因為我要將我呢刻發生嘅事，
全部都變成過去式，
如果唔係你會唔明，
我嘅依家唔係你嘅依家，
我知我唔可以成日都貪心，
不過你當我咁耐冇求過你，
希望你可以睇晒呢封信，
對你嚟講或者係廢話，
不過對於我嚟講，
入面一字一句，
全部都係最真心最真摯嘅說話，
唔鍾意都好，
睇一次咁多丫，
好唔好呀?
九年之後嘅傑仔。
其實呢，
一直以嚟有好多野都好想同你講，
由與你認識嘅第一日開始，
統統都入晒落個腦度，
但係好多野真係講唔出口，
唔好笑呀，
咁女仔怕醜都唔係好難理解啫，
我記得呢初頭我地唔係點樣傾計，
唔關你事純粹係自己問題，
講下啲背景先啦，
其實呢以前我都好多野講，
不過小六嗰年daddy急性中風突然走咗，
跟住開始就唔敢同其他人作出好深入嘅交流，
因為我好驚我識嘅人會無啦啦走咗，
嗰幾年真係好驚架，
早幾日重同一個人有講有笑，
幾日之後已經陰陽永隔，
我表面扮到冇問題，
其實真係好脆弱，
自此我就唔敢同其他人打開自己心扉，
你唔上心，
就算佢突然唔見咗，
你都唔會點樣傷心，
所以中學嗰陣我就建立一個咁嘅形象，
純粹係我自己太懦弱啫，
點知呢有一日好搞笑喎，
你知我地學生會一齊坐架啦，
呀唔係，
睇緊嘅你可能已經唔記得，
總之我地以前呢去學生會做功課嗰陣就一齊坐嘅，
咁突然之間有一日就見到隻曱甴，
我就好驚曱甴嘅，
平時喺街見到直情係唔敢行嗰種，
寧願行遠啲都要兜路，
所以我嗰陣真係忍唔住要叫你幫手，
你個傻仔又好搞笑喎，
睇住你都係縮下縮下，
但係竟然又敢行過去整死佢，
跟住走去消毒，
嗰刻我真係覺得你好型，
好感激你嘅行為，
自此，
我同你個關係就好似比之前拉近唔少，
會同你玩埋啲無聊野呀，
俾一包朱古力奶你但冇飲筒嗰啲呢，
唔知你記唔記得啦，
總之我就好記得，
跟住冇幾耐之後嗰個運動會，
我行樓梯論盡整到隻腳，
嗰陣你好快拉咗我上嚟，
如果唔係你，
我一定唔止整到隻腳咁輕傷，
跟住你重要孭我去醫療室，
嗰一刻我覺得你好似我daddy，
上次自修室嗰度有曱甴你喺度幫我整走佢，
今次我論盡你首先扶起我跟住再孭住我去自修室，
每次有難你都喺我隔離，
可能你覺得唔可以用「有難」去形容啦，
不過對我嚟講，
呢次同我細個俾daddy孭住嗰個感覺真係好相似，
大家都俾到一種好強嘅安全感我，
自此我就對你有好感，
係喇喺度我想講，
你從來都唔係代替品，
唔係喎都係唔好講住，
講返點解鍾意你呢個話題先，
你話呢啲野點樣講出口!
係喇講開又講，
你個人真係十級遲鈍囉，
有冇搞錯呀咁都唔知，
都已經成日整早餐俾你，
居然可以咁都唔知，
我又唔敢講出口喎，
驚你唔知點諗，
我自作多情瘀咗我唔怕呀，
我只係驚你會刻意疏遠我，
所以一路都唔敢講出口，
點知你真係咁耐都可以唔表示，
日日落嚟同你去自修室你估真係好得閒咩，
搞到最後我要特登同表弟講你先行動，
你知唔知表弟個技巧幾拙劣，
無啦啦問我點睇你，
傻嘅都知點啦，
九成都係受你所指，
跟住我就知你點諗喇，
我亦都知表弟會同你講返，
哈哈依家證明冇估錯丫，
唔係我知道你啲蠱惑野順水推舟，
你真係所託非人呀，
警告你唔好同表弟講呀，
佢唔知我背後咁樣講佢，
咁佢問野個技巧真係好差嘛……
不過算數啦，
去到最後都同你拍咗十一個月拖，
我預計咋，
不過應該唔會錯，
要九年之後，
即係依家嘅你先至可以證實，
可能你依家唔知我講咩啦，
不過我未講住，
你知唔知呢你嗰啲表白手法其實真係好冇誠意呀，
唔怕講你知丫，
其實一直以嚟我都有幻想過初戀嘅來臨，
以前會覺得個場面會好壯觀，
唔准笑呀邊個未試過無聊諗過呀，
不過原來真係發生嗰陣呢，
你會有另一個諗法喎，
只要你鍾意嗰個人，
佢講乜做乜都唔係重點，
雖然十個有九個都覺得，
喺巴士上面發生初戀真係好搞笑，
坦白講我都冇諗過係喺呢個場景進行，
更加冇諗到我初戀男朋友，
會扮野捉住我隻手唔放先斬後奏，
明明已經上咗巴士啦哈哈，
可能得我一個咁好人，
你咁樣表示我都肯應承，
講笑咋，
我又點會係好人呢。
我係咪同你講過呢，
其實我係好想寫故事寫劇本嘅，
如果當年唔係理科高分啲，
我應該真係會向呢方面發展，
又或者咁講，
如果當年係讀文科，
咁我應該唔會識到你，
我地之後發展嘅事，
都會好唔同，
對你嚟講可能好啲嘅，
又或者係我自己諗多咗，
你好快就放低咗呢段感情，
我依家真係唔知呀，
因為都只係預測，
同你拍拖嗰段日子，
我真係好開心，
唔好話我交行貨因為我諗唔到第二個詞語形容，
我好感激初戀發生喺你身上，
令我有咗好多終生難忘嘅體驗，
原來人與人真係要用個心出嚟溝通，
呢點係你教識我，
我前面咪講過，
自從daddy無啦啦走咗之後，
我就唔敢再用真心去識人，
因為我真係好懦弱，
係你俾咗呢個勇氣我，
我真係好多謝你，
呢段日子嘅回憶我好老套咁講，
係一世都唔會磨滅，
我唔知你點諗，
於我而言就一定係，
真係太多片段，
原諒我唔可以喺度一一詳述，
唔係喎，
如果我唔講啲呢，
你條友又喺度話我根本就唔記得，
我講一樣最深刻喇，
你記唔記得你送嗰條吊墜頸鏈俾我，
銀白色嘅呢，
上面重要有我同你個名嗰條呀，
我驚九年之後嘅你唔記得，
所以一定要喺度講多啲，
嗰日應該係我人生入面最感動嘅一日，
由我最鍾意嘅人，
送咗一樣獨一無二嘅禮物俾我，
頸鏈有好多條，
但係有我同你個名就只係得呢一條，
放心我喺度應承你，
我一定保存得佢妥妥當當，
係一定，
你唔信我就睇完之後打俾我，
睇下九年之後我可唔可以遵守到呢個咁卑微嘅承諾，
喺呢段關係上面，
我冇咩可以再同你講，
衷心同你講一句多謝，
我有你呢位男朋友，
係我一生人最大嘅福氣，
你當我擦鞋啦，
我只係想講，
冇人可以否定你有幾好，
因為我好清楚，
我同你一齊嘅呢段日子，
就係鐵一般嘅證據。
你之前咪講過嘅，
唔係喎對於睇緊嘅你嚟講已經唔可以稱得上為之前，
總之你講過你話會睇我寫嘅劇本架，
依家就有得睇呀，
我唔知呢個劇本係咪會如期上演，
你當預言應該會適合啲，
總之我有信心，
可以將呢個預言，
變成為大家嘅歷史，
喺度我想講一講背景先，
其實自從我daddy走咗之後，
我媽咪所受嘅創傷唔會比我少，
要一直睇精神科醫生，
表面上好正常，
不過如果某啲位觸動到佢神經;
佢就會失控，
佢嗰種情況唔係一般發脾氣大發雷霆嗰種，
反而可以繼續保持冷靜，
去做一啲唔尋常嘅行為，
社交場合上面佢好正常，
係返到屋企牽涉到家庭嘅事，
就會變到咁樣，
佢以前唔係咁架，
自從daddy突然走咗佢就變到咁，
我同家姐都知佢有呢個問題，
勸咗好耐終於肯接受去搵醫生求診同埋食藥，
以為冇問題啦，
直至有次我同你喺街嗰度見到佢，
依家嘅你應該唔記得邊次，
如果嗰日見唔到佢，
或者，
我同你嘅日子應該可以繼續延長，
因為媽咪自從daddy因病走咗之後，
就唔再相信愛情，
更加唔鼓勵佢兩個女求學時期拍拖，
家姐同佢講過好多次，
話當中係冇任何邏輯關係，
直情話佢個理論係唔合理，
所以其實一開始我已經做錯咗，
根本唔應該同你開始，
對唔住，
亦都係我呢一部分最想講嘅說話，
我嘅心態就係拖得幾耐得幾耐，
冇錯，
咁樣真係好自私，
有時同你去完街之後一個人搭𨋢返屋企，
我都同自己講，
其實呢啲時間係偷返嚟，
每次見你就梗係好開心，
但係返屋企之後我又好憎自己，
連我都擔保唔到我同你一齊幾耐，
過得一日得一日，
我唔會用我好鍾意你做藉口，
呢啲對你嚟講都只係廢話，
打從心底入面我絕對認為係我自己問題，
你從來都係受害者，
其實真係唔應該開始，
只係我妄想可以一路保守住呢個秘密，
不過終歸紙包唔住火，
嗰日喺條街見到媽咪，
我就知我同你一齊嘅時間正式進入倒數階段。
自從嗰日之後，
佢每日就叫我同你分手唔准拍拖，
點解跟住重可以見而唔係即刻同你分手，
都係多得家姐係咁同媽咪講，
我都同佢講唔可以嗰一刻分手，
嗰陣連A-Level都未考
跟住佢問我俾個期佢，
當時情緒太激動我真係諗唔到，
去到第二日佢講，
再唔俾個期佢就好似對家姐個前男朋友咁樣對你，
家姐同我一樣以前中學嗰陣都有個男朋友，
原本家姐都以為佢得個講字，
你可以做啲咩啫，
點知有一日返到屋企，
佢竟然俾咗幾張相家姐睇，
嗰幾張係佢偷拍家姐個男朋友，
上身著住校服，
應該係喺學校門口等佢走，
家姐嗰陣冇為意,
覺得都係偷拍啫,
點知跟住佢男朋友一直俾媽咪騷擾,
佢同家姐講，
如果唔分手，
就會有進一步行動，
嗰陣其實唔關我事不過我都忍唔住喊出嚟，
點解我媽咪會變到咁樣，
明明以前都唔係咁，
我好唔想咁講不過諗唔到第二個形容詞，
佢簡直係痴咗線，
於是家姐就真係驚，
估唔到幾年之後，
我會重蹈覆轍，
我知佢講得出就做得到，
依家佢覺得我已經超越佢嘅底線，
頭先都講一越過佢嘅底線就會咁，
我唔可以再坐視不理，
我好想繼續同你一齊，
就算唔可以光明正大都唔緊要，
但係我知點樣偷偷摸摸佢都會搵到你跟住進一步行動，
我冇得再自私落去，
跟住我同佢講，
俾你考埋最後一科先講分手，
亦即係4月22號，
我寫呢封信嘅時候係未考A-Level，
依家同你分手我唔知你會點樣，
當然你有可能當冇野，
咁咪重好唔使我喺度，
可能只係我高估咗你鍾意我嘅程度，
但我唔想搏，
我唔想你因為其他野搞到備戰程序出問題，
你就當我諗多咗，
所以我話一定要等你考埋嗰科physics，
咁樣先可以正式分手，
你放心，
嗰日之後我就會下定決心同你分手，
我都預咗自己考physics之前嗰日會忍唔住，
我依家淨係諗都咁嘅心情，
去到當日我諗我真係崩潰，
係定唔係就要等你同我講，
因為我依家都唔知，
總之一定要等你考埋試先，
我想同佢講拖到英文oral，
不過佢話已經讓步唔可以得寸進尺，
咁我就知唔得，
你放心，
到時我一定有辦法令你好憎我，
咁當然喇，
一嚟就同你講分手實在係太突然，
咁樣你一定唔會信，
我最大目標係要你死心，
咁突然嘅話你一定聯想係咪邊度做得唔好，
又或者中間發生咩事，
當你有聯想，
即係話你重希望挽回呢段感情，
咁又點可以令你死心呢，
所以我一定唔會同你無啦啦講分手，
我有諗過點樣最自然，
一段感情結束，
牽涉第三者係正常不過嘅事，
跟住我就開始有啲眉目，
詳細會點做我都答你唔到，
總之考完physics之後，
我就會對你好冷淡，
如果你約我出街我多數都會推你，
唔可以全部推晒喎，
因為咁樣太明顯，
出到嚟傾計，
我會特登唔應你，
就算應你嗰陣，
個反應都會好冷淡
我知道你對於傾計氣氛好敏感，
你講過架我好記得，
講埋呀費事等九年之後嘅你話我馬後炮，
我到時會好無稽咁樣講，
話因為要溫oral所以唔出嚟，
我諗咗好耐呢個應該係一個唔錯方法，
第二個可能唔信，
你一定知道我有幾著重成績，
咁嘅騎呢藉口你絕對會相信，
冇估錯嘅話，
你聽完我講嗰啲藉口，
再加埋一啲難聽嘅說話，
你應該會有少少嬲，
放心喇我諗過我應該要氹返你，
冇理由一鬧交就分手嘅，
何況係啲雞毛蒜皮嘅事，
氹完之後我估我地都會出嚟架喇，
我要營造一個，
我同你嘅關係，
被呢次個事件影響咗嘅感覺，
一步一步推進先至變得合理，
最後當然就要搵埋第三者，
同我由細玩到大嗰個呀文呢，
你應該唔知邊個你未見過佢，
哈哈喺度話你知丫，
佢有個好穩定女朋友架，
我到時講嗰啲野，
全部都係大話，
我會話自己當你係佢嘅替身，
依家佢同人分手我就搵返佢，
唔怕講埋丫，
你信唔信都好啦，
我同佢真係好似兄妹咁樣，
點解我媽咪唔介意佢同我接觸，
係因為佢媽咪同我媽咪識咗好耐，
細細個玩到大嗰種，
佢當我係細妹我當佢係呀哥，
從來都係，
睇緊嘅你信又好唔信又好啦，
總之我同佢冇一刻發生過超越友誼嘅事，
我預咗你未必信架，
但係都好想喺度講，
再講一次，
到時我講嘅全部都係大話，
哈哈當然啦我會扮到好真，
自從有呢個諗法之後我都不斷咁練，
最緊要就係自然，
初頭自己好冇用，
眼淚成日自己跌落嚟，
我唔知到時會點呀，
希望忍到啦，
必要時我會搵埋映彤幫手，
真係唔關佢事，
九年之後嘅你千祈唔好怪佢，
係我叫佢咁做，
佢勸過我好多次點解點解要用呢個處理手法，
覺得唔需要去到呢一步，
可以繼續靜靜雞拍拖，
佢話佢都會出嚟幫我地，
你就當我自私啲，
唔想再有其他人承受呢個風險，
佢唔關事就固然係啦，
我最鍾意嘅你亦都係，
況且……
我又唔係真係咁好，
你好快就會搵到第二個，
何必為咗我呢個咁嘅人承受呢啲風險呢，
長痛不如短痛，
可能十一個月都唔算短，
既然偷偷摸摸落去都係指標唔治本，
咁不如等你考完試，
無後顧之憂，
大家先分開啦，
唔好睇少我嘅執行力呀，
我絕對可以擔當到呢個角色，
我知道點樣做一個好嘅女朋友，
就自然識做一個衰嘅女朋友，
我唔敢講之前嘅我係一個100分女朋友，
但我夠膽保證嗰日我一定會係一個0分女朋友，
對唔住，
我冇勇氣同你不顧一切走落去，
真係好抱歉。
唔怕話俾你知丫傑仔，
其實呢，
呢封信我原本係想寫到3287字，
啱啱好冇多冇少，
哈哈最後發現原來講多咗，
或者我同你，
從來都係差少少，
即使去到結尾，
都唔可以如我所願，
係我問題，
唔識控制字數，
更加唔識控制對你嘅感覺，
總之全部都係我問題，
衷心講一句對唔住，
放心啦，
我知你報u係排咩次序，
到時我會改架喇，
盡量唔會喺你面前出現，
你當我再自私多一次，
我真係唔可以長期對住你而唔一齊呀，
對你對我都唔係一件好事，
謀事在人成事就睇天喇，
真係咁啱一樣的話，
我會自己諗辦法架喇，
可能九年之後嘅你會好唔鍾意呢段歲月，
不過你問我，
由始至終都係得一個答案，
呢十一個月入面，
係我人生入面過得最快樂嘅十一個月，
遺憾唔可以長相廝守，
可能咁就係人生，
有得就有失，
其實有一刻諗過你會唔會偷睇我呢封信，
如果係咁嘅話會點呢，
我真係唔知，
冇咩可以再講喇，
放心啦我一定唔會轉電話號碼，
等緊你打過嚟呀，
你就當我用咗九年，
去換你一次嘅答應，
可唔可以呀?
九年之後嘅傑仔，
真係真係去到最後，
唔知你重有冇繼續聽衛蘭啦，
我想送首歌俾你，
呢一首，
係佢咁多首歌入面我最鍾意嘅，
你有冇聽過都好，
呢一刻我都好想喺度分享，
比我想像中多字，
或者就係因為，
比我想像中愛你。
別怕 你舊日再好 到今天還有甚麼好
還是我愛你愛到想不到的 幅度
在你手得到放生 還太早
但怕 你就是最好
我會鄙視我 難醫好
寧願你變化到擦身都不可 認到
若你張開了兩手 也別抱」
睇完之後，
我真係好想問你一句，
心要幾灰 至做到
衛蘭-比我想像中愛你
https://www.youtube.com/watch?v=PcyEzp2K1zo