[校園][純愛]《幸運星下的預言》: 第一百二十二章

冇幾耐映彤跟住我一齊行出嚟

映彤:「冇野呀嘛你

出句聲啦」

我:「冇呀」

跟住我一路行，



直接去到海旁就停低

跟住搵個位坐

可能睇戲睇得多掛，

想靜嗰陣淨係諗到海旁

映彤佢就坐我隔離



映彤:「唔好忍呀

有咩想講就講，想喊就喊啦」

我:「多謝你今日同我講」

映彤:「好驚你呀依家

識咗你五六年未見過你呢個反應」



我:「如果唔係今日親眼見到，

我應該繼續喺度呃緊自己」

映彤:「下

繼續呃緊自己即係

你一早發現有唔妥」

我:「調返轉丫

Felix減少同你去街，

又唔再錫嘴淨係錫面



即使出街都冇乜話題，

你覺得你發唔發現到」

映彤:「唔怪得你咁信我啦

我一打俾你，

你問都冇問就行過嚟

通常例牌都會講我女朋友唔會出賣我之類嘅說話

原來你一早發現有問題，



你唔同我講」

我:「同你講有q用咩

你話結果唔同就話啫」

映彤:「如果今日冇發生呢件事

又或者我睇到但係唔同你講，

咁你會點」

我:「繼續呃自己囉

所以好多謝你今日整醒我」



映彤:「我都估唔到佢係咁嘅人

最唔鍾意就係背叛愛情嘅人

唔鍾意又唔講喎重要當人水泡。」

我:「咁你又唔使咁鬧佢」

映彤:「去到依家你重幫住佢」

我:「咁佢都係背叛我啫，

唔關你事架」



映彤:「一向都唔鍾意呢啲人

佢真係犀利，

我識佢咁耐都唔知佢係咁嘅人

唉」

我:「我同佢曾經咁近夠唔知啦

你冇咗個姊妹我冇咗個女朋友」

映彤:「點呀你

真係唔喊

我知你頭先死忍」


講真嗰句，

分手又點會唔喊

除非你完全唔鍾意佢啫

不過好明顯我唔係啦

咁我點解唔喊

其實都係自己性格問題，

一直以嚟我都唔會喺其他人面前表露最真實嘅情感

正如我之前所講，

可能覺得咁樣太暴露

我係極度缺乏安全感嘅人

表露無遺呢四個字同我應該係絕緣

所以嗰一刻即使好想喊，

我都決定忍落去

我:「冇野呀」

映彤:「我膊頭好舒服架喎

今日破例一次咋，

真係唔要」

我:「唔使喇

多謝你好意喇」

映彤:「咁之後諗住點呀

grad din同埋拎成績表嗰陣你會見到佢喎」

我:「當冇野囉唔係點呀

死纏爛打只會繼續削減自己尊嚴，

一直都係替代品咋

唔好自視咁高以為可以搶返嚟」

映彤:「唔好咁啦

下個會更好呢」

我:「多謝你先囉」

映彤:「你今日多謝咗好多次喇

唔慣你咁客氣呀」

我:「係喎講起成績表

你係咪話想同我地同一間u

呀唔係，

應該唔係話我地，

而係我同埋筱瑜」

映彤:「係呀」

我:「我驚我成績冇你咁好喎」

映彤:「你得嘅

唔使怕到時姐姐喺你隔離

如果佢都入嚟嘅話」

我:「到時先算啦」

嗰日映彤陪到我夜晚食飯，

臨走佢都話

映彤:「唔阻你一個人喊喇」

我:「屌」

丫，

其實佢都幾了解我

直至入去我間房門之前，

一直都將自己嘅情緒隱藏

你知啦我老母知道邊個係筱瑜

我又未準備好同佢講話我兩個已經分手

佢問起先算啦，

砰，

沖完涼閂埋門之後

電腦都冇開就即刻上床，

瞇埋眼漆黑一片，

冇幾耐個嘴角就feel到有啲水滴落嚟

溫度好暖，

或者呢個係對我嘅安慰啦

考完試唔係開心嘅咩，

點解我今日會咁樣

佢都算重本同埋有效率

正式考完試嗰陣唔夠一個鐘

即刻送份大禮

我喺度諗係咪自己唔夠好

所以佢唔要我，

晏晝我就想保留僅餘嘅尊嚴

依家空無一人，

醜態百出都唔怕

大家都講過好多好多承諾

以為可以一步一步實現，

點知一年都未夠，

我就已經被離場

知唔知嗰陣我個腦嘅片段

全部都係圍繞住佢，

聽到嘅亦都只有佢把聲

明明嗰陣咁瀟灑頭也不回走出商場門口，

點解依家都係咁樣

我好想問一句不過真係唔敢問，

唔係話一齊行落去嘅咩

或者真係未參透何謂愛情

依家要為當時嘅胡言亂語負責，

一路喊我就一路諗返同佢嘅經過

初見，相識去到後來拍拖，

直至今日分手，

我就係知道依家腦入面嘅片段將會成為絕響

以後都唔會再發生

只會成為一件歷史，

一件永遠唔能夠被磨滅嘅歷史

最諷刺嘅係，

我依家攬住嗰隻鬆弛熊，

就係佢送俾我嘅禮物

睇嚟佢真係早有準備

幾個月前已經諗定，

哈哈我講笑啫，

至少呢個答案我永遠都唔可以確認

喊到冇力嘅時候，

我同自己講聽日就開始重新出發，

可能你地覺得好中二病

不過呢個係我當時最真實嘅諗法，

一定要逼自己唔記得

留戀一個冇可能再一齊嘅人，

只會係無底深潭嘅痛苦。