[校園][純愛]《幸運星下的預言》: 第一百二十三章

第二日一起身

冇乜特別正正常常咁樣，

刷牙洗面

悶悶地咪去街

一切同未考試之前相差無幾



當然啦依家唔使溫書，

時間鬆動唔少

唔使再將啲活動塞得咁密集

書同埋唔使溫書真係差好遠

一個人都冇乜問題啫



其實依家都係回復11個月之前嘅生活啫

十幾年嚟我咪又係咁樣過，

點會係一個大問題呢

側邊朋友都好識做

自從嗰日之後，



就冇人再提嗰個人

不論係佢個名，

定係佢嘅野，

全部人都冇講

我亦都冇去了解

嗰陣我同自己講，

關我鬼事咩

放低咗就放低咗



何必要走返入去

咁樣咪成世都放唔低

係呀，

嗰陣嘅我真係有呢個諗法

聽唔到睇唔到見唔到

再加埋自己暗中提住，

咁就可以放低



當係乜事都冇發生過

係啱係錯

依家真係答唔到

隔咁短又點會知呢

啱啱先過咗一日，

呀澤司徒同埋映彤佢地點諗我知嘅

不過男人老狗唔敢講出口啫

咁鬼肉麻啱唔啱先



自己知呢班朋友咁有心咁就夠

成日帶我去邊度玩

係有時玩完食完之後要俾錢

拎個銀包出嚟嘅時候，

唔覺意諗咗好多無聊野

有冇考慮過揼

哈哈，



咁又冇喎，

我係咁同自己講，

真正放低就係正視佢

點解要因為佢送就唔要

今日諗起無聊野啫

聽日可能唔會諗呢

我相信人係善忘嘅

幾日幾個月甚至幾年，

總有一日會唔再諗起

同埋無啦啦將佢送嗰啲野，

包括鬆弛熊，幸運星同埋個銀包

全部唔要嘅話咪好浪費囉

我呢啲毒撚又唔係好多人sms我

大把位啦唔需要夾硬delete

你知啦考完試好多時間

冇野做嗰陣將嗰啲相同埋傾計紀錄全部backup

我真係唔係特登去做

實在太無聊

上得多高登都悶啦

出街又咁鬼熱

更加唔好講part time

我懶到出汁大家都知

再加上一條友唔係好等錢洗

屋企又唔等我開飯喎

晏晝瞓覺我又驚夜晚瞓唔著

冇野做之下，

唯有將所有野backup

Backup完再望一望枱頭嗰啲玻璃樽

有排啦重有九年

都係唔好望咁耐

一陣老母又以為佢個仔唔知咩事

點解隻眼又紅晒，

一定係有沙入眼。


放榜之前一個禮拜五

就係謝師宴舉行嘅日子

真係麻鬼煩又要著老西

我本身有件不過係細個做花仔嗰陣著嘅

咁樣依家又點會啱

於是嗰個禮拜就出去買

我諗住自己買

點知映彤佢話陪我去買喎

因為Felix佢都未買

所以話不如一齊去啦咁樣

咁我梗係冇所謂啦，

都好嘅有個女仔幫手睇

如果單獨就梗係唔好啦費事俾人誤會

我同佢梗係知道冇野

真係變咗好friend嗰種關係

佢男朋友點睇呢，

我最唔鍾意就係第三者

既然Felix都出嚟咁就最好

整完一輪終於買完，

咁就各自歸家

返到去都係打機啦

玩幾個鐘就瞓覺因為都好攰

上到床漆黑一片

我喺呢個環境真係好脆弱，

腦入面完全浮現最真實嘅諗法

我都真係唔想不過冇辦法，

真係環境問題，

唉，

識佢咁耐，

都未試過成個月冇見

聽日係第一次，

究竟會點呢

而且，

萬一大家將來唔同u

我知道以後就唔止一個月冇見

隔幾耐呢一刻我都答你唔到，

咁都好嘅

呢個月咪當係俾我提早適應

好多野都係講習慣嘅啫

我呢條友真係冇口齒，

咁快又諗無聊野

瞓唔著咪諗埋聽日點做囉

所以話自己真係好廢

越唔想記起，

偏偏就越記得。