[校園][純愛]《幸運星下的預言》: 第一百零八章

我:「係喎你份手信呢」

筱瑜:「返到屋企先啦

喺屋企呀」

我:「就到喇喎

俾啲貼士」



筱瑜:「係喎

你喺度等我啦

我轉頭落嚟

總之好得意啦

好快你就知」



去到呢刻真係有啲期待佢拎咩落嚟

幾分鐘之後就見到佢拎住個大公仔

冇認錯嘅話好似就係佢好鍾意嗰隻鬆弛熊

個公仔真係幾大

成個人咁大就誇張啲



不過有半個真係唔出奇

筱瑜:「係咪好得意先」

我:「好撚過癮呀」

筱瑜:「送俾你

新年快樂呀

重有，

最近呢半年以嚟，

好多謝有你呢位男朋友喺我隔離」



我:「咁大隻我要諗下點樣放佢」

筱瑜:「擺喺張床咪得囉」

我:「又係喎

一齊瞓覺

係咪好易洗」

筱瑜:「你拎去洗衣舖嗰度就得

好方便咋



講明呀唔准唔要呀

話晒都係半週年紀念禮物」

我:「你送到一定要啦」

筱瑜:「真係好鍾意」

我:「好鍾意

又咁好彩我屋企就冇公仔嘅

咁就一定夠位擺啦

有隻野陪我一齊瞓覺都唔錯」



筱瑜:「人地有名架

鬆弛熊

記住知唔知」

我:「遵命

原諒我冇接觸呢方面嗰啲資訊

亂咁噏用『隻野』去形容佢」

跟住即刻錫佢一啖



我:「呢個道歉係咪好有誠意先」

筱瑜:「搞錯呀又偷錫人」

我:「紅卜卜又咁靚女

唔錫你錫邊個

總之我一定保存得妥妥當當」

筱瑜:「信住先」

我都冇數過擺咗幾多年

直至到依家，

總之以後我每一次換床，

個條件就係一定要擺得落佢

唔到我唔咁樣做

因為唔會再買得返，

就算搵到隻一樣，

嗰隻都唔會再有人類最渺小嘅感情存在，

就係咁先珍貴。


跟住落嚟每個人都係差唔多

目標只有一個

就係為A-Level做好準備

記得嗰年一月尾就放新年假

而放完新年假呢

就係study leave嘅時間

如果放完新年假之後

你之後唔再返去學校溫書嘅話呢

就要等到放榜嗰日先再返學校

去到當日

竟然有唔少老師都好感性

都係講嗰啲肺腑之言啦

有一兩個喊晒口

唔理佢地係咪扮野啦

出現呢個畫面

對我嚟講係有啲意料之外

直至響起放學嘅鐘聲

嗰刻我就意識到，

明天以後，

就唔會再聽到一個咁好聽嘅聲

梗係好聽啦，

以前不知幾期待呢個鐘聲

因為一響就等於放學

即刻執定書包

跟住就一支箭衝出去班房

原本我以為自己唔會留戀，

但係嗰日我居然一反常態

第一次主動留喺度聽完成段鐘聲

不過時間絕對唔會低頭，

既然開始得，

就自然有終結嘅時候

直至十幾秒之後，

一片寂寥，

原來，

我係會有一日咁唔想聽到呢個鐘聲

咁唔想離開呢間學校

或者六年真係唔係白過嘅，

當然啦，

我都係扮灑脫嗰啲戇鳩仔

閒談幾句之後就離開班房

唔想喺咁多人面前表露依依不捨之情

當然啦，

對住女朋友就梗係冇收埋

同埋佢嗰刻嘅情緒同我差唔多

筱瑜:「過埋今日

我地就唔可以再著住中學校服一齊返學同埋一齊放學」

我:「係囉

就算再繼續著，

個意義都唔同」

筱瑜:「好少見你呢個樣喎」

我:「假假地都喺度六年

我又做唔到完全唔投放感情」

筱瑜:「正常嘅我地都係人

好難每一刻都咁客觀」

我:「知唔知頭先我係第一次主動去聽成段鐘聲

你知我啦又唔會返去溫書嘅

可能以後都冇得聽」

以前實在係太細個

唔知點樣面對離別呢個問題，

但其實人大咗閱歷深咗，

呢樣野根本就唔難面對

因為唔到你選擇唔面對

形勢所迫之下你自然會學識，

你唔願意佢都會行埋嚟搵你

避無可避，

筱瑜:「壞學生

平時一放學就即刻走」

我:「痴線咁都叫壞學生」

筱瑜:「唔係點會未聽過成段鐘聲呀」

我:「你又唔怪得我喎

因為我知有個女仔等緊我過去佢班房囉」

筱瑜:「係咩

邊個呀

原來你偷偷地出去識女仔」

我:「邊個就唔講啦

佢聽到就會知我講邊個

係咪呀」

筱瑜:「唔知喎

可能係掛」

跟住佢就跑走咗

我當然追住佢啦

直至平排就手牽手

一齊行返去屋企

六年前中一開學禮隔離係邊個，

我唔記得，

只係知道六年後嘅今日，

最後一次著住校服踏出門口嗰陣

隔離嘅係筱瑜

當時，

我認為如果今年9月真係入到u，

佢依然會喺我身旁

地點有任何變化都好，

隔離嗰位都只會係佢

嗰一刻，

我係連半點猶豫都冇。