[校園][純愛]《幸運星下的預言》: 第一百零九章

新年假都係一樣

都係用兩個字可以講完

就係溫書

間唔中會同筱瑜落去自修室溫書嘅

如果唔同佢溫就自己喺屋企溫



呀澤佢條友鍾意自己溫

既然係咁就唔打攪佢啦

當然啦去到夜晚都要放鬆幾個鐘啦

都係幾鋪啫唔係好過分

呀澤:「筱瑜咁好嘅



咁耐以嚟從來都唔會夜晚搵你

唔會搞到冇得打機」

我:「佢自己講嘅

每個人都有私人時間

拍拖大撚晒咩」



呀澤:「我就唔信佢咁講」

我:「佢話拍拖唔係大晒呀

用字方面有啲分別啫」

呀澤:「又喺度曬命我屌」

我:「痴線你自己唔拍啫」

好似冇乜喺度介紹呢位老友

趁依家少少時間可以講下

其實佢係白白淨淨高高瘦瘦嗰種人



望落去係乖學生咁嘅款

私底下梗係知唔係啦

都唔知幾多陰濕野喺個腦度

不過唔會表達出嚟咁解

讀緊中學嗰陣其實有女仔想同佢發展

係佢自己唔要啫

我好記得有一次，



我同佢食飯跟住去球場飲幾罐啤酒

跟住開始講一啲平時唔會講嘅話題

我:「做乜唔要Catherine

其實幾靚女丫」

Catherine就係主動溝佢嗰個女仔

呀澤:「其實係任何立場嚟講呢

我都應該受溝」

我:「跟住呢」



呀澤:「學你話齋其實我都覺得佢幾靚

呃蝦條你話我仆街都會架喇

甚至乎好多人都講，

要忘記一個人就要搵另一個去填補

Catherine出現個時機都啱啱好，

你話係咪任何層面上面都冇理由拒絕丫」

呀澤平時從來唔會講呢啲話題



我亦都知佢唔會講所以平時都冇問佢

我係佢講先知，

原來佢重好掛住佢個初戀

呀澤:「哈

原來唔得喎，

睇嚟依家仲未夠仆街

要繼續努力呀」

我:「係嘅

要放低一個人從來都係講就易。」

嗰陣我重未識筱瑜

應該重係對映彤有好感嗰個階段

呀澤:「大佬

依家唔明唔緊要，

我賭撚，

第日一定會明

記住，

他日打死都要做仆街」

我:「好好好

你講我實聽

返去喇係咪呀」

呀澤:「返去喇屌有啲眼瞓」

我飲酒就好奇怪嘅

事關我飲完之後完全唔會high

我當自己真係唔掂，

飲大咗，

醉後個反應係會變得更加靜

而唔係一般人嘅興奮

或者會有啲呆滯

不過對答係完全冇問題

咁嘅反應同人飲邊度過癮丫

所以平時都係同一啲傾開計嘅朋友先飲

我反而享受呢種時間多過成班人飲到high晒

講返嗰陣先

其實嗰刻佢講嘅野冇乜概念

好記得佢講乜但係唔明白點解咁講

都係嗰句啦

時間絕對有能力逼你學識。


去到二月幾，

距離第一科中化重有個幾月

我唔計口試啦哈哈

其實四十幾五十日絕對唔係多

講得衰啲眨下眼就過

所以可以做嘅，

就只有加強準備

冇其他方法

記得嗰排應筱瑜要求

去自修室嘅頻率真係密咗，

人果然犯賤

迫在眉睫先至識驚

筱瑜:「放心啦冇問題嘅

照依家進度你唔使擔心呀」

我:「梗係啦日溫夜溫

真係開夜車呀呢排」

筱瑜:「我都見到

記住唔使咁大壓力

你依家嘅情況絕對好樂觀

唔使咁擔心」

我:「都係你教得好啫」

筱瑜:「唔使擦鞋喇

去食野啦」

跟住我地就行前

原本拖住手，

突然間見到佢鬆開

呆咗咁樣望前面

重聽到佢好細聲咁講

筱瑜:「點解佢喺度嘅」

我:「做咩呀」

筱瑜:「冇野呀」

嗰陣冇第二條路，

即是話唔可以轉左轉右

冇幾耐就聽到前面有個人叫筱瑜個名

筱瑜:「媽咪點解你喺度嘅」

原來個女人係筱瑜呀媽

筱瑜呀媽:「留咗野未返嚟攞囉

隔離呢位男仔係」

我:「你好呀auntie

你叫我做傑仔丫」

既然筱瑜因為見到佢呀媽就即刻鬆開手

即係話佢呀媽唔知我同佢個女拍拖啦

如果知嘅話使乜咁樣做

有見及此我淨係講自己咩名就算

筱瑜呀媽:「你好呀傑仔

你同筱瑜好friend呀」

我:「一齊溫書啫」

筱瑜呀媽:「唔緊要喎我都後生過

我都知咩心態，

下次如果自修室冇位

上嚟屋企都唔緊要呀

好喇我要趕返公司

拜拜」

筱瑜，我:「拜拜」

跟住佢媽咪就走咗，

筱瑜一路望住佢媽咪個方向

直至消失於人海中先望返前面

筱瑜:「走咯

去食飯」

我:「好呀」

以我對筱瑜嘅印象

睇得出佢好驚佢呀媽

不過唔係丫我見佢呀媽好友善

或者家家有本難念的經啦

我呢啲外人唔知咁多架喇。