[校園][純愛]《幸運星下的預言》: 第一百零五章

話咁快就落到車

我:「你想喺邊度食」

筱瑜:「附近咪有個商場嘅

不如去嗰邊

有得坐喺度附近又有垃圾桶」



我:「你話點咪點囉」

筱瑜:「咁我喺樓下等你啦」

我:「嗯」

跟住我就一支箭衝返上去屋企

打開道房門



再喺櫃桶嗰度攞條鏈出嚟

然之後先去雪櫃拎蛋糕

搞掂晒

同完老豆老母交代之後就走人

跟住直接跑樓梯落返去



費事要筱瑜等咁耐啦

筱瑜:「好快喎」

我:「梗係啦

點可以要我女朋友喺度食咁耐風呢」

真係唔好意思呀

如果你頭先跟我上去就會俾你拆穿個驚喜

做咁多野都係想守護住一樣咁無聊嘅玩意

好彩嗰晚都唔大風



一定冇上年咁凍

筱瑜:「唔緊要啦

又係我話喺度等嘅」

我:「我屋企兩個都算開明

下次可以上嚟嘅」

筱瑜:「拐帶少女

變態佬你有咩目的」



我:「你話呢

唔通上嚟做功課咩」

筱瑜:「好得人驚呀你個樣」

我:「係呀

你依家真係小心啲

特別係夜闌人靜嗰陣」

筱瑜:「好彩知你講笑咋

如果唔係俾人聽到以為你真係變態佬」



我:「你又知我係講笑」

筱瑜:「你唔會咁做嘅」

我:「痴線

小妹妹你太簡單喇」

筱瑜:「因為你係最錫我嘅男朋友丫嘛

係咪先」

佢成日都係咁



每次講笑都唔夠佢講

講到最後佢就講呢類說話

有咩辦法唔係佢贏丫。


去到有位坐隔離又唔多人

咁就梗係食啦

個蛋糕二人份量

當然我見佢咁鍾意食

梗係俾多啲佢

藍莓cheese cake有幾重要丫

食少啲有咩所謂

筱瑜:「你夠唔夠架」

我:「夠喇你食啦」

筱瑜:「立心不良

講係咪想谷肥我」

我:「梗係啦你依家咁靚

搞到身邊咁多狂蜂浪蝶

唔做野點得呀」

筱瑜:「原來真係有陰謀

到時變肥婆冇人要呀」

我:「即係話我唔係人」

筱瑜:「點知你呀成日得把口」

我:「我知你都係想聽

衰得過我又肯講喎」

筱瑜:「痴線」

我:「大肥婆又好點都好啦

變到點都係咁鍾意你

咁唔好彩到時你唔鍾意我，

都唔會影響我鍾唔鍾意你」

筱瑜:「唔會唔鍾意呀」

我:「如果我同你講重有禮物

你信唔信」

筱瑜:「下」

跟住我即刻拎條頸鏈出嚟

佢成個人呆晒

然之後特登兜佢後面幫佢戴

順便喺佢耳仔邊細細聲講

我:「唔好傻啦

點會唔記得今日係半年紀念日呀

唔係咁樣做邊有驚喜

送俾你」

筱瑜:「好衰呀特登喺度扮」

我:「我知你丫

以為我唔記得丫嘛

套我口風以為我唔記得

唔好扮冇呀我睇住呀」

筱瑜:「明明已經接受咗你唔記得囉

點估到你無啦啦咁做」

我:「唔係咩叫驚喜

你睇下個吊咀

寫咗我同你個名呀」

跟住佢即刻攬埋嚟

今次到佢喺我耳仔邊細細聲講

筱瑜:「唔計屋企人冇一個好似你對我咁好

多謝你呀，

我最鍾意嘅男朋友」

我:「鍾唔鍾意呀

唔鍾意可以講喎送過第二樣」

筱瑜:「你送乜我都鍾意

同埋有我地個名，

咁就唔驚搵唔返啦

日日戴住喺身

不過下次唔好買咁貴喇

唔想你為咗我搞到用咁多錢

依家大家都係學生」

我:「我淨係知送乜俾你都係天經地義」

跟住佢就一啖咀埋嚟

冇記錯今次應該錫咗好耐

我:「飽就行喇」

筱瑜:「好

拖住我丫無啦啦唔記得點樣行呀」

佢好少咁嗲

咁咪好囉呢啲係應有嘅福利

漆黑之中

兩個人十指緊扣，

一齊行返去屋企

就係咁，

我同佢唯一一次慶祝嘅拍拖紀念日，

順利落幕。