[校園][純愛]《幸運星下的預言》: 第一百章

今年聖誕節相當有意義

除咗係我同佢第一次用男女朋友身分渡過之外

亦都係拍拖半年嘅紀念日

呢啲咁嘅紀念日，

每段愛情都只係得一次



半年呀一年呀

好彩嘅話可以一直紀念落去添

大個之後諗多咗，

就會發覺其實每個紀念日都有可能係最後一次

唔好話一年，



半年之後，

隔離嗰個重係咪佢

又有邊個可以肯定呢

每日都喺度轉變

大家嘅步伐敢唔敢講永遠都一致



唔係話想放負，

只係依家唔會再好似以前咁，

將呢樣野諗得咁簡單啫

至於當時我又用咩心態去面對呢件事

梗係冇依家咁複雜啦

淨係覺得大家相處得好好

半年紀念日確實係得一次

下次慶祝就係一年



跟住年半。兩年如此類推

同埋佢都係女仔，

睇電視劇都知

十個女仔有九個都相當重視呢啲日子

既然係咁我又點可以令自己女朋友失望

又咁好彩喎

自己都係呢種人



好記得邊個日子打邊個日子

嗰日做過啲乜咁樣

直至依家都係，

有時自己無聊

睇返同邊個邊個嘅whatsapp

都隱約記得嗰日發生咩事

由細到大都冇變過，

所以點會好似嗰啲戇鳩仔咁，



唔記得邊日打邊日

呢啲真係彌天大罪

女朋友平日點樣大方都好

我諗嗰刻都總會有一絲唔開心

尤其係以前冇咁複雜嘅愛情呢

講完一輪廢話，

都知我幾重視呢個半年嘅紀念日啦。




唔好話我話

嗰陣我地真係好似拍劇咁

點解咁講

有一日佢無啦啦問我，

筱瑜:「知唔知下個禮拜係咩日子」

我:「聖誕節囉唔係咩呀

今年同你第一次用男女朋友身分過聖誕喎

我好記得架」

筱瑜:「哦

係囉我咪就係話聖誕節囉」

佢個反應話俾我知

呢個答案唔係佢預期嘅答案

咁我亦都知佢想我答乜

不過為咗俾驚喜佢，

依家要扮唔知啦

我:「唔係聖誕節咩」

筱瑜:「係呀

冇問題呀」

我:「我好重視今次聖誕

因為係第一次拖住手過」

筱瑜:「又唔記得

上年咪拖咗囉」

我:「上年唔計啦

嗰陣都唔係光明正大拖住

邊似得依家咁樣」

筱瑜:「咁又係呀

咪住先

你講到上年唔係光明正大咁嘅」

我:「有人扮凍想捉住囉」

筱瑜:「嗰個係咪你呀」

我:「唔知喎唔記得咗喇喎

佢好鍾意唔認

冇計啦鬼叫我係女朋友咩

我一定包容佢架」

筱瑜:「痴線喺度歪曲事實」

我:「唔緊要喎隔離冇人

脆脆地認咗佢」

筱瑜:「唔知呀」

我:「放心啦

我好重視我地第一個聖誕節

之後每一年每一個都係」

筱瑜:「聽住先」

我:「唔信呀」

筱瑜:「信你呀」

我:「有得你唔信咩」

筱瑜:「嗯」

梗係要俾啲甜頭佢啦

頭先扮唔知搞到佢好似有啲啲唔開心咁樣

其實唔係好覺眼嘅

係我同佢咁熟先留意到少少跡象啫

一路講就梗係一路摸住佢個頭

個感覺真係好正。