[校園][純愛]《幸運星下的預言》: 第九十九章

當個波一離手

我同全部人一樣

視線都係離不開嘅籃球

自問投射個姿勢

就梗係唔好啦



邊有練過啲乜

至於入唔入到網，

咁就唔敢講

起碼唔係完全離譜框都唔中嗰種

嗰陣我少有地咁奢侈，



做咗咁耐人都冇幾可會咁樣

竟然希望個世界會有心想事成呢回事

我重好無知咁樣諗，

唔係丫咁耐以嚟我都好少咁過分

一次咁多好冇呀



喺我諗咁多野嘅時候，

其實個世界都喺度轉緊

個波始終都係會墜落去

真係打機咁樣咩成集都唔落去

遺憾地，

個籃球並唔係清風送爽咁穿過個網

而係打中左邊個框

「嘭」一聲，



我都諗住冇希望架喇

點知佢又唔係喎，

個波未跌出個框外

佢彈返去右邊，

冇乜野求只係希望彈返中間入網就得

人去到絕境果然更加貪心

一個願望未果，



匆匆再許下另一個願望

但係，

如果心想就事成嘅話，

我地今日就唔會知何謂後悔

呢個字應該同我地絕緣，

哈

唔好玩啦

彈返去右邊之後，



個球再中一次框

撞完左邊撞右邊

跟住，

就跌返落地下

從來都冇穿過個網，

成敗關鍵只係在於幾厘米

而呢個時候，



場比賽正式落幕

成王敗寇，

依家呢個場合只係屬於勝利者，

對面亦都盡享應該有嘅權利

走晒入嚟操場慶祝，

而作為失敗者嘅我，

只可以黯然離場

就連個頭，

都唔敢抬高。


自從主席因傷離場後

我地就由領先變落後，

話就話只係輸兩分，

不過輸終歸都係輸

幾多分都冇分別，

邊個係罪人唔多講啦

講真嘅，

佢地指住我嚟鬧的話，

我絕對唔會還口

當然打就唔好啦我就一定走先

因為我都知係自己問題

最好笑佢地竟然冇鬧我，

話唔緊要啦有季軍戰

主席重講到下次一定出到

今日係佢問題唔好意思，

如果係平時我一定潤佢扮晒野

不過嗰刻真係唔敢再出聲

我寧願俾佢地鬧

中學生涯最後一場嘅比賽就咁樣俾我斷送，

呢個後果我真係唔敢擔當

嗰陣腦入面有好多個如果，

不過再多都於事無補，

反正冇得由頭開始過，

所以都費事講出聲

一直我都以為自己唔重視，

不過打打下原來真係會投入咗落去

見到一班隊友同埋支持嘅人咁落力，

的而且確受到佢地感染

好想贏到場波，

當時有個好低能嘅心態

就係想做一件光彩事，

可以講足幾十年嗰種

起碼嗰球入咗，

十幾年後約出嚟再聚嘅時候

我都重可以話靠我先可以反勝

唔係話真係咁光彩不過起碼正面先囉

依家唔得啦哈哈

跟住佢地話換衫，

我就唔好意思一齊入去啦

所以就坐喺度多一陣

順便抖順條氣，

幾分鐘之後我見到有個人行過嚟

眼尾望過去見到對鞋就知邊個

嗰陣基本上日日見呀大佬

對鞋就梗係認得啦

你估真係乜都唔留意咩

我:「做咩呀

返上去上堂啦就快打鐘」

筱瑜:「做咩呀

頭先打得好好呀

平時冇打開臨危受命都拎到分

真係覺得好叻仔

唔係講笑擦你鞋」

我:「四十幾分入面拎得兩分丫嘛

早知真係練多啲

依家因為我呢條友搞到入唔到決賽

佢地重要唔鬧我，

冇試過咁想俾人鬧」

筱瑜:「邊有得咁講架

我知依家叫你唔好唔開心即係廢話

但就算係廢話都想咁講」

我:「得呀冇嘢喇

抖多陣我就上返去」

幾秒之後佢成個人從背面攬住我

我:「唔驚俾人見到咩

咁樣就水洗都唔清喇

重有我啱啱打完波污糟呀」

筱瑜:「我乜都唔知，

我淨係知我男朋友依家唔開心，

作為女朋友我淨係想咁樣做

俾人見到就俾人見到

人地點講係人地嘅事」

嗰刻我真係冇諗過佢咁樣做

一直以嚟我同佢喺學校都安分守己

當然喺枱底會拖手

但從來唔會公開做情侶嘅行為

對局外人嚟講呢下只係擁抱，

不過對我而言就唔係，

呢個係身份嘅象徵

或者冇人睇到，

不過佢講嗰番說話話俾我知，

俾人見到都唔驚

你當我大男人啦，

唔想喺自己女朋友面前唔開心

又唔想因為我咁樣搞到佢唔開心

所以我都即刻扮到好積極咁樣

我:「冇野喇

多謝」

筱瑜:「真係冇野」

我:「原本有架

你攬完就冇

你啲正能量太強」

筱瑜:「痴線」

我:「其實我特登扮野囉

唔係咁樣扮你點會喺呢度都攬住我」

筱瑜:「唔知你係咪真啦

總之我見到你唔開心絕對唔會坐視不理

你條友成日都唔講出嚟嘅

攬應該係一個唔錯嘅溝通方法」

我:「真係抵錫」

筱瑜:「返去上堂喇」

我:「一齊

要拖住手嘅」

筱瑜:「麻煩

行啦」

跟住佢就拎咗隻手出嚟俾我捉住

嗯，

你以前曾經咁樣講過。