[校園][純愛]《幸運星下的預言》: 第九十六章

係咁咦講下打波嘅環節喇

我都唔敢講太多因為真係一竅不通

咁多年嚟都冇乜點玩

唔係呃你，

我淨係知幾時兩分幾時三分



就連走步我都唔敢講一定識

都係覺得係咁啦嗰種

要我詳細講咩叫走步咩叫冇走步

我諗都係一件好困難嘅事

咁你就知係咩一回事啦



你叫我做啦啦隊好過

起碼自己知做咩先

落去打真係不了

話說我地當年嗰個校內籃球比賽

原來有十幾廿隊玩



三隊一組打小組賽

打半個鐘

勝場最多就可以晉級

詳細嗰啲如果勝場一樣咁點呀

我真係答你唔到因為我冇理到

淨係話知呀係呀咁

叫我講多句都唔識

基本上我落到去換完衫就坐喺觀眾席嗰度



因為唔需要我出場

我見映彤好落力

Felix一拎到個波係咁話加油

Felix條友又唔知係咪睇得動漫多

入完波之後即刻望住球場外嘅映彤

喺度做啲佢兩個先明嘅手勢

唔係講笑真係好似拍戲咁樣



有冇唔抵得

咁梗係冇啦

唔係話自己唔想同筱瑜有呢種互動，

而係落到去真係戇鳩鳩咁樣

倒不如坐喺場邊一齊傾下計啦

順便講埋原來佢五個都幾打得

走籃呢啲基本野好純熟

主席條仆街仔原來係專射三分



佢打到好似揼垃圾咁樣

一起手就入

穿針更加係等閒之事

我諗住佢穿大針指住佢嚟笑

點知佢原來咁撚勁

願望落空啦

講都嘥氣



喺我隔離嘅筱瑜都睇得好認真

有時我地隊唔入都見佢喺度哎呀

落場嗰五個認真我一早知

係估唔到筱瑜佢地幾個冇份打一樣咁投入

同埋班女仔竟然識得多過我

無啦啦同我講拆你屋我都真係一頭霧水

高手果然在民間。


我地隊一直斬瓜切菜

用過五關斬六將去形容絕不過分

歷盡辛酸之下，

終於去到四強

我都係因為咁先知，

原來學校籃球隊水平好高

好多隊都打得好犀利

唔係贏咁簡單，

係講到點樣打

點解要咁樣打

咁打又有咩好處

部署好晒落到場又交足

咁先最難得

甚至上年負責我地學生會個老師

原來都係籃球健將，

俾到好多意見佢地

筱瑜:「今日贏咗你地就入決賽」

我:「佢地入啫唔係我

場場我都喺你隔離」

筱瑜:「咁你點都有喺份名單上面丫

我當你係喇」

我:「我最緊要有得呃牌

十年後邊個記得你有冇份打丫

有塊牌就唔同喇

任你鳩噏都冇人知」

筱瑜:「估到你係咁啦

今日睇埋佢」

因為呢個禮拜晏晝都要睇自組籃球比賽

所以我同佢都冇出去食飯

冇計啦好大機會係最後一次

唔通咁衰咒自己下年留班睇多鑊咩

雖然冇得咁放肆不過都冇所謂啦

跟住，

我突然間諗到啲野

唔好問我點解諗到

因為呢一刻我都答你唔到

可能係責任心作祟掛

點講都好都係同一隊，

依家我真係零付出

點都要做啲野嘅

到時他日真係有牌嗰陣，

起碼可以理直氣壯同人講我有貢獻丫

即使係啲啲都好過冇

咁究竟我諗到咩呢，

老實講句都唔係話啲乜

我呢條友諗啲野，

十樣有九樣都係唔正面架啦

我就覺得入得嚟四強

點會淨係好彩丫

對手冇咁上下實力都入唔到嚟

於是我就選擇用陰招

當時全部人換緊衫，

我就換得快啲

所以就行出嚟先

開波之前，

我地兩隊都需要喺球場入面

各自喺自己嘅半場

跟住我一望出去

又真係咁好彩，

佢地嗰邊半場後面有一堆草喺度

點解我會知呢邊係屬於佢地

因為我見到筱瑜佢地喺另一邊

我諗冇理由全部人搞錯方向掛

所以嗰一刻我就斷定，

後面有一堆草嗰邊，

就係對手嘅半場

我本身又唔係高又唔係大舊

我喺度諗住靜靜雞行過去

然之後踎低匿埋喺啲草度

靜雞雞偷聽敵人情報，

我都幾肯定佢地會講戰術

因為頭先換緊衫嗰陣，

已經見到對手拎咗啲戰術板

又有一堆紙

嗰條友話等埋班主任嚟到先講

於是我就有個概念

佢地講戰術嘅時候，

佢地班主任一定在場

跟住我都擔心，

佢地班主任會唔會入去更衣室

佢地跟住就喺入面講呢

係嘅話我聽條撚呀

好彩我知佢地個班主任係咩樣

大佬呀喺度六年唔知就死得啦

我就見到佢地個班主任已經喺操場等緊佢地

喺正我前面咁濟，

即係我顧慮嘅野唔會出現啦

等埋對面班球員嚟到

就會開始講戰術，

於是我就小心翼翼行去後面

唔係講笑真係放輕腳步咁樣行

又唔可以太大動作喎

一路行一路望住對面，

好喇，

知道佢地見唔到我喇

我就繼續行去佢地後面啲草嗰度

好彩嗰陣唔多人

支持佢地嗰班同學應該食緊飯未返到嚟

又或者喺操場食緊

總之在場只係得小貓幾隻

完全留意唔到後面其實係有條友喺度

去到目的地就梗係安頓啦，

跟住突然間feel到有目光望住我

我心諗唔係呀話咁都俾人見到

已經用盡一切方法，

盡量令腳步聲細聲啲架喇喎

咁都見到

跟住下意識望過去視線嗰邊，

我見到筱瑜o晒嘴

喺佢隔離嗰啲人都見我唔到

得佢一個呆咗咁樣望住。