[校園][純愛]《幸運星下的預言》: 第九十五章

唔知係咪最後一年啦

成班人對於今次個比賽相當重視

準備一絲不苟

幾時練波，邊度練波，

點樣去練，練啲乜



全部都有晒計劃

呢點之前係估唔到嘅

係咁咦講下個陣容啦

正選有五個

有喺度出過場嘅就有主席同埋映彤男朋友Felix



另外嗰三個唔係好特別所以唔使提

最後就係我呢條撚樣

冇記錯就嚟開波之前幾個禮拜，

佢地話不如一個禮拜練三日

佢地逢星期一，三，五卜咗室內籃球場



成班放完學就去練，

原本佢地話想出去練嘅

跟住我就喺度諗

室內籃球場有冷氣

咁梗係揀室內啦

好彩好多人都冇乜所謂

如果唔係真係柒到搵窿捐

關你咩事呀後備仔



咁就唔好啦

又好搞笑喎

筱瑜，映彤同埋副主席三個女仔都有嚟

佢地冇份打

淨係過嚟睇波同埋買飲品嗰啲雜項

我唔係成日練，

得閒我就會坐埋去同三個女仔吹水㗎喇



唔緊要啦我呢啲後備仔

唔係主力球員

佢地五個又咁鬼弗

點會咁易受傷丫

所以嗰度最求其嘅應該係我

筱瑜:「打打下又行過嚟嘅」

原本我想講掛住佢

點知副主席喺度而佢係唔知情



咁唯有收斂啲啦

我:「攰呀大佬

其實我都係保險啫，

邊有咁易受傷叫我落場

卡通咩大佬」

副主席:「唔係喎我聽佢地話

如果領先好多會俾你落去打」



我:「咪搞

垃圾時間落去冇撚用嘅

拎到幾多幾多分有q用咩

邊有人幫你數住

我就冇乜興趣用呢啲打飛機」

映彤:「冇句好

不過你講錯喇，

其實係會有人幫你數住」

講完之後佢隻眼望住筱瑜

呢條友公開玩抽水

好彩小弟面皮厚啫

我:「係咩邊個呀

我呢啲契弟邊有人幫我數住

主席就唔同喇

係咪呀副主席」

即刻交波俾第二個啦

輕鬆

副主席:「咩呀又關我事

總之我個個都幫手數」

講真唔係話我倒米

我叫主席搞咁耐都搞唔掂

睇嚟佢都係凍過水

傾計又要落返場喇

費事俾人見到以為我專登過嚟吹水唔係打波。


練完就各自歸家啦，

洗乾淨對手就同筱瑜返屋企喇

梗係要洗乾淨喇唔係點樣拖筱瑜

整污糟佢又唔好

筱瑜:「係喎冇聽過你玩運動嘅」

我:「你一望我就知啦

唔大隻又冇曬到黑

冇玩開運動喎

就算做運動都係一個人做」

筱瑜:「做咩呀」

我:「跑下步咁囉」

原本想講打J不過都係算啦

筱瑜:「唔悶咩」

我:「我做運動係為自己唔係為人

悶唔悶咪係咁

同你一齊跑唔係唔得不過我會分心」

筱瑜:「你真係好特別

好少聽男仔冇玩運動」

我:「梗係啦唔係點解你揀我

我以前有玩鋼琴架

早知就學埋去」

筱瑜:「我知丫

你之前講過話個miss好靚

後尾轉老師就冇學丫嘛」

我:「犀利咁都記得」

筱瑜:「梗係啦，

男朋友嘅野喎

身為女朋友點可以唔記得」

我:「真係抵錫」

筱瑜:「不過估唔到成班人今次咁認真

或者真係最後一年」

我:「係掛

佢地本身又打開波

我聽佢地成日話想拎返個牌」

筱瑜:「你呢

真係唔落場呀

想睇你打波呀哈哈」

我:「不了」

筱瑜其中一個好嘅地方，

就係從來都唔會迫我

當然唔計玩嗰啲啦

我講一次唔想做

佢就唔會再講落去

我:「你諗下打開籃球嗰班契弟

個個好似食咗大力菜咁樣周身都係肌肉

除非真係有人整到落唔到場

如果唔係我都唔會落去

我做其他野都好好睇嘅」

筱瑜:「自大鬼」

我:「我成日覺得自己錫人都好好睇」

筱瑜:「係咩

唔係好覺喎」

跟住摸一摸佢個頭再錫落去

我:「講咗好好睇啦」

筱瑜:「嗯

最好睇係你喇

咁好啦我返屋企喇拜拜」

基本上成日都係咁玩