[校園][純愛]《幸運星下的預言》: 第九十七章

同佢對完眼之後

佢喺度忍笑

即係扮唔望過嚟嗰啲呢

但係稍為認真留意下就知有古怪

嗰陣佢就係呢個樣



算佢叻女冇踢爆我

跟住將注意力擺返喺球場嗰度

我淨係知出面睇下有咩風吹草動

都唔可以錯過

如果唔係我過嚟做乜



冇幾耐終於見到我想見嘅畫面

對面啲球員過晒嚟，

拎晒戰術板重有幾樣材料

不得不佩服佢嘅認真

依家睇返會覺得好無聊



校內比賽使乜咁緊張

又呢樣又嗰樣

我就唔會喇

不過嗰陣睇就覺得呢件事可以稱得上熱血

我唔係講我呀，

我講佢地成班人對住比賽嘅態度

講真丫我用熱血嚟形容自己咁嘅行為

你地都唔同意啦



我有自知之明嘅

純粹都係想貢獻少少野咁解啫

鬼叫自己冇料咩

咪要用埋啲旁門左道嘅招囉

有得揀邊個唔想落場光明正大贏

自己知自己事啦

之後我再將注意力集中晒喺隻耳度



聽唔到就等於前功盡廢

今次皇天終於不負有心人

佢地真係喺度講

依家大約講返出嚟啦

老師:「今次個對手強過之前對過嗰啲

你地都知架啦」

a:「係呀

對面主力應該係Felix



使唔使兩個睇住佢」

b:「7號都有啲料

速度快

夠大隻但係又唔鈍

睇佢地幾場後上插入嗰個通常都係佢

特別係Felix一拉邊，

上嚟接嗰個就係7號」



老師:「重點睇住呢兩個啦

特別係Felix」

b:「乜唔係7號咩

又快又大隻又高」

a:「傻閪

核心唔係佢丫

要mark梗係mark作為核心嘅Felix啦」

b:「咁又係喎屌」

老師:「屌你兩個咪撚講粗口啦

一陣俾其他人聽撚到就仆街喇

學校嚟架呢度」

嘩嗰陣我忍笑忍得幾辛苦

我曾經懷疑過係見到我想引我出嚟

我唔可以中計一定要忍落去

跟住諗諗下唔係喎

佢地好似講完，

繼續留喺度都冇意思

不如依家光明正大行返出去

等佢地知道俾人偷聽咗

個心驚一驚都好

我冇玩開運動比賽都知啦

對手一驚點犀利都冇用，

因為已經自亂陣腳

好一於就咁玩，

於是我就起身唔再踎低

好記得當時對面全部人呆晒

a:「點解有條友喺度嘅」

c:「傑仔嚟架」

b:「對面啲人嚟喎」

而我就不帶走一片雲彩咁樣

行返去我嗰邊個場

總之見到佢嚇到瀨屎咁樣

我就知目的已經完成。


一返到去我即刻同佢地講頭先聽到嘅野

調返轉佢地都想我講返出嚟

因為成班都見住我喺嗰度出嚟

係咁叫我分享

於是我就複述返出嚟

主席:「依家佢地話要睇實Felix喎

咁我地點算呀」

隊員1號:「係囉使唔使轉部署」

Felix:「7號點睇」

7號:「我key波唔係好叻

Felix你key返好似好啲」

Felix:「傑仔點睇」

我:「下

我唔識架喎」

Felix:「講下啦反正都係你偷聽返嚟

有多樣資訊如果變成壞事咁就真係好唔抵」

我:「講明先我都係鳩噏

唔同意就唔好屌柒我」

老師:「死仔我喺度你都講粗口」

我:「sorry sorry

我反而咁睇

佢地依家知道頭先講嘅野俾人偷聽

理論上再睇埋佢地頭先嗰樣嚇到瀨屎咁

所以我都幾肯定佢地會轉章」

主席:「下

咁頭先你偷聽咪冇用囉」

我:「主席你真係叻仔

點解會冇用呢」

主席:「又係你話佢地知道你偷聽

因為咁所以一陣會轉打法

咁你偷聽嗰啲咪冇用

佢地都唔用嘅」

我:「佢地會轉打法

即係話佢地唔會mark死Felix啦」

主席:「又好似係喎」

7號:「即係佢地會負責針對插入嘅我」

我:「對面班契弟好熟我地點樣打

佢地話知道我地嚟嚟去去都係搵你後上插入

重話核心就係Felix同埋你

頭先佢地話mark死Felix

如果冇估錯佢地依家真係轉嘅話

咁被針對嘅就唔會再係Felix而係你

當然啦純粹都係搏

有可能估錯，

至於點打你地話事

我乜撚都唔識」

老師:「死仔提咗你一次

我喺度你都講粗口」

我:「sorry sorry」

跟住佢地圍埋喺度傾策略，

我做好本分之後就坐返去場邊

冇幾耐筱瑜過咗嚟

筱瑜:「頭先真係笑死我

無啦啦喺嗰度以為你唔知做乜

起身嗰下重好笑

全部人呆晒」

我:「唔可以話我冇貢獻啦」

筱瑜:「咁都俾你諗到

真係唔知咩人嚟」

我:「你男朋友囉

咩人」

筱瑜:「真係得你先諗到咋」

估唔到佢笑得咁開心

原來佢覺得好搞笑

呢一份係意外收穫，

冇諗過做呢啲無聊野可以令佢喺學校都笑逐顏開

要知道佢喺學校相對冷漠啲，

之前我都一再講，

依家應該改口

呢個行為唔再係無聊野。