[校園][純愛]《幸運星下的預言》: 第五十八章

拎完鬆弛熊公仔咁樣點呢

我都幾肯定個個都會講

光明正大送俾佢咪得囉

不過，

點解我會話貪得意無聊諗到野玩



就梗係唔會咁簡單啦

送就梗係會送

咁辛苦先抽到，

唔送嘅話咪前功盡廢

但係，



就唔係光明正大咁解

喺度可以講少少野先

唔知大家發唔發覺，

我呢個人，

好聽啲嚟講就係叫低調



難聽啲就梗係毒撚

我就唔會好鍾意啲人自命清高咁樣

包裝到好好話咁樣唔係毒

嗰啲真係聽到想嘔呀大佬

係咪係囉怕咩認啫

自命不凡嗰啲人好心真係唔好咁多幻想啦

你唔係好特別架咋老友

唔好意思講多咗少少



因為真係對呢啲人冇乜好感

返返嚟先，

由細到大甚至依家都係

做乜野都好從來都唔會同人講

不論件事係好定係唔好，

唔好嘅就梗係唔想俾人知啦

即使係好嘅，



合乎其他人眼中嘅普世價值

我都唔會主動去拎功勞

輕輕帶過就算

甚至冇提過我個名都唔係問題

所以真係抵我打死一世工

幫老闆做完野，

跟住佢自己認叻唔講我個名出嚟

我都唔會有一絲失落



可能真係奴隸性格啦

唔係呃你咁多年都係咁

你見過一開頭都有講啦，

我同呀澤依家同一間公司做野

係完全冇人知我地係friend底

甚至喺故事入面嘅高中生涯都係

我冇特別描述我同佢喺學校嘅野



唔係因為我懶唔記得

而係真係好無聊咁樣大家扮唔識

明明晚晚返到去一齊打機

咁樣又點會有野寫呢

咁多年嚟，

我都係一直俾呢種神秘感迷惑

純粹滿足自己唔關其他人事

所以今次呢隻鬆弛熊公仔，

我都係會咁樣做

靜靜雞送俾佢不過唔會同佢講係我送

我就預咗俾人鬧我戇鳩仔

不過你知我都係唔會理

人有時係需要自私一啲，

特別係唔影響其他人嘅情況之下，

點解唔滿足自己呢


話說回頭

我應該要點樣俾佢好呢

靜靜地塞落佢櫃桶

咁樣梗係唔得啦

我同佢都唔係同班，

就算可以入去呀，

佢九成都坐喺班房嘅

我當佢嗰日屎忽痕落去樓下買野食，

咁佢嗰班啲人會見到我靜靜雞行埋去架嘛

一定會被發現啦

所以呢個方法唔可行

lunch time又或者放學學生會開會呢

咁樣又掂唔掂

諗諗下都係唔掂

你知啦佢坐我隔離

佢又係極度專心嗰啲人

一坐低真係可以坐好耐

佢個書包就喺佢隔離，

咁又點樣擺落去呢

講真丫，

你見到有條友喺你隔離，

你都會望一望佢啦

何況要將一個公仔擺落去書包

雖然話個公仔唔大啫，

不過佢喺隔離又點會留意唔到呢

趁佢上pe堂要帶衫，

咁咪有個袋嘅，

將個公仔擺落去咪得囉

唔好意思

我地學校同其他一樣，

喺冬天係可以著pe衫返嚟

記憶中佢平時亦都冇帶袋返學

呢三個方法都完全唔得

我淨係咁樣諗都錯漏百出，

已經唔講我平時手腳論盡成日出錯

方法已經唔得重未講自己執行力差

所以諗諗下真係冇乜方法比較完善

有時真係唔知自己諗乜，

明明咁簡單係都要攞苦嚟辛

搞到依家成個兵長咁樣

默默耕耘而佢係完全唔知

最慘全部都係我自己嘅主意嚟

真係得啖笑。