[校園][純愛]《幸運星下的預言》: 第五十七章

記得嗰啲新年冇乜特別

我呢啲毒撚梗係喺屋企啦

同呀澤兩個打機

毒撚有咩好做丫

係叫做有幾個人打嚟同我講新年快樂囉



筱瑜係其中一個

打過嚟講咗一陣，

跟住就收線因為我都要瞓覺

佢話佢同家姐去咗尖沙咀倒喎

姊妹情深



似我咁撚毒咩

兩條仔喺度打機，

當然本身對新年都唔係有特別大嘅感覺

既然係咁就唔講無謂野

費事悶親各位



跟住落嚟，

我無啦啦諗到啲野玩

放心絕對唔係啲咩負面野

只係純粹想報答筱瑜每朝早餐之恩

咁既然係報答，

我又點解會用玩嚟形容呢

唔知大家重記唔記得啦

筱瑜佢係好鍾意鬆弛熊



基本上佢筆袋，

書包嗰啲飾物，

甚至用緊嘅水樽，

全部都係關於鬆弛熊

我都係最近先留意到

咁樣有一日，

冇記錯嗰陣係放完聖誕假返嚟



我地好似平時咁樣

喺學生會室做功課

做做下佢同我講，

筱瑜:「知唔知呀」

我:「知唔知咩呀」

筱瑜:「七仔有鬆弛熊公仔呀」

我:「唔知喎」

筱瑜:「搞錯呀你唔興奮嘅」



我:「係咩

真係好喇有鬆弛熊公仔

我好開心呀」

筱瑜:「咁你又誇張咗少少」

我:「關我鳩事咩

又唔係我鍾意鬆弛熊」

筱瑜:「你唔覺好得意咩」



我:「ok啦」

筱瑜:「係好得意唔係ok」

我:「係喇係喇

咁點樣先有呀

就咁去買呀」

筱瑜:「唔係呀要儲夠十個印花

一個印花要廿蚊

跟住先抽到，

三分一機會中

我話你知我依家放學要瘋狂買零食

我啦家姐啦媽咪啦三個就負責食」

我:「屌你啦十個重要去抽

慢慢加油俾心機」

筱瑜:「你真係唔識欣賞

講都嘥氣」

我驚佢眼甘甘望住個印花

睇嚟真係好鍾意

跟住特登伸個頭去望佢張印花紙，

原來都係得兩個

咁就仆街啦

有見及此，

決定私底下做野

當然啦個重點係私底下，

點解就遲啲先再講喇。


冇記錯喺嗰幾日

我喺七仔消費咗幾舊水

點解我要咁做

你問當時嘅我，

就一定會答你係還恩

只要你見到佢望住鬆弛熊個樣，

就自自然然會咁樣做

嗰陣好傻架

雪糕買咗幾盒，

朱古力買咗幾條，

飲品都買咗幾打

總之一定要買夠四百蚊

點解要咁多

乜唔係十個印花就搞掂咩

一個印花廿蚊咁我買兩舊水咪得囉

大佬佢要抽丫嘛

我又唔覺得自己咁好彩三分一會一擊即中

兩次感覺上有渣拿啲

好記得嗰晚食咗好多盒雪糕

好彩本身唔係玻璃肚

咁多年腸胃真係唔錯

總算冇食到嘔屙

不過有時真係頂硬上咋，

無謂嘥咗佢啦啱唔啱先

結果兩日我清咗七至八杯

歷盡辛酸之後，

換嚟嘅就係兩張蓋滿圖案嘅印花紙

跟住即刻換啦

唔好話我話，

自己真係有先見之明，

第一個公仔真係唔係鬆弛熊

即刻屌咗一聲

開第二個之前就真係緊張喇

一唔得就要用多兩舊水，

又要係咁食嗰堆野

當然啦唔想食可以全部買飲品

不過拎返屋企嗰陣好撚重丫嘛

我終於重新體驗返拎成績表嗰刻嘅緊張

淨係得嗰一刻，

之前之後都唔會緊張，

唔係講笑真係有當年會考個氣氛

我都知性質唔同不過唔知點解有啲類似

醜婦終須見家翁

死就死啦，

一開，

嗰陣心情同當年會考一樣

即刻釋懷跟住面露喜悅

好想大叫去抒發情緒

原來自己都唔係咁黑仔啫。