[校園][純愛]《幸運星下的預言》: 第五十九章

第二日

我地照舊喺學生會室啦

事關我又有功課要抄

咁就唔使問，

呢度一定係最理想嘅地點



冇人嚟不特止又唔會有傻仔報串

筱瑜就喺度溫書定唔知睇書

突然間映彤嚟咗搵我地吹水

呀唔係，

主要搵筱瑜先真



我都係間唔中搭下嗲

事關我一定要今日抄晒佢

返屋企就梗係玩啦

到時重理功課

揼埋一二邊啦



突然間我聽到佢兩個喺度講

筱瑜:「映彤你平時會唔會去7仔買野」

映彤:「間唔中囉做咩呀」

筱瑜:「冇呀如果問你拎印花

你得唔得呀

買滿廿蚊就有」

映彤:「係咪儲夠印花就有鬆弛熊」

筱瑜:「嘩你又知嘅」



映彤:「我估架咋

冇乜野你會咁鍾意囉」

筱瑜:「係咩」

映彤:「梗係啦

好啦我幫你儲印花」

筱瑜:「多謝你呀映彤」

映彤:「唔好咁講啦



其實我都有野搵你幫手架」

筱瑜:「做咩呀」

映彤:「我地份project咪要出去影相嘅

唔好意思呀臨時唔得閒呀嗰日

筱瑜你可唔可以幫幫我呀」

筱瑜:「呵呵原來你想用鬆弛熊做誘因等我幫你」

映彤:「唔該你丫

我都係啱啱先知Felix嗰日打學界我想去睇佢呀」



筱瑜:「講笑咋梗係得啦

有冇鬆弛熊都幫你呀」

映彤:「放心放心冇下次

唔好意思呀」

筱瑜:「傻啦」

映彤:「總之我一定盡力幫你拎鬆弛熊

你諗定點樣處置啦」



當時我冇出聲

不過唔代表我聽唔到

因為無啦啦諗到啲野，

令我個計劃終於有絲毫頭緒

終於唔再係戇鳩鳩冇方向

係喎點解我一直諗唔到嘅呢

由一開始我就計少咗一個因素

係頭先一路偷聽嘅時候先至記得返

筱瑜佢細心，觀察力高啫，

映彤唔係丫嘛

佢兩個又咁friend

佢依家又知道咗筱瑜好想要嗰隻鬆弛熊公仔

搞掂

不過呢個計劃一定要天時地利人和配合，

我依家要求嘅，

就係我同埋映彤有一個獨處時間

唔係獨處都唔緊要，

最緊要係筱瑜唔在場就得

搏到就有搏唔到就冇

呢句雖然真係好廢，

不過喺當時，

呢句對我嚟講簡直係至理名言

八個字可以形容

謀事在人，成事在天。


唔知係咪平時做得好事多

所以上天眷顧我

跟住落嚟嘅情節一如我所料，

真係夾都冇咁準

話說之後嗰日嘅下晝，

我都係好似平時咁去學生會室抄功課

突然間就見到映彤嚟咗

不過就唔見筱瑜

咁我即刻問映彤

我:「筱瑜佢喺邊

有野唔識做呀」

映彤:「使唔使咁掛住人呀

佢落咗去搵miss呀」

我:「有冇咁快返

我等佢救命」

映彤:「應該就冇喇

你唔好彩囉呵呵」

掂晒，

映彤你真係太天真

我就係想佢唔喺度

終於明白擁有天時地利人和個感覺係點

簡直係充滿自信，

坐都坐得直過人

咁我都唔賣關子喇，

之前有講啦

我依家只係需要一個映彤喺度兼筱瑜唔在場嘅時間

咁其實我想點呢

如果我直接同映彤講，

幫我拎俾筱瑜啦

不過唔好話係我送俾佢，

佢條友係一定會爆我大鑊

唔一定我都夠膽講九成九

就好似有人同你講唔好掂某樣野

就會加強你好奇心去掂一樣，

映彤係絕對信唔過，

只不過尋日我聽到佢地有個所謂嘅交易

咁就正中下懷，

我光明正大同映彤佢會爆我大鑊啫

陰啲陰啲等佢自己發現原來我有鬆弛熊，

佢一定會叫我俾佢啦

何況佢想送呢隻鬆弛熊俾筱瑜做回報又或者係道歉，

各位可以諗下佢咁急切

依家佢見到一定會問我拎同埋將功勞攬晒上身

咁就實食冇黐牙喇

唔係講笑我自己都覺得呢個計劃相當唔錯

不過一定要諗埋自己同映彤傾計嗰陣，

需要咩態度、回應、表情，

以免佢生疑

功虧一簣就唔好啦。