[校園][純愛]《幸運星下的預言》: 第四十五章

講真，

原本我以為佢只係講笑

係直至到嗰日放學

佢同我講聽朝見

而唔係聽日見



我先知佢真係講真

大家或者唔知，

筱瑜對語言係好重視

佢絕對係咬文嚼字嗰種人

當然啦，



佢就唔係要求其他人同佢一樣嘅人嚟嘅

我之所以話佢咬文嚼字，

係講佢自己本身用字好清晰

就唔係傾傾下計

佢會無啦啦指責你用錯字嗰種



所以當我聽到佢話「聽朝」而唔係「聽日」，

咁我就知聽朝都係要過去

所有野好似今日咁樣

嗰陣嘅我乜都冇諗，

只係每日維持呢個習慣

冇去猜度佢點諗，

我自己都冇亂諗野

我從來都怕解讀錯誤



再者，

講到尾依家我其實都係食緊霸王餐

唔使錢就有得食，

既然係咁我又點會要求咁多呢

平心而論

我當然唔係淨係鍾意食腿蛋治，

基本上冇一種三文治我係抗拒



不過依家佢整埋俾你，

重要唔收錢，

喺人情又或者道理上，

我再去要求食咩

絕對係太過貪婪

總知佢整乜我食乜，

就係咁簡單冇其他

不過又估唔到原來佢整野幾好食



唔知平時係咪訓練有素啦

我就唔係呃你，

小弟對煮野食真係一竅不通

每次睇嗰陣都想學，

想型好為自己都好啦

總之上網睇片嘅時候，

每次都蠢蠢欲動



去到最後唔使問就梗係得個講啦

咁多年都係咁

經常都講諗同埋做係兩樣野，

當然去到後來，

返唔返工都好啦，

早餐就轉咗食餐蛋治

習慣嘅野好難改，

某程度上，

我幾唔鍾意習慣呢個動作

我唔知各位點睇

如果你問我，

搵到一樣你依賴嘅野，

當然係好

除非你話毒品啦咁就唔可以相提並論

每個人都一定有自己生活上嘅習慣，

不過去到某一日你唔能夠再依賴嘅時候，

重新適應過呢個程序係似易實難

我講我自己啫唔代表其他人，

好想尋求代替品

搵到又驚唔好意思，

但係唔搵就唔適應，

人變事變情變，

每一日其實都喺度變

唔係每一樣野都可以長期依賴，

得就固然好，

唔得嘅時候，

連自己都唔會估到後果係點

嗰份無力感係難以想像

唔好意思又講多咗廢話。


踏入十二月，

要講嘅主題當然係聖誕節啦

不過咁，

今年聖誕節出現咗有少少變化

對我嚟講影響就唔算好大

不過民怨四起

咁究竟係咩事呢

話說今日學校決定唔會搞聖誕聯歡會

原因係話過去幾年都冇人執手尾

搞到校工執到好夜先走

跟住走去投訴，

話學生玩完就唔理

佢重特別提到唔止一年

校方有見及此，

就決定今年禁止全部學生喺學校搞聖誕聯歡會

點解我冇乜所謂呢

因為從來都唔係好重視聖誕聯歡會呢樣野

俾我返屋企好過啦屌

最慘又唔走得喎

成班都喺度玩，

你一個走咁咪唔合群

生存嘅野邊有得唔埋堆

所以中學係社會嘅縮影呢句說話

真係一啲都冇講錯

我就咁諗啫不過其他人唔係咁諗，

佢地好撚鍾意參與聖誕聯歡會

特別係學生會嗰班蛋散，

早一兩個月已經講定聖誕聯歡會要做啲乜

依家成盆冷水倒頭淋

期待嘅野唔會發生

怒火中燒都係正常嘅事

所以嗰日開例會，

成個話題就係圍繞呢方面，

主席:「大家都知啦學校今年唔撚搞聯歡會

而我知道各位就好想搞，

咁大家有咩意見呢」

副主席:「係囉咁多位一齊講下啦

集思廣益」

戇鳩仔:「不如照喺學校搞啦

搏佢地睇唔到」

呢條友好明顯冇用個腦諗野

雖然佢平時冇串我，

不過同我亦都冇任何利益關係

梗係即刻開口屌佢

我:「叻仔呀

你叫外賣過嚟呢校工要去開門

咁就仆街啦點樣搏呀」

戇鳩仔:「係喎咁又」

跟住我feel到隔離嘅筱瑜喺度笑

一擰過去就見佢嘴角向上翹，

我:「頂你呀喺度笑」

筱瑜:「冇呀」

我:「繼續扮丫」

筱瑜:「痴線都唔知你講乜」

跟住好多人都提出唔少意見

不過都唔係盡善盡美，

直至到映彤講咗一句

成班就好似如夢初醒咁樣，

映彤:「大家真係好想開而又唔嫌棄嘅

不如去我屋企搞丫

講明先走嗰陣一定要一齊執野

哈哈因為我都好懶」

跟住成班呆晒望住佢

我都唔明點解要呆，

去人屋企開聖誕聯歡會有咩咁出奇啫，

直至到副主席開聲，

成班先有返知覺咁樣，

副主席:「好呀

我地梗係唔嫌棄啦

多謝映彤」

映彤:「唔使多謝

大家可以一齊玩就最好，

日子時間之後先再講啦。」

副主席:「好呀」