[校園][純愛]《幸運星下的預言》: 第四十六章

跟住落嚟，

映彤特登搵咗幾個人去傾點樣安排

筱瑜喺度就唔出奇丫

佢兩個咁friend

我就唔知點解會叫埋我



後尾我就梗係知啦，

原來想叫我做勞工

重要冇錢嗰隻

映彤:「你地想邊日上嚟呀」

副主席:「其實真係冇所謂呀



不過你話慶祝聖誕節嘅話，

就梗係平安夜嗰晚啦

好似有氣氛啲」

主席:「係呀係呀

真係啱呀」



我:「佢話乜撚都得架啦你」

副主席:「關咩事呀傑仔」

副主席應該都知主席想溝佢

見佢講到尷尷尬尬咁樣

主席:「係囉關咩事

俾啲面我呀大佬」

我:「你啱我錯」

映彤:「平安夜嗰晚我得呀



其他人呢」

筱瑜:「我都冇問題呀」

Felix:「ok呀」

主席:「好彩係平安夜

因為27 28我要去韓國

趕得切」

有個戇鳩仔:「冇人想知你去邊呀」



主席:「屌想曬下命啫

咁都唔俾我攞個彩」

我:「嗰日冇問題呀」

映彤:「咁好啦我預你地嗰日上嚟架啦

時間地點都整好，

活動呢」

副主席:「係咪叫野上嚟食」

映彤:「多數都係架啦



如果真係唔夠咁點呀」

主席:「我地幾個人呀」

映彤:「十幾個囉。」

副主席:「係囉野食真係好煩

預得鬆就驚食唔晒，

預得少就驚唔夠。」

映彤:「一係咁囉



我地照叫一啲野食先，

跟住我同筱瑜再整少少野食

筱瑜你得唔得呀」

筱瑜:「ok呀冇問題呀」

我:「開到聲梗係話冇問題架

唔通話唔得呀我好撚忙好撚多野做呀咁樣呀」

筱瑜:「扮得唔似喎

邊有你咁鍾意講粗口」

我:「搞錯呀我幫你重要咁講」

映彤:「筱瑜似你咩

想離間我同佢嘅感情

等你一個獨食」

我:「你都傻嘅我使離間

筱瑜可」

筱瑜:「真係打一打冷震」

主席:「又喺度放閃

極可恥

講埋落去先啦」

映彤:「係喎

筱瑜你真係得閒丫嘛

唔得就唔使幫手我自己整都得」

筱瑜:「得閒呀」

映彤:「咁好啦一於咁話啦

大致上都傾好」


咁我究竟做咩勞工呢

原來要同佢地一齊買野

我記得嗰日係聖誕假前最後一日，

lunch time嗰陣，

我照例同筱瑜兩個喺學生會室做功課

呀唔係，

我係抄佢係做

突然間佢同我講

筱瑜:「係喎今日放學你有冇野做」

我:「做咩呀」

筱瑜:「咁樣問即係冇啦

睇你骨格精奇，

真係唔可以浪費你嘅天賦」

我:「咁就梗係啦重使講

咪住先要做乜」

筱瑜:「今日我會同映彤去買野

想搵一個骨格精奇嘅男性幫手」

我:「一睇就知我虧啦

請恕小弟無能為力」

筱瑜:「係咩我覺得你好大隻喎

就咁話啦」

我:「唔好搞我啦我唔識煮野食呀

去到都幫唔到手揀餸」

筱瑜:「唔使呀你喺我後面幫手拎啲就得啦

放心啦我唔會要你攞咁多嘅」

我:「大鑊

一講呢句即係全部俾晒我」

筱瑜:「我又點會咁衰呢啱唔啱先

唔該晒呀」

我:「頂你講到一定咁樣」

映彤:「係囉唔係唔幫呀嘛」

我:「你喺邊度出嚟架」

映彤:「行入嚟囉

得你入得呀

你睇我兩個弱質纖纖，

點拎到咁多野喎」

我:「你叫你條仔幫手啦」

映彤:「佢要練波呀

就係佢唔得先叫你」

我:「你兩個一人一把口即係冇得推啦」

筱瑜:「風度翩翩嘅你

唔會拒絕兩個女仔嘅」

映彤:「真係得你先講得出佢風度翩翩

果然情人眼裏出西施」

我:「唔係喎唔止佢喎

好多人都咁講」

筱瑜:「死喇依家開始有幻聽」

映彤:「傑仔及早治療呀」

我:「得喇得喇得喇

今日幫你地手喇」

筱瑜:「多謝你呀」

臨走嗰陣，

映彤鬼鬼祟祟行過嚟

映彤:「係咪好好人呢特登幫你製造機會」

我:「傻豬嚟嘅唔使你幫手我都得啦」

映彤:「多謝都冇句」

我:「至叻係你呀

屌你想搵人做咕哩啫」

映彤:「樣樣都有啲啦」