[校園][純愛]《幸運星下的預言》: 第三十四章

第二朝我配合佢倒屎咁早起身

梳洗完睇埋晨早新聞就出去

一直以嚟我都堅持守時呢種美德

唔係講笑，

我真係冇乜遇過唔守時嘅朋友



又或者調返轉講，

唔守時就做唔到朋友啦哈哈

所以好多人講嗰種等一條友兩三個鐘嘅事，

喺我身上真係冇發生過

當然我自己係好典型嗰種寜早莫遲嘅人



等幾個字梗係冇所謂啦

巴士遲咗又或者呢樣嗰樣好正常啫，

我就唔會計到咁足

好快我就去到嗰間麥當勞，

冇記錯應該係早咗一個字



我喺度諗，

佢條友約咁早起唔起到身架

特別嗰陣都係秋涼時分差唔多去到十二月

你知冬天早起身幾攞命架啦

我就奇撚怪怪

從來都唔賴床

總之我知我要早起身就實可以早醒

依家返工都係



正當我喺度來回踱步，

慢慢等緊佢嘅時候，

我就feel到有人摸我個頭

重有邊個丫

我:「好彩我有洗頭啫

唔係又話我呢樣嗰樣」

筱瑜:「我梗係知你有洗頭先至摸啦」



我:「點解你會知呢」

筱瑜:「我喺後面都見到你啲頭髮重未乾得晒

今日又冇落雨

斷估你唔係游水過嚟掛

講明先呀我都係估咋

唔知你係咪咁無聊有水游嚟」

我:「小姐你嗰隻係咩眼

咁都睇到係咪濕」



筱瑜:「人眼囉咩眼

我知你想講乜」

我:「屌其實你真係好撚醒

重話朝早會戇鳩鳩」

筱瑜:「六點幾醒咗喇今日」

我:「其實真係有必要咁早醒」

筱瑜:「你真係唔知



唔夠時間等我個腦熱身真係懵下懵下咁樣

咁兩個人出到嚟冇理由咁樣架嘛

睇下我丫幾尊重你」

講完之後重拎個膊頭撞一撞我

同佢熟咗就知佢完全唔cool

大家睇呢個故就知啦，

只不過喺人多嘅時候佢戴住另一個面具咁解啫

當時嘅我唔明用意係點，

經歷過好多個秋天，

由著校服變成著西裝，

身邊唔再係同年紀嘅人，

自然就明白點解當年佢會咁樣

人幾時都係會諗返轉頭，

明知明知唔會改變結果都好，

硬係咁犯賤。


入到去麥當勞大把位

梗係啦咁撚早

邊有人好似我地咁傻

所以就唔使叫佢去霸位，

講起上嚟小弟有一個弱點

正正係關於麥當勞

講出嚟都笑死人

唔係講笑真係好羞恥

就係我從來都唔識食熱香餅

唔識搽糖水同埋牛油

真係講堅唔係呃你

本來唔識食冇問題丫係咪先

最慘我就好撚鍾意食

以前嗰個年代冇咁多餐

起碼冇依家嗰啲芝脆蛋雞堡乜乜物物

扭扭粉我都唔記得有冇

豬柳蛋我不嬲唔鍾意

選擇唔多之下，

變咗我每一次都係食珍寶

貪佢有熱香餅

咁我平時點樣解決唔識搽呢個問題呢

唔使講就梗係搵老母

你冇睇錯呀嗰陣中六都要搵老母幫手搽

我想咁羞恥嘅咩真係唔撚識呀

好彩老母肯幫手

因為真係好撚好食

誰不知今次我隔離係筱瑜而唔係老母，

按道理就冇人幫我搽

咁唔緊要丫我食第二樣咪得囉

好死唔死我去到counter嗰陣口快快叫咗熱香餅餐

明明頭先重記得要叫魚柳包餐

真係冇撚用咁都噏錯

嗰個位如果話叫錯你諗下幾撚柒

邊有得收返係咪先，

所以我決定死死氣講

「飲凍咖啡喺度食」就算

唔改喇唔改喇，

跟住等埋佢一齊拎餐順便揀位坐，

朝早就已經咁唔順利，

真係食得屎。