[校園][純愛]《幸運星下的預言》: 第三十五章

我地兩個好快就坐低食野

原來佢都係食熱香餅

見佢搽得好平均

睇手勢應該都係搽開

唔係講笑有一刻真係想叫佢幫我搽埋



我都知真係好厚顏無恥

所以冇問出口淨係諗

於是我就笨手笨腳咁樣處理我塊熱香餅

再望下對面嘅筱瑜，

已經搽好晒又砌好



準備一舊舊放落口

呢個時候我當然係牛咁眼望住佢塊熱香餅啦

誰不知俾佢望到

筱瑜:「望咩呀望」

我:「你唔望我又知我望你」



筱瑜:「大佬呀坐對面咋

梗係知啦」

我:「你唔係望住你塊熱香餅咋咩」

筱瑜:「痴線

都搞掂晒重使乜望住塊熱香餅

佢又冇腳唔會走」

我:「屌

你靚咪望住你食囉」



筱瑜跟住就喺度笑

都係咀角微微翹起嗰種，

然之後再望一望我個盤上面嘅熱香餅

好似恍然大悟咁同我講

筱瑜:「唔怪得你望住啦」

我:「做咩呀」

筱瑜:「攞嚟啦」



我:「攞咩先得」

筱瑜:「我成日幫家姐搽熱香餅架

嚟啦唔使眼望望呀」

我:「唔該晒呀靚女」

既然佢都講到出口，

咁就梗係唔推搪啦

原本重驚唔識搽搞到唔好食

依家有救喇



原來對面嗰個係高手

筱瑜:「搞掂」

我:「多謝你呀屌

呢個恩真係唔知點樣還」

筱瑜:「唔使咁誇張呀話

不過唔係喎，

唔誇張就唔係你啦」



我:「唔係講笑

我原本唔係想食呢個餐

就係因為唔識搽

點知口快快好似平時咁樣叫咗出口」

筱瑜:「咁樣平時邊個幫你搽」

我:「偉大嘅母親大人

好彩有你咋今次

如果唔係我要即刻走返屋企叫老母幫手搽」

筱瑜:「哈哈到時我唔等你架喇喎」

我:「你都傻嘅

我來回快過你食完呀」

筱瑜:「咁快咪冇人夠你跑」

我:「講真丫如果你做獎品喺前面

我就唔信學校有人夠我跑」

筱瑜:「你都痴線我做獎品

傑仔你朝早就咁樣

定係你未醒呀重係發緊夢」

我:「講真呀屌」

筱瑜:「好唔好食呀

會唔會太甜呀」

我:「你幫手搽埋老撚都話好食」

筱瑜:「唓

即係唔好食啦」

我:「唔係喎真係幾好食喎

牛油唔會太多唔會搞到好肥膩

糖水又適中唔會甜到嘔泡

高手高手」

筱瑜:「家姐同你一樣都係唔識搽

你好彩呀今日」

我:「同你食早餐梗係好彩啦

啱唔啱先」

筱瑜:「好煩呀

夠鐘喇行過去啦」


好快就去到運動場

一去到就集隊，

例牌講下啲廢話，

跟住就上去看台

唔係呃你，

運動場入面係有個區特登俾學生會座

嗰度大約有七八個位

點解特登俾個區我地

係因為方便我地學生會嗰班人上上落落

好似話有幾個學生會成員要經常落去樓下

所以畫出嚟俾我地坐嗰個位係最近樓梯，

一去到就見到筱瑜

前面重有映彤同埋Felix坐咗喺度

果然我地都係仆街仔女

全部都享用學生會獨有權利

筱瑜:「你都過嚟」

我:「話咗我唔過嚟你會悶

我又點會令到呢件事發生呢」

點知俾前面嘅映彤聽到

映彤:「講到出面喇

話咗你兩個有野啦

筱瑜你俾佢教到你曳曳豬喇

竟然唔認」

我:「又係我教佢嘅

睇佢個樣唔教都壞」

筱瑜:「唔係呀嘛你咁都講得出口

一睇我就知本性純良啦」

映彤:「咪就係囉

你兩個果然」

我:「你個樣好衰呀

拍你嘅拖啦」

筱瑜:「今次我都同意傑仔呀

映彤你個樣真係好奸呀」

映彤:「筱瑜你變咗喇

以前都唔係咁，

依家竟然調轉槍頭指返住我」

筱瑜:「佢條友把口唔收不嬲架啦

乜都鍾意誇大嚟講你都知啦」

映彤:「又唔見同我講」

我:「大佬呀你條仔喺隔離我又唔係唔識佢

一陣撩你佢打撚死我都似」

映彤:「又係喎

唔阻你兩個喇」

筱瑜:「邊個阻邊個都未知啦」

我:「咪係」

筱瑜:「yeah」

跟住我地喺度擊掌

哈哈好撚戇鳩呀

筱瑜:「係喎一陣你同我一齊落去幫手」

我:「下

重諗住問你有咩玩喎

運動會年年都戇鳩鳩咁樣

以為你有帶野嚟玩添」

筱瑜:「我地要落去

你可以報返今朝個恩

一齊幫手」

我:「早知唔過嚟啦」

筱瑜:「錯喇

你唔過嚟我都會搵你」

我:「係咪真係咁掛住我呀」

筱瑜:「係呀

所以要一齊落去」

我:「要做咩架」

筱瑜:「其實我都唔知

一陣落去先問佢」

我:「算。」