[校園][純愛]《幸運星下的預言》: 第二十七章

好快就開始咗比賽

首先進行合唱組

睇完頭幾隊，

發覺全部都好有水準

原本以為會有啲撚樣上到去鳩玩



點知原來冇呢啲人

個個都好犀利，

好彩冇上去獻醜

否則真係俾人笑到面都黃

好快就到映彤出場



鎂光燈下嘅佢，

的而且確係全場嘅焦點

講真唱成點我真係冇留意，

我望住台上嘅佢喺度諗，

原來真係好耐都冇咁樣望住佢



起碼都有兩三年

佢拍拖之後就冇咁樣做，

或者時間真係會令人變質，

事隔幾年再認真望佢一次，

腦入面嘅思緒同當年完全唔同

唔好再有唔忿氣

抱怨隔離嗰個唔係我呢啲咁負面嘅思想，

依家淨係覺得，



其實佢兩個都幾襯丫哈哈

的確係由心而發

如果係以前見到佢兩個拖手合唱

真係人都癲，

又或者當初就唔會嚟睇啦哈哈

或者真係完全睇開晒，

走出映彤嘅陰影



與其執迷不悟倒不如及早開竅，

再喺佢之間鑽牛角尖對件事冇乜幫助

我又唔會搶人女朋友，

哈哈就算要搶呀都要睇對方架

已經唔講做唔做得出呢個問題

繼續喺度諗嗰次點解唔進取啲亦都係於事無補，

幾年以嚟已經埋怨過自己無數次

今日再埋怨一次豈不是完全冇進步過?



有時真係唔到自己睇唔開

執著唔係唔好，

不過喺呢件事上面，

我選擇咗放開啫，

就好似三分幾鐘之後，

映彤唱完最後一句，

音樂隨之而關閉，



跟住就行前鞠躬道謝各位，

完美落幕

我應該要做嘅，

就係退後一步，

同大家一齊拍掌

再冇其他野做。



好快就搞完合唱組，

原本諗住睇下映彤佢兩個贏唔贏到

點知佢話等埋個人組一次過頒獎

我聽到好多人都話映彤佢兩個唱得好好

唔通我同佢地講頭先我喺度諗野冇認真聽過咩

為免麻煩都係隨波逐流

係咁話好呀好呀真係唱得好呀就算

不過唱之前我留意到筱瑜好大聲幫映彤打氣

我未見過佢咁大聲講野

睇嚟真係好撚friend

我:「真係姐妹情深喎

未見過你咁大聲講野」

筱瑜:「點解我覺得你話中有話咁樣嘅」

我:「好明顯你諗多咗

就算係都係學你啫

你成日架啦」

筱瑜:「痴線唔知你講乜」

我:「我發覺你真係好奸

成日都扮傻」

筱瑜:「大家咁話啦」

跟住就聽歌，

原來個肥仔真係好撚勁

唱情歌如果唔睇個樣淨係聽把聲，

唔係講笑真係好溫柔

估唔到咁佢犀利

聞名不如見面

有聽過就知幾誇張，

真係羨慕死人

我見隔離嘅筱瑜聽到出耳油咁樣，

再望其他人都係差唔多反應

就知應該個個都覺得，

佢係冠軍喇咁樣

當然啦唔止佢一個唱得好好聽，

重有個女仔都係

又係唱衛蘭隻一場誤會，

嗰個年代佢真係好紅

跟住我醒起係喎

筱瑜好似係佢fans，

跟住就擰轉隔離去望佢

見到佢口噏噏咁樣

不過就聽唔到聲，

你知啦嗰個環境咁撚嘈，

唔係好大聲講野嘅話真係聽唔到隔離講乜

於是我就伸個頭去佢隔離嗰度

睇下佢唱乜，

跟住終於聽到佢細細聲喺度唱

fans果然係fans

唔望歌詞都識唱

同埋其實都幾好聽真係唔係吹奏

把聲天生好聽已經係成功嘅一半

正當我陶醉緊歌聲嘅時候，

我個頭無啦啦俾人拍

重有邊個丫

筱瑜:「你條友伸咁埋做咩呀」

我:「冇呀聽歌囉」

筱瑜:「聽歌要伸咁埋」

我:「你唱歌丫嘛梗係聽你啦」

筱瑜:「痴線佬無啦啦伸咁埋

重要偷聽咁變態」

我:「但係

你自己唱架喎

邊度有偷聽

講真幾好聽喎」

筱瑜:「你嚟呢度係聽台嗰啲丫定係聽隔離嗰啲架」

跟住梗係指住佢

我:「梗係你啦重使問」

筱瑜:「冇講錯你呀變態佬」

我:「其實偷聽都唔係好變態啫

又唔係偷睇」

筱瑜:「莫非你上pe堂成日偷睇人換衫

講到咁」

我:「你自己睇下女廁出面有冇我喇

正人君子點會做啲咁嘅野

偷睇喎」

筱瑜:「我講你偷睇男仔呀」

我:「成日屈我gay

收皮」

筱瑜:「咁大反應

真係講中咗」

我:「你依家同我即刻出去

孤男寡女獨處

到時你就知我係咪gay」

筱瑜:「我知你唔會嘅

係咪」

我:「頂你無啦啦扮溫柔」

筱瑜:「咩扮

我唔可以溫柔嘅咩」

我:「同你形象都唔夾

嗲聲嗲氣唔似你」

筱瑜:「變態佬食自己啦你

朱古力奶冇你份呀」

我:「唔係喎你好溫柔喎

頭先有條戇鳩仔亂咁講唔好理佢啦」

筱瑜:「哈哈你都知你係咩」

正當傾得火熱嘅時候

有prefect就行埋嚟叫我地細聲啲

大家相視而笑

都係繼續聽歌啦哈哈