[校園][純愛]《幸運星下的預言》: 第十三章

跟住落嚟我發現咗一樣野

令我覺得筱瑜呢個人真係幾奇怪

你知啦學生會定期要開會，

傾下點樣安排活動呀呢樣嗰樣

每個禮拜都會有幾次開會，



一喺呢啲大堆頭嘅活動入面

筱瑜都係繼續戴住一個冷酷嘅面具

唔講多餘嘅野

我聽佢講得最多就係「知道」同埋「收到」

搵多句都難



同之前冇分別，

不過間房得兩三個人嘅時候

比起之前佢又唔係真係咁cool

起碼都會玩下野

好似嗰日佢收埋我支飲筒咁樣



有一次佢真係好無聊

講你都唔信，

係關於香口膠嘅

我唔知有冇同你地講過啦，

佢成日食檸檬味香口膠

點解我會知因為佢每一次請我食嘅都係呢隻味

有一日我照問佢拎啦，

佢嗰陣做緊功課



所以就俾成包香口膠我

叫我自己拎，
跟住擺落口原來係薄荷味

我就覺得奇怪

因為出面個包裝明明係檸檬

咁我梗係問佢啦，

我:「點解會咁架」

筱瑜:「乜野點解」



我:「點會係薄荷味」

筱瑜:「佢係就係架啦

冇乜點解架喎」

我:「咁點解個包裝係檸檬架」

筱瑜:「我尋日將兩包香口膠調轉囉」

我:「唔係呀話點解你要咁做」

嗰陣我真係o晒嘴



點解無啦啦要咁做

都未算聽埋佢個解釋先知頂癮

筱瑜:「下

因為想玩囉」

我:「小姐你無唔無聊啲呀」

筱瑜:「係架真係好無聊架」

我:「頂真係

冇野好講



唔講唔覺你咁鍾意整蠱人」

筱瑜:「你唔覺整蠱人好好玩嘅咩」

我:「覺

梗係覺啦」

筱瑜:「咁呀

下次繼續」

我:「你重想嚟」

筱瑜:「要諗下玩咩先

重複嗰啲就唔好玩」

我:「好撚無聊呀」

跟住佢就喺度笑

佢從來都唔係嘻哈大笑嗰種，

不過對比當初依家嘅笑容明顯有靈魂得多

唔再係冷冰冰嘅機械式微笑

當然唔係容易吸引男性眼球，

典型女仔嗰種好陽光好燦爛好甜嘅笑容，

不嬲佢都係比較內斂

但係我想講佢個笑容真係好有特色

簡單啲講即係獨特性好強，

絕對唔容易再搵另一個人係咁樣笑

係絕對，

咁多年嚟都冇同過佢講，

我係因為佢而影響往後嘅審美標準

每個人都有自己嗰套標準，

講得直啲，

集合所謂嘅條件砌返出嚟嘅時候，

根本就係當日嗰個令你怦然心動嘅人

而呢個人，

可以係你個伴侶，

身旁一直都有佢嘅存在，

亦都可以係你前度，

有好多精彩嘅情節不過去到最後發現只係生命中其中一位過客

甚至佢同你其實冇乜交集，

你兩個之間根本就冇故事嘅存在，

從來都係維持既定距離

係邊種就要睇自己造化，

自己做得好亦都要配合天時地利，

缺一不可

有邊個唔想係第一種先得

根本冇一個會否認，

只不過，

唔係每一個都咁好彩

講從來都係易，

當你置身其中嘅時候就明白現實同埋幻想嘅差距。