[校園][純愛]《幸運星下的預言》: 第十二章

我同佢梗係唔係好似拍戲咁啦

無啦啦一日之間就開始變得熟絡

拍戲咩咁多位

之後我地當然都係維持有限度嘅交流

坐埋一齊都係各自做自己野



始終我覺得無啦啦撩佢傾計

佢可能會唔鍾意

到時我就柒姑碌啦

冇人睬你呀傻仔

同埋嗰刻我都唔係話特別想同佢進一步拉近



對佢嘅感覺都重係一位冰美人

就係咁多冇其他

當然，

如果真係要去比較，

呢一刻絕對會好過啱啱入嚟學生會嗰陣嘅



會打下招呼咁囉

原本真係冇架唔係吹水

有時我望住一條題目好耐嗰陣，

佢都會伸個頭埋嚟問我係咪唔識做或邊度唔識等等等等

我同佢係同一科不過唔同班丫嘛

佢真係幾撚勁唔係講笑

唔怪得佢啲friend成日行過嚟問佢，

有時我會喺度諗



骨子裏嘅佢應該唔係咁沉默寡言

學司徒話齋，

曾經嘅佢都係一個好活潑好陽光嘅女仔

如果佢喺中學所展現嘅係呢面，

我相信身邊會有好多狂蜂浪蝶

好多男仔圍住佢氹氹轉嗰種人

佢依家變到咁樣一定有佢原因



不過同佢又唔熟

就當他日真係熟咗都唔知點樣問啦，

呢啲問題咁尷尬

所以都係我忽發奇想啫

睇我個死人樣都知我係諗多過做。


話說有一日我地學生會搞party，

好似話係慶祝成立一個月喎



見諒真係唔記得咁多

大佬幾多年前呀

總之係有個party啦

十幾廿個喺度玩，

出去附近啲餐廳叫pizza呀炸雞呀咁樣

玩咩就真係唔記得

都係嗰啲大路野啦，

總之唔係重點，



我淨係記得係我清場

仆你個街因為我猜包剪揼猜輸咗

我諗住佢地班撚樣唔會咁掛

話就話我猜輸咗要負責啫，

點都會幫啲啲丫

誰不知真係冇人性，

話走就走頂佢個肺

特別係映彤同埋主席兩條友

嗰度同我最熟嘅應該係呢兩個，

點知一個掛住拍拖一個掛住追女仔

屌佢地加油都唔同我講聲

淨係話下個禮拜見啦，慢慢喇咁樣

班蛋散都係有愛情就冇朋友嗰啲人

人情冷暖

呢單野真係記一世唔係同你講笑，

入到棺材都重記得，

跟住我再望一望個場

亂到七彩，

嗰啲枱凳全部擺到歪晒

地下又有勁多報紙

算數，

今日冇乜野做慢慢喺度執啦唔使咁快

當係一個人靜下，

始終有時對人對得耐，

都會有想寧靜嘅時候

不理會世間嘅繁囂其實係好奢侈嘅事

依家有呢個機會都唔係完全衰嘅，

執下執下就聽到有把聲

筱瑜:「猜包剪揼輸咗嘅人」

我:「你都嚟攞景」

筱瑜:「如果我話唔係呢」

我:「咁你嚟做乜」

跟住佢即刻放低咗個書包，

幫我將啲枱凳擺返去原位

我:「返轉頭嘅你

頭先見你走咗架」

筱瑜:「陣間你就知點解」

我心諗都唔知佢噏乜

唔理咁多喇一於清理好眼前嘅野先

有多一個幫手真係快好多

我:「主席個柒頭真係仆街

掛住溝女都唔幫手」

點解我唔屌埋映彤

因為佢同筱瑜好friend

一陣篤我背脊就大鑊

筱瑜:「你唔驚我會同主席講咩

講到咁盡」

我:「你咁好人唔會嘅」

筱瑜:「咁快收賣我」

我:「乜都拆穿唔好玩喎」

筱瑜冇講野淨係喺度微笑

整下整下終於搞掂，

我:「真係唔該晒

唔係嘅話真係整天光」

筱瑜:「原來你講野都幾誇張」

我:「總之唔該晒你啦」

筱瑜:「執完就走咯

閂門喇要」

我:「好」

跟住我同佢就一齊走

行到去樓梯嗰陣，

筱瑜:「喂」

我:「做咩」

筱瑜:「嗱」

跟住佢俾咗包朱古力奶我

我:「咁多謝」

筱瑜:「其實想請你好耐」

我:「做乜無啦啦請」

筱瑜:「我好驚曱甴

喺街見到都好驚嗰種

所以真係唔該晒你嗰日，

自己驚都幫手整走佢」

我:「咁你都知我驚

有同你講過咩」

筱瑜:「見你都係縮下縮下咁樣

我估架咋

咁有冇估錯?」

我:「你叻囉冇估錯」

筱瑜觀察力真係好勁

果然好似司徒所講，

真係好聰明嘅一個女仔

喺嗰個情況都可以留意到我驚唔驚

筱瑜:「今日乜都還晒啦」

我:「唔係喎重差一句」

筱瑜:「邊句」

我:「『你好型』呢三個字」

筱瑜:「你好型」

我:「唔係講笑我都覺」

筱瑜:「平時唔聲唔聲，

原來你都好自戀」

我:「坐你隔離邊敢傾計呀」

筱瑜都係冇講野淨係笑一笑

筱瑜:「我行呢邊喇拜拜」

我:「拜拜

咪住先」

筱瑜:「做咩呀」

我:「包朱古力奶冇飲筒嘅

係咪你收埋咗」

筱瑜:「點解我要咁做」

我:「咁呀

算數啦睇下返屋企有冇啦拜拜」

筱瑜:「咪住先」

我:「做咩呀」

筱瑜:「唔玩你喇原來你發現到」

跟住即刻俾返支透明飲筒我

我:「好無聊呀」

筱瑜:「以為你唔知添

咁叻發現咗抵我俾返你」

我:「重有冇野收埋呀

冇我走架喇」

筱瑜:「冇喇拜拜」

我:「嗯，

拜拜」


呢單野真係記一世唔係同你講笑，

入到棺材都重記得。