[校園][純愛]《幸運星下的預言》: 第十一章

當然我都好識做

聽完司徒講呢單野之後我冇同其他人講返，

呀唔係

我淨係同過呀澤講

佢同我一樣都估唔到筱瑜以前同依家咁大反差



其他所謂嘅朋友真係冇講過

始終都係人地嘅秘密，

周圍唱唔係咁好啦

佢又冇搞著你係咪先

呀澤大家咁熟梗係知道佢口密



以往同佢講嗰啲全部都冇爆響口

調返轉小弟都係一樣

哈哈

有邊個中學生唔講秘密先得

爭在係講自己嗰啲定係人地嗰啲嘅啫



聽完之後當冇聽過成日都發生架啦

今次都唔例外，

不過跟住落嚟發生一件事

令我知道筱瑜呢位冰美人，

有一樣野同其他女仔冇分別

各位唔使諗錯隔離喇

依家我就開估，

話說有一日放學，



我就同平時一樣，

去學生會室做功課啦

我入到去就見到映彤行出嚟

我:「鬼鬼鼠鼠做咩呀」

映彤:「你就鬼鬼鼠鼠

落去買野飲呀」

我:「叫Felix買俾你咪得囉」



映彤:「佢要補課呀唔行得開」

我:「咁呀

靚女幫手丫，

幫我買包朱古力奶」

跟住我嚟手就俾咗五蚊佢

我:「唔該晒有多唔使找」

映彤:「講到一定要幫你咁樣

錢都俾埋」



我:「我知你肯嘅

有錢賺喎」

映彤:「算，

橫掂我本身就係要落去」

跟住佢就一支箭走咗

我再望去入面，

就見到筱瑜一個喺度



佢有望一望我

俾一個機械式微笑


跟住就做返自己野，

我都行返去我個位度座

亦即係佢隔離

好似平時咁樣，

佢有佢溫書我有我做功課。

原本一路都好正常，

各自埋頭苦幹緊

同平時一樣冇分別，

突然間聽到有個女仔聲尖叫

「呀!」

仲有邊個丫得筱瑜一個喺度咋嘛

跟住我即刻嚇一嚇

先別論佢係咪筱瑜，

正常聽到人尖叫都會有咁嘅反應啦

何況重要係佢

平時聲都唔出，

依家竟然會尖叫

咁我梗係問佢咩事

我:「做咩呀」

筱瑜:「有曱甴呀」

唔係講笑佢嗰個驚樣出晒嚟

今次終於唔係目無表情

講野有語調唔再係千篇一律

我:「邊度呀」

筱瑜:「嗰邊呀」

跟住佢就指咗俾我睇

唔係講笑真係幾撚大隻

老實講其實我都有少少驚

講出嚟都預咗俾你地笑

真係唔係呃你，

不過嗰下如果我臨時縮沙重驚過佢的話，

你諗下幾柒先得

個女仔搵你求救點知走得快過佢

成件事都唔型係咪先

所以嗰陣唯有頂硬上啦

即刻去檯面拎啲報紙捲成一疊，

對住佢拍落去

嗰陣係咁同自己講唔使驚冇野嘅

一下拍落去就得

拍完之後你就做英雄

之後當然係一擊即中

唔係呃你，

我有一秒諗過想整蠱佢

就係將條屍拎俾佢睇

不過諗諗下都係唔好玩

見佢驚到咁樣

再拎近俾佢睇真係嚇死佢

都係安份守己做埋善後工作啦

將條屍同埋啲報紙揼出去

再用濕紙巾抹返個地下

執好晒手尾跟住洗手

之後先返埋個位

繼續做我嘅功課，

我:「冇野喇」

筱瑜:「唔該晒你呀」

我:「哦唔使」

跟住映彤好快上返嚟，

俾返包朱古力奶我

屌佢真係打斧頭

一路飲一路做真係爽，

再過多半個鐘筱瑜就走

佢執書包嗰陣我下意識望去佢嗰邊，

可能佢feel到我望住佢嗰邊

所以之後望返住我，

跟住就發生咗同平時唔一樣嘅情節

筱瑜:「拜拜」

可能你地唔覺得有咩咁特別，

不過我想講佢係第一次同我講拜拜

我地做咗學生會差唔多一個月，

之前每一次放學留低喺度，

佢都係不發一言咁樣走

執完書包就細細力推返啲枱凳入去，

跟住就行出班房門口，

今日係第一次聽佢講拜拜

真係好難得

當時嘅我都呆咗一秒

一秒過後先知要俾咩反應，

我:「拜拜」