喪"師"2: 3-排除所有唔可能嘅事，剩下的個個即使幾咁不可思議，都係事實

對面嘅教室門突然被撞開，入面好多喪”師”衝咗出嚟。於是我即刻跑去抱起個學生就跑返自己課室，千鈞一髮之際我衝返入自己課室，喪”師”成群咁撞咗落度門到，我退後幾步，遠離度門，屏息靜待。過咗一陣門外就冇咗動靜。睇嚟啲喪屍喺冇思考能力嘅！見唔到獵物就唔會再追住。好在，我係班學生午睡嘅時候會落咗窗邊嘅簾，等房入面冇咁光。所以啲喪屍唔會透過窗望到我地課室入面。我將手上細路放落地下，問佢：「我唔記得你叫咩名話？」
我冇教過佢，真係唔知佢叫咩名。
「余家言。」
「哦！言仔！」
見佢到呆下呆下咁嘅樣，好似都唔知發生緊咩事。呢個時候已經過咗我要叫醒班小朋友嘅時間，但我叫言仔靜靜地坐喺到唔好噪，因為我都唔知班細路起身我要點應付。好怕佢地又噪又喊，攪到啲喪屍衝曬入嚟。就喺班小朋友仲瞓緊嘅時候，我打電話報警，唔通，打俾父母呀哥，冇人聽，打埋俾朋友，都冇人聽。我用手機上網睇新聞睇下有冇咩消息，冇！唔通就好似電影咁，呢個地球已經被喪屍侵佔。我嘅屋企人有冇事呢，唔會已經遇害掛。
我搵唔到救援，又突然醒起，我個姪仔（豪仔）都喺係度讀，喺隔離班，啱啱我望嘅時候冇留意到佢喺唔喺到。為免令同事尷尬，學校冇人知豪仔喺我個姪。我好心急，好擔心，如果佢真係出咗啲咩事，我點對得住我呀哥。但我依家咁嘅境況，出唔到去，點搵佢。之後我揭起小小窗廉，見到有幾個小朋友係課室外面嘅不同位置行緊，冇遇害到，佢地有啲喊緊，有啲大叫「媽媽，我要媽咪呀！」，有啲係到大叫尖叫。而啲喪屍好似有意識咁避開咗佢地，唔接近佢地。我好奇怪，呢幾個小朋友究竟有啲咩特別之處，令到啲喪屍都要避開佢地。
於是，我好糾結，糾結自己應唔應該出去將佢地抱入嚟，喪屍係因為啲咩而唔咬佢地呢？我行出去會唔會俾啲喪屍咬㗎？佢地陣間會唔會又無啦啦咬個幾個細路㗎？
唔通係啲喪屍嫌啲細路太煩，港孩嘅威力係連喪屍見到都驚？連喪屍都要避開佢地？諗到呢到，我都忍唔住自己鬧自己﹕
「On9 嘅咩你！咁嘅白痴嘢都俾你諗到！」正當我苦惱之際，啲小朋友陸續醒咗。我個班有15個小朋友，其中有個叫晴晴嘅女仔醒咗，每次佢醒都會有起床氣，要喊一陣先。佢父母叫我每次佢起床都要抱一抱佢，哄一哄佢。我見佢醒咗，我即刻衝過去抱起佢。但佢已經開始喊啦！我用氣音同佢講：「乖！唔好喊！」
但佢依然大聲喊，係，佢每次起身都要喊成10分鐘先肯收手。




我即刻喺個櫃到拎啲糖出嚟，同佢講：「乖！食糖！」我將一粒糖塞入佢大喊緊嘅口入面，但佢依然繼續喊。
但好奇怪，佢咁凄厲嘅喊聲都冇吸引到啲喪屍撞入嚟，我抱住晴晴行近窗口，我透過窗廉嘅廉縫偷望出去。真係好奇怪，啲喪屍竟然好似有意識咁避開我地呢個課室，係我地課室2米外冇意識咁遊走。我再望望個個係出面一面行，一面尖叫同埋大喊嘅小朋友，佢行到邊，啲喪屍就散開，同佢保持一米距離。
我疑惑咁望住呢個情況，心入面諗，唔通啲喪屍就係驚啲小朋友嘅尖叫同埋喊聲。但隨後喪屍嘅舉動好快打破咗我嘅推測，只見其中一個小朋友，喊喊下好似開始有啲驚咁一面喊一面跑嚟跑去避開啲喪屍，啲喪屍就衝去咬佢。另外兩個小朋友見到朋友仔俾喪屍咬死咗，一個嚇到呆咗，一個嚇到尖叫，之後就好快咁俾啲喪屍咬死咗。
唯獨淨底一個小朋友，佢見到冇驚，發曬爛渣咁尖叫。啲喪屍就冇接近佢，同佢保持距離。甚至當個個小朋友尖叫住咁接近啲喪屍，喪屍表現出嚟俾我嘅感覺係佢地覺得好難受，緩緩跪底咁係到抽搐。暫時只以我觀察到嘅嘢可以推論出幾點：
一：只有小朋友有令喪屍避開嘅特質，因為岩岩係出面未遇害嘅只有細路。
二：喪屍唔係因為小朋友喊而唔咬佢地，因為岩岩個細路係到喊，啲喪屍都照咬佢。
三：喪屍亦唔係因為小朋友尖叫而唔咬佢地，同樣地，岩岩另一個細路係到尖叫，啲喪屍都照咬佢。
排除咗呢二、三所講嘅原因，究竟出面剩底嘅個個細路有咩獨特之處，令到啲喪屍直到依家都避開佢。
福爾摩斯講過：排除所有唔可能嘅事，剩下的個個即使幾咁不可思議，都係事實。所以⋯






#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/