喪"師"2: 2-喪“師”來襲
我係一個幼稚園老師，今年26歲，係3年高B班既班主住，佢地讀埋呢半年就會上小學！但我真係一啲都唔會唔捨得，因為湊細路真係好攰，尤其係依架咁多怪獸家長。小朋友做錯嘅時候想話下佢地都要思前想後，因為怕俾家長找麻煩。唉！有一次，有個學生(明仔)我畢嬲都知道佢脾氣唔好，又冇禮貌。但我未見過佢同佢父母相處係點，所以我都唔會覺得係佢屋企人冇教或者父母差。因為我相信的確有啲小朋友係好難教。但當我之後接觸過佢父母之後，我好似有啲明白點解佢地個仔會係咁！每個學期，班主任都要幫學生填個評估表，俾啲評語。講真，好似中學成積表上面嘅評語咁，老師都唔會寫差啲學生。即使明仔個人冇禮貌，冇耐性，又唔守秩序，我都只不係係上面寫活潑好動啫，守秩序個到5分滿分我都俾咗4分。佢父母竟然有日嚟接明仔放學嘅時候走嚟搵我，同我討論喺份評估方面，覺得我可以有改進嘅空間。媽媽：「老師呀！我想你評語上面『活潑好動』改做『乖巧文靜』，仲有『守秩序』呢到嘅評分麻煩你改到5呀！」
吓！我聽到O曬咀，咪佢有聽過成績表喺家長想改就改嘅咩！
但我依然保持冷靜咁同佢講：「呢個係根據佢係幼稚園入面嘅課堂表現評分，所以呢個係最符合佢表現嘅評分。」
「吓！但佢係屋企好乖好聽話，我覺得『乖巧文靜』岩我個仔多啲喎！」
「但係呢個係評佢係學校入面嘅表現。」（不如你自己出張證書呀！全部俾曬滿分，證明佢係屋企好乖，然後頒發機構寫返你個名好冇，我好想咁同佢講。）
「吓！我覺得咁樣好唔合理囉！」（又吓！我終於明白點解明仔咁冇禮貌，原來佢媽咪都係咁冇禮貌。其實我都覺得呢個評語同埋評分真係好唔合理，我應該寫『最麻煩學生』，俾分個到要俾負分。如果我夠殭咁同佢講就好啦！可惜我只係一個小小嘅打工仔，我需要呢份工。於是我鎮定住自己想反白眼嘅衝動向佢解釋。）
「明仔佢唔係唔乖，但佢好好動，『活潑好動』會更適合佢。佢『有時』都守秩序嘅！但有好多小朋友都比佢更守秩序，明仔拎到4分都已經非常好。」
「車！算啦！算啦！你根本就一啲都唔了解我個仔。我個升小學入唔到名校唯你是問呀！」
講完佢就轉身走咗！
但我想講，明仔入唔到嘅原因只有一個，就係佢廢！然後又有一次，明仔上堂嘅時候係咁整前面嘅同學，我叫咗佢好多次，佢都唔停，明仔仲變本加厲，打埋同學仔。於是我就拉佢埋去一邊話佢：「你做咩要咁做？」
「我中意呀！」佢答嘅語氣、姿勢同埋原因真係表現出佢係名符其實嘅小學雞。
「你知唔知你咁做係唔岩㗎！同學之間應該喺互相幫助，你點可以打同學！」
「我唔覺得咁樣有咩唔岩喎！」
「咁我咁樣打你得唔得呀？如果我咁打你，你都會唔開心啦！喺咪？我地應該互相尊重至啱㗎嘛！」
「你梗喺唔打得我啦！我就可以打你！」說罷，佢就一巴拍落我塊面到，佢真喺徹底激嬲咗我。雖然佢只喺一個5歲嘅細路，但大力起上嚟，手勁都唔細，而且我感到好大嘅冒犯，除咗我父母我冇俾人摑過。
「道歉！你點可以咁樣打老師，今日放學我會同你媽咪講。」
「我冇錯！」佢嘴藐藐咁講。見到佢咁嘅態度，我真喺好想大巴大巴咁車埋去。但唔得，佢只喺個細路，要慢慢教。我強逼自己保持冷靜，叫去一個人企喺角落到反省下。
到放學嘅時候，明仔媽媽嚟接佢放學，我同佢講咗咗今日佢冒犯我嘅事。
而佢媽咪只係完全不在意咁同我講：「細路仔喺咁㗎啦！你咁大個人唔喺同佢計呀嘛！」
我好無奈，教育喺應該家長同埋學校一齊合作，互相配合先至可以發揮最大嘅功效。遇到啲咁嘅家長，我都無能為力。一個人無論佢之後賺幾多錢都好，佢嘅品格唔好都唔會得人嘅尊重。當我見到明仔媽媽蹲喺到諗住幫拎明仔個書包，明仔毫無預警同理由咁巴咗佢媽咪一下塊面。而佢媽咪都笑口噬噬咁問：「仔呀！做咩呀？」
連佢呀媽自己都可容忍到自己個仔咁打自己，我冇嘢好講。但佢呀媽忍唔代表我要忍，之後佢再咁做我唔會忍佢，我係到做老師喺教人，唔喺服務學生，亦都唔喺為咗討好學生。事實上，我之後都遇到好多次明仔咁做。無論我點嚴厲咁罸佢又或好言相勸都冇用。佢父母係屋企容忍佢咁無禮放肆，佢係學校消停咗係屋企返嚟又再打回原型。我又唔可咆吼鬧佢，咁樣會俾人話傷害小朋友弱小嘅心靈。我係老師嚟㗎嘛！我要有耐心。但我強大嘅心靈日日都俾佢傷害到體無原膚。但依家嘅我如果一早就體會到咩叫人生苦短，我仲會唔會繼續咁忍落去呢？一日，當我班學生喺到午睡嘅時候，我聽到隔離房有持續「呯呯」嘅聲，我冇理到，但之後我就聽到有人嘅尖叫聲，於是我就出咗去睇下發咗咩事。你地知課室近走廊個到有窗，我可以好清楚咁睇到入面發生咩事！我見到課室入面一片混亂，學生喺入面癲咗咁互相撕咬。佢地行動嘅姿勢奇怪，發出野獸咁嘅低吼 聲。我諗，呢啲喺咪就喺喪屍！我即刻蹲底以免俾佢地發現，慢慢爬去其他課室望下，都係一片混亂。正當我想衝返自己課室時，我見到有個隔離班嘅一個小朋友，喺對面廁所行出嚟，我諗佢岩岩應該喺去廁所以逃過一劫。但當佢行到距離我3米嘅時候，對面嘅教員室門突登被撞開，入面好多喪"師"衝咗出嚟。
#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/